Tvini n‑dakeé ɨɨn ñadɨʼɨ kundaʼu kukee alcancía
21
Ijan dada n‑ngonenuu Jesús,
te n‑xini‑ia ñayiu kuika ka dakeé tvini xiti ɨɨn alcancía xa ka doko‑i nuu Ianyuux.
2 Dɨuni n‑xini‑ia ɨɨn ñadɨʼɨ n‑xiʼí yɨɨ dakeé uu tvini kuechi xa doko‑ña.
Yo kundaʼu‑ña.
3 Te n‑jaʼan‑ia:
—Ñá yaʼa,
kundaʼu‑ña,
ko kuenda kɨu kueʼe ka tvini n‑doko‑ña nuu Ianyuux dada dava ka ñayiu n‑ka doko tvini‑i.
4 Ntdaa ñayiu n‑ka dakeé tvini n‑kendodo,
ko mee‑ña n‑dakeé‑ña tvini jueen‑ña xa kax xa koʼo‑ña.
Ofrenda de una Viuda
N‑jaʼan Jesús xa junkoio veñuʼu
5 Ijan dada n‑ka ndatnuʼu se dakuaʼa‑ia xa vili xndaa yuú xndenee nama veñuʼu Jerusalén.
Dɨuni n‑ka jaʼan‑s xa vili xndaa yuú n‑doko ñayiu nuu Ianyuux xa n‑kukutu nama veñuʼu.
6 Nu n‑teku‑ia xijan,
te xiaʼan‑ia:
—Ntdaa xa xndeʼa‑n yaʼa,
xee kɨu ma kava ndodo tnaʼa ka ni ɨɨn yuú n‑kuaʼa veñuʼu yaʼa.
Ntdandituʼu junkoio.
N‑jaʼan Jesús xa n‑kuyatni xa naa ñuñayiu
7 Ka xiaʼan‑s nuu‑ia:
—Maestru,
¿nakɨu yaʼa ntdaa xijan?
¿Na milagru kada Taa‑ro Ianyuux xa na kutnuni ini koio‑da xa vax kuyatni kɨu ijan?
8 Te xiaʼan Jesús nuu‑s xiʼin nuu ñayiu xyuku ijan:
—Koo koio‑n cuedado xa maxku dandaʼu ñaʼa se kixi.
Kueʼe‑s kixi,
te jaʼan‑s xa n‑tundaʼa‑r‑sɨ.
Jaʼan‑s:
“Ruʼu kuu Cristu.
N‑xee kɨu ndixi‑r”,
kachi‑s.
Maxku nkuitandijun koio‑n‑sɨ.
9 Kɨu na teku‑n xa ka jantnaʼa ɨɨn nación xiʼin ɨnka nación,
maxku ñaʼa chi ini koio‑n.
Kɨu na teku‑n xa n‑ndandita ñayiu nuu se taxnuni nuu‑i,
maxku ñaʼa chi ini koio‑n.
Maxku kundu ini‑n.
Kiʼna ka io xa yaʼa ntdaa xijan.
Ijan dada naa ñuñayiu.
Kukuee ka,
dada yaʼa xaʼa.
10 Ndandita ɨɨn país nuu ɨnka país.
Jantnaʼa koio soldado ɨɨn se kunxaʼnu xiʼin soldado ɨnka se kunxaʼnu.
11 Kixi ñutnaa ndeʼe.
Kueʼe ñuu xndatuu ñuñayiu kixi tnama.
Kixi kueʼe.
Kueʼe xa ña uun xini‑n koo andɨu.
Dandeʼa ñaʼa Ianyuux xijan,
te yuʼu koio ñayiu.
12 Antecas xa yaʼa xijan tnɨɨ ñaʼa koio ñayiu,
te kandeka ñaʼa‑i jɨʼɨn nuu se ka kuu juxtixia,
te tekuechi neñuu ñaʼa‑i.
Kada uʼu ñaʼa‑i.
Diko ñaʼa koio‑i nuu juexi ka ndadandaa kuechi ñayiu ka xeʼen veñuʼu kuechi,
te chindiʼu ñaʼa koio‑s vekaa.
Kandeka ñaʼa koio‑i jɨʼɨn nuu se ka kunxaʼnu xiʼin nuu se ka kuu gobernador xa tekuechi neñuu ñaʼa‑i.
Ntdaa xijan kada ñaʼa koio‑i xaxeʼe‑r.
13 Kɨu ijan kakuneʼe ñaʼa koio‑n nuu se ndadandaa kuechi‑n.
14 Maxku jun ini‑n xa koo tuʼa‑n xa jaʼan koio‑n nuu‑s xa dadaʼan niʼno‑n mee‑n
15 chi hora ijan kachitnuʼu ñaʼa‑r tnuʼu ñukax ini,
tnuʼu ndichi jaʼan‑n.
Kaʼnu koio‑n tnuʼu se kada uʼu ñaʼa.
Kunuu ka tnuʼu koio‑n.
16 Datuu ñaʼa tadɨʼɨ‑n.
Datuu ñaʼa ñani‑n,
kuʼa‑n,
ñayiu kutnaʼa xiʼin‑n,
ñayiu kumani xiʼin‑n.
Dava‑n kaʼni ñaʼa‑i.
17 Jini uʼu ñaʼa ntdaa ñayiu xaxeʼe xa ka kukanu ini ñaʼa‑n.
18 Ma naa yɨkɨ kuñu‑n,
ni ɨɨn idi dɨkɨ‑n,
ma naa.
19 Nux dani na kukanu ini ñaʼa‑n,
kundito‑n nɨkava nɨkuita andɨu.
20 ʼKɨu na jini koio‑n xa duku nduu kueʼe soldado nɨkanduu Jerusalén,
kutnuni ini‑n xa n‑kuyatni xa naa Jerusalén.
21 Se xtuu Judea kɨu ijan na kunu koio‑s,
jɨʼɨn‑s yuku.
Se xtuu Jerusalén,
na kee koio‑s kɨu ijan.
Se xtuu yuʼu ñuu,
maxku ndɨu koio‑s ñuu jan
22 chi ndaʼu yaʼa koio ntdaa ñayiu xtuu ijan kɨu ijan xaxeʼe kuechi n‑ka kida‑i hora na jɨn tnaʼa tnuʼu Ianyuux xyodotnuni.
23 Ndaʼu yaʼa koio ñadɨʼɨ xñuʼu daʼya.
Ndaʼu yaʼa koio ñadɨʼɨ dakadi yɨjɨn kɨu ijan.
Ndaʼu yaʼa ñayiu chi yo kiti ini Ianyuux nuu ñayiu ñuu yaʼa.
24 Dava ñayiu kuú espada,
te dava‑i,
kandeka ñaʼa setoʼo jɨʼɨn ñuu‑s.
Danaa koio‑s Jerusalén.
Taxnuni setoʼo jan nde na xee kɨu n‑xe kotuu xa ma taxnuni ka‑s,
ijan dada ma taxnuni ka‑s.
25 ʼKada Ianyuux milagru andɨu.
Kada‑ia xa dama nuu ngandii.
Kada‑ia xa dama nuu yoo.
Kada‑ia xa dama nuu chudini.
Yo yuʼu ñayiu xndaxio ñuñayiu hora na kundeʼa‑i xijan.
Dɨuni yuʼu‑i xaxeʼe xa ndeʼe kayu mar.
26 Junee koio‑i xaxeʼe xa yo yuʼu‑i.
Yo yuʼu‑i xa yaʼa ñuñayiu chi junkoio ntdaa xa io andɨu.
27 Ijan dada jini ñaʼa ñayiu ñuñayiu ruʼu,
Ia kuu ñayiu.
Kundeʼa‑i xa ndixi‑r nuu vikó.
Jini ñayiu xa taxnuni‑r.
Yo ndeʼe ndii‑r.
28 Kɨu na kixeʼe xa yaʼa ntdaa xaʼa koo kaʼnu anu‑n chi n‑kuyatni kɨu dananitaʼu ñaʼa Ianyuux —kuu Jesús,
xiaʼan‑ia.
29 Ijan dada n‑jaʼan‑ia ɨnka ntuku tnuʼu:
—Xa xnaʼa‑n nax yaʼa tnu higo xiʼin dava ka yutnu.
30 Hora nandɨdɨ‑tnu xá vax nduyatni yoo iʼni.
31 Nani ka xini‑n xa vax nduyatni yoo iʼni,
dani jini‑n xa vax kuyatni kɨu taxnuni Ianyuux nuu ñayiu hora na jini‑n xa yaʼa ntdaa xijan chi xijan kuu seña xa daa yaʼa.
32 Xandaa xakuiti nde na yaʼa ntdaa xijan ijan dada kuú ndɨʼɨ ñayiu io vitna.
33 Naa andɨu.
Naa ñuñayiu,
ko xa n‑jaʼan‑r ma kuita.
34 ʼKoo koio‑n cuedado xa maxku kada‑n kuechi kuu anu‑n xa kada‑n;
kundedi ini‑n xijan.
Ni maxku yoo‑n koʼo kueʼe xa xini‑n;
ni maxku yoo‑n yo kɨ ini xa kaxi xa koʼo‑n xa kundix kudaʼu‑n,
te ma jun ini koio‑n xa juini Ianyuux.
Ñadu xa duʼa kada‑n chi dana ini ndixi‑r,
te mayo‑n koo tuʼa.
35 Kuenda kɨu ɨɨn xiti ñunu xa dakeé ñaʼa ñayiu kɨu ijan xa kada ñaʼa‑i ɨɨn xa kada ñaʼa‑i.
Ntdaa ñayiu ñuñayiu yaʼa ntdaa xa yaʼa kɨu ijan.
36 Kunaʼa koio‑n xa ndixi‑r.
Kajan taʼu koio‑n nuu Ianyuux xa na kaku koio‑n nuu ntdaa xijan.
Xa kuyatni xa yaʼa ntdaa xijan.
Kajan taʼu koio‑n nuu Ianyuux xa taxkanu ini‑ia kuechi n‑ka kida‑n na kuaʼa maxku kajan ruʼu xa kuu‑r Ia kuu ñayiu,
kuechi‑n nuu‑ia —kuu Jesús,
xiaʼan‑ia.