Xndeka‑s Jesús juaʼan nuu Pilato
23
Ijan dada n‑ka ndojuiin‑s ntdaa‑s te xndeka ñaʼa‑s juaʼan nuu Pilato chi tuu‑s Jerusalén daa.
2 Te n‑ka kixeʼe‑s xa ka tekuechi‑s‑ia nuu Pilato.
Ka xiaʼan‑s:
—Se yaʼa,
dajaʼan‑s ñayiu Israel xa jandixa‑i ɨɨn xa ña ndaa.
Xiaʼan‑s nuu‑i xa maxku kajan‑i tvini nandajan César.
Jaʼan‑s xa mee‑s kuu Cristu.
Jaʼan‑s xa kuu‑s se kunxaʼnu.
3 Ijan dada n‑xijan tnuʼu Pilato Jesús:
—¿Ndoʼo kuu se taxnuni nuu ñayiu Israel a?
Xiaʼan Jesús:
—Joon.
4 Ijan dada xiaʼan Pilato nuu dutu ka taxnuni xiʼin nuu ñayiu xyuku ijan:
—Ña tuu na kuechi se yaʼa io.
5 Te juexa n‑ka jaʼan naʼi se ijan xa io kuechi Jesús nuu Pilato.
Ka xiaʼan ka ntuku‑s:
—Dandandita‑s ñayiu nuu gobierno.
Duʼa kida‑s vaxi nde Galilea xiʼin nde yaʼa.
N‑tundaʼa Pilato Jesús; juaʼan‑ia nuu Herodes
6 Nu n‑teku Pilato xijan,
te n‑xijan tnuʼu‑s nux se Galilea kuu Jesús.
7 Nu n‑teku Pilato xa distrito taxnuni Herodes kuu distrito Jesús,
te n‑tundaʼa‑s‑ia juaʼan.
Juaʼan‑ia nuu Herodes chi dɨuni tuu Herodes Jerusalén kɨu ijan.
Jesús es traído ante Pilato
8 Nu n‑xini Herodes Jesús,
te yo n‑kuvete‑s chi n‑xo juini‑s xa kundeʼa‑s Jesús chi n‑xo teku tnuʼu‑s nax n‑xo kida‑ia.
N‑juini‑s xa kada‑ia ɨɨn milagru xa kundeʼa‑s.
9 Kueʼe xa n‑xijan tnuʼu Herodes‑ia,
ko ni ɨɨn tnuʼu ñatu n‑jaʼan‑ia.
10 N‑ka ndixeʼe dutu ka taxnuni xiʼin se ka tuʼa vaʼa ley n‑chidotnuni Moisés xa ka jaʼan juexa‑s xa io kuechi Jesús.
11 N‑jaʼan Herodes xiʼin soldado‑s xa ña tuu nax juun ñaʼa‑s.
N‑ka xakundee‑s‑ia.
N‑ka dakɨu nuu‑s‑ia daʼma diñu,
daʼma se taxnuni xa kueku ndee‑s‑ia,
te n‑nadayaʼa‑s‑ia nuu Pilato.
12 Kɨu ijan n‑ndumani Herodes xiʼin Pilato.
N‑xo xini uʼu tnaʼa‑s n‑kuu.
Jesús es Traído ante Herodes
N‑jaʼan Pilato xa kuú Jesús
13 Ijan dada n‑dataka Pilato dutu ka taxnuni xiʼin dava ka se Israel ka taxnuni nuu ñayiu Israel xiʼin ñayiu xtuu ijan.
14 Xiaʼan Pilato nuu‑s ntdaa‑s:
—N‑ka ki ndeka‑n se yaʼa te ka tekuechi‑n‑sɨ xa dajaʼan‑s ñayiu xa na ndandita‑i nuu‑r.
N‑ka xo ndeʼa‑n xa n‑xijan tnuʼu‑r‑sɨ,
ko ña tuu na kuechi‑s io na ka jaʼan‑n.
15 Dani Herodes ña tuu na kuechi‑s io jaʼan‑s.
Xijan kuu xa n‑nadayaʼa‑s‑sɨ nuu‑r.
Ña tuu nax n‑kida‑s xa kuú‑s.
16-17 Kani‑r‑sɨ chirrión ñɨɨ te dayaa‑r‑sɨ.
18 Ko xee n‑ka kana ntdaa ñayiu xyuku ijan.
Ka xiaʼan‑i:
—Kandeka‑n‑sɨ juaʼan,
te kaʼni‑n‑sɨ.
Dayaa‑n Barrabás.
19 Barrabás n‑xo kandeka tnaʼa xiʼin se n‑ka ndandita nuu gobernador romano te n‑xaʼni‑s ndɨyɨ.
Duʼa n‑ka kida‑s Jerusalén.
Xijan kuu xa yɨndiʼu‑s.
20 Xee n‑jaʼan Pilato nuu ñayiu ɨnka ntuku vuelta xa n‑jaʼan‑s xa dayaa‑s Jesús.
21 Te n‑ka kana ntuku se xyuku ijan nuu Pilato:
—Katakaa dika‑n‑sɨ.
Katakaa dika‑n‑sɨ.
22 Xiaʼan ntuku Pilato nuu‑s ɨnka vuelta.
Vuelta kuu uni kuu vuelta yaʼa.
—¿Nakuenda?
¿Na kuechi n‑kida‑s?
Ña tuu na kuechi n‑kida‑s xa kaʼni‑r‑sɨ.
Kani‑r‑sɨ chirrión ñɨɨ,
te dayaa‑r‑sɨ —kuu Pilato.
23 Xee ka n‑ka kana‑s xa na nkuitakaa dika Jesús.
Te n‑ka kundee tnuʼu‑s.
24 Te n‑xino ini Pilato xa kada‑s Jesús ná n‑ka juini se xyuku ijan.
25 N‑dayaa Pilato se n‑ka juini se xyuku ijan xa yaa‑s.
Yɨndiʼu se ijan xaxeʼe xa n‑ndandita‑s nuu gobierno xiʼin xa n‑xaʼni‑s ndɨyɨ.
N‑xejoon Pilato xa nkuitakaa dika Jesús nani n‑ka juini se xyuku ijan.
Jesús es Sentenciado
N‑ka xatakaa dika‑s Jesús
26 Xndeka ñaʼa soldado juaʼan,
te n‑ka xe juntnaʼa‑s xiʼin ɨɨn se nani Simón.
Se Cirene kuu‑s.
Juan nuʼu‑s xa n‑xeʼen‑s yuku.
N‑ka tnɨɨ‑s‑sɨ,
te n‑ka taʼu tniu‑s xa kadoko‑s curuxi Jesús,
te n‑xe kuitandijun‑s‑ia.
27 Kueʼe ñayiu n‑ka xe kuitandijun ñaʼa —nani seyɨɨ,
dani ñadɨʼɨ.
Ka katu dava‑ña pechu‑ña xaxeʼe xa ka tnau ini‑ña,
te ka ndaʼi‑ña.
28 N‑ngonenuu Jesús xa kundeʼa‑ia‑ña ntdaa‑ña.
N‑jaʼan‑ia nuu‑ña:
—Ndoʼo,
ñá Jerusalén,
maxku ndaʼi koio‑n xaxeʼe‑r.
Ndaʼi koio xaxeʼe mee‑n xiʼin xaxeʼe daʼya‑n
29 chi xee kɨu jaʼan ñayiu:
“Naka taʼu ñadɨʼɨ ñayo na daʼya io,
ñadɨʼɨ ña n‑kuaʼa xa koo daʼya,
ñadɨʼɨ ña uun n‑dakadi yɨjɨn.”
30 Daa kixeʼe ñayiu yaʼa xa jaʼan‑i nuu yuku:
“Ndua ndodo ñaʼa.”
Juñaʼa‑i nuu tnduu:
“Dadaʼu ñaʼa.”
31 Kuenda kɨu yutnu yɨʼɨ kuu‑r,
te ka kida uʼu ñaʼa‑s.
Naka se kuu kuenda kɨu yutnu yichi,
ma kada uʼu ñaʼa koio‑s.
Jesús Carga Su Cruz
32 Dɨuni xndeka‑s uu ka se juaʼan xa nkuitakaa dika‑s.
Xndido tau‑s kuechi naʼnu.
33 Nu n‑xee‑ia ɨɨn nuu nani Yɨkɨ Dɨkɨ Ndɨyɨ,
te ijan n‑ka xatakaa dika‑s‑ia xiʼin se xndido tau kuechi‑s.
Ɨɨn‑s n‑ka xatakaa dika‑s diñi kuaʼa‑ia,
ɨnka‑s n‑ka xatakaa dika‑s diñi datni‑ia.
34 Nu n‑xatakaa dika‑s Jesús,
te xiaʼan‑ia nuu Ianyuux:
—Taa‑ro Ianyuux,
taxkanu ini‑n‑sɨ chi ñayo‑s ka xini xa kuechi kuu xa n‑ka kida‑s.
Te n‑ka dadɨkɨ soldado jan suerte‑s nuu ndedaa‑s kendoo xiʼin daʼma‑ia.
Jesús es Crucificado
Soldados apuestan por las Ropas de Jesús
35 N‑ka xo ndeʼa ñayiu xnii ijan nax n‑yaʼa.
Se Israel ka taxnuni nuu ñayiu Israel,
ndeʼe n‑ka xakundee‑s Jesús.
Ka xiaʼan tnaʼa‑s:
—N‑dakaku‑s dava ñayiu.
Nux kuu‑s Cristu,
se n‑kaxí ñaʼa Ianyuux,
na dakaku‑s mee‑s.
—Nux kuu‑n se kunxaʼnu nuu ñayiu Israel,
dakaku mee‑n.
38 Te n‑ka tenee‑s tutu dɨkɨ curuxi.
Yodotnuni:
“Se yaʼa kuu se taxnuni nuu ñayiu Israel.”
La Placa en la Cruz
39 Ɨɨn se kueʼe kuechi n‑kida ntakaa dika curuxi jan,
kuiʼa n‑jaʼan‑s nuu Jesús.
Xiaʼan‑s:
—Nux kuu‑n Cristu dakaku‑n mee‑n,
te dani dakaku ñaʼa.
40 N‑kanandee ñaʼa ɨnka se ntakaa dika jan.
Xiaʼan‑s nuu‑s:
—¿Nax kuu xa ña yuʼu‑n nuu Ianyuux?
Ɨnuu ndaʼu yaʼa‑ro xiʼin‑s.
Xaxeʼe xa ndido tau‑ro kuechi‑ro,
41 xijan kuu xa chiyaʼu‑ro,
ko se yaʼa ña tuu nax n‑kida‑s —kuu‑s,
xiaʼan‑s.
42 Te xiaʼan‑s nuu Jesús:
—Dito,
najaʼan ñaʼa‑n hora na xee‑n nuu taxnuni‑n.
43 Xiaʼan Jesús nuu‑s:
—Xandaa xakuiti kutuu‑ro nuu kuu jardín paraíso andɨu vitna.
Convictos Crucificados
N‑xiʼí Jesús
44 Xaku nga xa kuu kaa x‑uu n‑kunee nituʼu ñuñayiu xa nde kaa uni xa ñini
45 chi n‑kida Ianyuux xa ña ndii ka.
Te n‑ndata dava cortina ndiʼu dava xiti veñuʼu Jerusalén.
46 Te xee xa xee n‑kana Jesús.
N‑jaʼan‑ia:
—Taa‑ro Ianyuux,
nakueka‑n anu‑da.
Ijan dada n‑najuen tachi‑ia ɨɨn nga vuelta,
te n‑xiʼí‑ia.
47 N‑xini centurión nujuiin yatni xeʼe curuxi xa n‑yaʼa,
te n‑najuen tnuʼu‑s Ianyuux.
N‑jaʼan‑s:
—Xandaa xakuiti ña tuu na kuechi se yaʼa io.
48 Ñayiu xyuku ijan xa kundeʼa‑i naxa yaʼa,
n‑ka xini‑i xa n‑yaʼa,
te n‑ka katu‑i pechu‑i xaxeʼe xa yo ka tnau ini‑i.
N‑ka katu‑i pechu‑i nɨni juan nuʼu koio‑i.
49 Ñadɨʼɨ n‑ka xitandijun‑ia nde Galilea xiʼin ñayiu n‑ka xo xinitnaʼa xiʼin‑ia,
xika n‑ka xo nujuiin‑ña xiʼin‑i xa kundeʼakoio‑i xa yaʼa‑ia.
La Muerte de Jesús
N‑xe konduxi Jesús
50 N‑xee ɨɨn se nani José tnaʼa nuu se Israel ka taxnuni nuu ñayiu Israel ijan.
Yo vaʼa‑s.
51 Se ñuu Arimatea kuu‑s.
Arimatea katuu distrito Judea.
N‑xo ndetu‑s xa taxnuni Ianyuux nuu ñayiu ñuñayiu.
Ña n‑kuu ɨnuu‑s xiʼin se n‑ka ñu ini xa kaʼni‑s Jesús.
52 N‑xe nundajan‑s Jesús nuu Pilato.
53 N‑xe nuneʼe‑s‑ia nuu curuxi te n‑chiduku‑s‑ia daʼma linu.
N‑xajan niʼni‑s‑ia xiti ɨɨn yau kava n‑ka kaan se xinokuechi nuu‑s nuu ta kava ka ndɨyɨ.
54 Vax kuyatni xa keé ngandii,
te vax kuyatni kɨu kuu sabado,
kɨu ka ndetatu ñayiu Israel.
N‑ka kida‑i ntdaa tniu‑i xa ma kadatniu‑i ɨnka kɨu jan.
55 Ñadɨʼɨ n‑ka xitandijun Jesús nde Galilea xiʼin nde Jerusalén jan,
n‑ka xo ndeʼa‑ña xa n‑xajan niʼni José Jesús yau kava jan.
56 Ijan dada juan nuʼu‑ña xa kada tuʼa‑ña perfume xiʼin yuchi xeʼen vidi.
Te n‑ka ndetatu‑ña kɨu sabado jan na n‑taʼu tniu Ianyuux.
Entierro de Jesús