2
Xaxeʼe xa ña n‑juini‑da xa kudeen ñaʼa‑da ɨnka vuelta,
n‑xani ini‑da xa ma xee‑da Corinto vitna.
Ña n‑juini‑da xa ku tnau ini ka‑ro.
2 Nux n‑kida‑da xa ku tnau ini koio mee‑n n‑kuu,
te duʼa kada‑da xa ku tnau ini ñayiu ka kida xa kuvete mee‑da.
3 Xijan kuu xa n‑kidavaʼa‑da nuu‑n.
N‑juini‑da xa kuvete‑da xiʼin‑n hora na xee‑da ijan,
ña n‑juini‑da xa ku tnau ini‑da xaxeʼe‑n.
N‑xio‑da confianza nuu‑n xa kuvete koio ntdaa mee‑n hora kuvete mee‑da.
4 Yo n‑xo ndu ini‑da te n‑xo tnau ini‑da,
hora n‑kidavaʼa‑da carta ijan.
Xa diko n‑xo ndaʼi‑da.
Ko ñatu n‑kidavaʼa‑da xa ku tnau ini koio‑n.
N‑juini‑da xa jini koio‑n nada xemani ñaʼa‑da.
Io xa taxkanu ini‑ro se n‑kida xa uʼu
5 Io ɨɨn se n‑kida xa tnau ini‑ro.
Hora n‑kida‑s kuechi,
n‑kida‑sɨ xa tnau ini mee‑da,
te n‑kida‑sɨ xa n‑ka tnau ini ntdaa mee‑n tuku.
Ko ñatu juini‑da xa kodo ka jaʼan‑da.
6 Na n‑ka nataka‑n,
te n‑ka kida uʼu‑n se ijan,
ko vitna maxku kada uʼu ka‑n‑sɨ.
7 Vitna io xa taxkanu ini koio‑n‑sɨ,
xa juñaʼa koio‑n tnuʼu kanu ini nuu‑s,
xa maxku kuita ka anu‑s.
8 Xijan‑da nuu‑n xa dandeʼa‑n‑sɨ xa xandaa kuu xa xemani‑n‑sɨ.
9 Xá n‑kidavaʼa‑da nuu‑n,
xa kototnuni ñaʼa‑da,
nux jandixa ñaʼa‑n,
a ñaʼa.
10 Taxkanu ini koio‑n‑sɨ,
te dani taxkanu ini mee‑da mee‑s.
Naʼa Cristu xa davaʼa nga xa n‑taxkanu ini‑da,
n‑taxkanu ini‑da xaxeʼe mee‑n.
11 Xá n‑taxkanu ini‑da‑sɨ,
xa maxku dandaʼu ñaʼa Satanás,
chi vaʼa xini‑ro nanda kidatniu‑i.
Ñatu n‑kundaa n‑kuvatu anu Spalu
12 Na n‑xee‑da ñuu nani Troas,
xa juña tnuʼu‑da tnuʼu Cristu nuu ñayiu ijan,
te n‑kida Xtoʼo‑ro Jesús xa n‑ka xeka vaʼa ñayiu jan tnuʼu‑da.
Kuu ná kuu xa n‑najaan‑ia ɨɨn yeʼe kaʼnu nuu‑da.
13 Ko ñatu n‑xo kundaa n‑xo kuvatu anu‑da,
xaxeʼe xa ñatu n‑nanitnaʼa‑da xiʼin ñani‑ro Tito ijan.
Xijan kuu xa n‑kee‑da Troas,
xa jɨʼɨn‑da Macedonia.
Ndaku‑ro xaxeʼe Cristu
14 Cristu Jesús kuu Ia kunxaʼnu ka.
Na kutaʼu‑da Ianyuux xa ndeka ñaʼa‑ia nuu iin yujun ñayiu ka jandixa Cristu Jesús.
Xaxeʼe mee‑da xite niʼna tnuʼu‑ia nituʼu lado,
ná xite niʼna ɨɨn diko vidi xeʼen.
15 Chi mee‑da kuu diko duxa doko Cristu nuu Ianyuux.
Te nani xite niʼna diko jan nuu ñayiu dakaku‑ia,
dani xite niʼna nuu ñayiu ma dakaku‑ia.
16 Nuu ñayiu ña ka jandixa Cristu,
diko kaʼni ñayiu ka kuu‑da.
Ko nuu ñayiu ka jandixa Cristu,
diko kada xa kutuu vaʼa koio‑i ka kuu‑da.
¿Te jundu ka kuu mee‑da xa duʼa koo?
17 Ñatu ka kuu mee‑da ná ka kuu ɨnka ñayiu,
xa ka nadama‑i tnuʼu Ianyuux,
xa niʼi koio‑i xa ka juini mee‑i.
Mee‑da kuu ñayiu ka kunduu xiʼin Cristu.
N‑tundaʼa ñaʼa Ianyuux,
xa juñaʼa‑da tnuʼu Jesucristu nuu ñayiu.
Ka jaʼan‑da xiʼin xandaa,
te xini‑ia ntdaa xa ka kida‑da.