Carta n‑kidavaʼa Spalu nuu ñayiu Galacia
Kidavaʼa Spalu nuu ñayiu Galacia
1
Mee‑da kuu Spalu,
se n‑tundaʼa ñaʼa Jesucristu kuu‑da.
Ña n‑ka tundaʼa ñaʼa seyɨɨ,
ña n‑ka kaxí ñaʼa seyɨɨ.
N‑kaxí ñaʼa Jesucristu xiʼin Taa‑ro Ianyuux,
Ia n‑kida xa n‑nandoto Jesús.
2 Carta yaʼa kidavaʼa‑da xiʼin ntdaa ñani‑ro xtuu xiʼin‑da yaʼa.
Ka kidavaʼa‑da nuu mee‑n ka kuu ñani‑da kuʼa‑da ntdaa veñuʼu distrito Galacia.
3 Na taxi Taa‑ro Ianyuux xiʼin Xtoʼo‑ro Jesucristu xamani‑ia,
na kada‑ia xa kutuu vaʼa koio‑n.
4 N‑xejoon Jesucristu xa kuú‑ia xaxeʼe‑ro.
N‑xiʼí‑ia xaxeʼe kuechi mee‑ro,
xa dakaku ñaʼa‑ia ñuñayiu yaʼa nuu ka kida ñayiu xa uʼu.
Duʼa n‑kida Jesucristu ntdaa xa n‑juini Taa‑ro Ianyuux xa kada‑ia.
5 Na juñaʼa‑ro xa n‑kutaʼu‑ro nuu Ianyuux nɨkava nɨkuita.
Duʼa na koo.
Ña tuu na ɨnka tnuʼu kada xa ma kuú‑ro xiʼin kuechi‑ro
6 Ñatu kutnuni ini‑da nakuenda kuu xa yachi ka dandoo‑n Ianyuux.
Xaxeʼe xa xemani ñaʼa Cristu mee‑n,
te n‑jaʼan ñaʼa Ianyuux xa kunduu koio‑n xiʼin‑ia.
Te vitna ñatu ka jandixa‑n tnuʼu vaʼa Jesucristu,
chi ka jandixa‑n ɨnka tnuʼu.
7 Ko ña tuu na ɨnka tnuʼu kada xa ma kuú‑ro xiʼin kuechi‑ro.
Diko ni io se ka daka niʼna ñaʼa,
ka juini‑s xa dama‑s tnuʼu vaʼa Jesucristu.
8 Nux kachitnuʼu ɨɨn ñayiu ɨnka tnuʼu ñatu kuu tnuʼu vaʼa Jesucristu,
te na tundaʼa ñaʼa Ianyuux ñayiu jan jɨʼɨn andea.
Mee‑da tuku.
Nde ángel andɨu du.
Nux kachitnuʼu‑da tnuʼu ñatu kuu tnuʼu Jesucristu,
te na tundaʼa ñaʼa Ianyuux mee‑da jɨʼɨn andea.
9 Xá n‑jaʼan‑da,
te vitna jaʼan‑da ɨnka vuelta:
Xá n‑ka xeka vaʼa‑n tnuʼu vaʼa Jesucristu.
Nux ka kachitnuʼu‑s tnuʼu ñatu kuu tnuʼu vaʼa Jesucristu,
te na tundaʼa Ianyuux mee‑s jɨʼɨn‑s andea.
10 Ñatu nduku‑da xa tna ini ñayiu,
nduku‑da xa tna ini Ianyuux.
Nux ña tna ini ñayiu tnuʼu‑da,
ko vatuka.
Chi nux n‑juini‑da xa kendoo vaʼa‑da xiʼin ñayiu n‑kuu,
ma ku kuu‑da se xinokuechi nuu Jesucristu.
Ɨɨn se n‑tundaʼa Cristu kuu‑da
11 Ñani‑da kuʼa‑da,
juini‑da xa kutnuni ini koio‑n xa hora n‑jaʼan‑da tnuʼu vaʼa Jesucristu nuu‑n,
ñatu n‑jaʼan‑da tnuʼu ñayiu.
12 Tnuʼu vaʼa xa n‑jaʼan‑da nuu‑n ñatu n‑taxi seyɨɨ,
ñatu n‑dakuaʼa ñaʼa seyɨɨ.
N‑dakuaʼa ñaʼa Jesucristu tnuʼu vaʼa n‑jaʼan‑da nuu‑n.
13 Xá n‑ka tekutnuʼu‑n nanda n‑kida‑da,
xa kada‑da ná io ná juaʼan ntdaa tnuʼu taʼu tniu ñayiu Israel.
Xá n‑ka tekutnuʼu‑n xa yo uʼu n‑juini‑da ñayiu ka jandixa Ianyuux.
N‑juini‑da xa danaa‑da ntdaa‑i.
14 N‑xo kunuu‑da nuu ntdaa se dava xiʼin‑da,
xaxeʼe xa yo vaʼa n‑jandixa‑da tnuʼu taʼu tniu ñayiu Israel.
Xiʼin ntdaa anu‑da n‑kida‑da ná io ná juaʼan ntdaa xa n‑ka dakuaʼa ñaʼa taxaʼnu tnetnu‑da.
15-16 Antecas xa kaku‑da,
n‑kaxí ñaʼa Ianyuux mee‑da.
Xaxeʼe xa yo n‑xemani ñaʼa‑ia,
n‑jaʼan ñaʼa‑ia xa kunduu‑da xiʼin‑ia.
Te na n‑juini‑ia,
n‑kida‑ia xa jini‑da Daʼya Yɨɨ‑ia,
xa juñaʼa‑da tnuʼu vaʼa Jesucristu nuu ñayiu ña ka kuu ñayiu Israel.
Na duʼa n‑kuu,
ñayo n‑xijan tnuʼu‑da xa kada‑da.
17 Ni ña n‑nuʼu‑da Jerusalén,
xa ndatnuʼu‑da xiʼin se n‑tundaʼa Jesucristu xtuu Jerusalén.
Chi duʼa n‑xeʼen‑da do Arabia,
te dada n‑nuʼu‑da Damasco.
18 Na n‑yaʼa uni kuia,
dada n‑nuʼu‑da Jerusalén,
xa jini tnaʼa‑da xiʼin Spedru.
Ijan n‑xo tuu‑da xaʼun kɨu xiʼin‑s.
19 Ijan n‑xini‑da Jacobo,
ñani Xtoʼo‑ro Jesucristu,
ko ña n‑xini‑da dava ka se n‑tundaʼa Jesucristu.
20 Ndeʼa ñaʼa Ianyuux xa ñadu tnuʼu vete kuu xa kidavaʼa‑da.
21 Ijan dada n‑xeʼen‑da do Siria xiʼin do Cilicia.
22 Te ñayiu ka jandixa Jesucristu veñuʼu do Judea,
ñayo‑i n‑ka xo xini ñaʼa mee‑da.
23 Diko ni n‑ka tekutnuʼu‑i:
“Se ndeʼe n‑xo xini uʼu ñaʼa,
se n‑juini xa kaʼni ñaʼa‑s ntdaa‑ro,
se ijan,
xian tnuʼu‑s tnuʼu vaʼa Jesucristu nuu ñayiu vitna.”
24 Te n‑ka xiaʼan‑i xa n‑kutaʼu‑i nuu Ianyuux xaxeʼe‑da.