N‑ka xeka ñaʼa vaʼa dava ka se n‑tundaʼa Cristu
2
Na n‑yaʼa uxi koon kuia,
te n‑nuʼu‑da Jerusalén.
N‑xeʼen‑da xiʼin Bernabé,
te n‑kunduu Tito xiʼin‑da tuku.
2 N‑dandeʼa ñaʼa Ianyuux xa n‑xio xa jaʼan‑da xiʼin se ka kunuu nuu ñayiu ka jandixa Cristu Jerusalén.
N‑ndatnuʼu‑da xiʼin ndruni ni se ijan,
chi n‑juini‑da xa kutnuni ini se ijan ntdaa xa xian tnuʼu‑da nuu ñayiu ña ka kuu ñayiu Israel.
N‑juini‑da xa jini‑da nu n‑ka xani ini ɨɨn nuu‑s xiʼin‑da,
a ñaʼa.
3 Te duʼa n‑kuu.
N‑ka kutnuni ini‑s xa ña ñdoñuʼu xa kaʼnde‑ro nuu ii se ña ka kuu se Israel,
hora ka jandixa‑s Jesucristu.
Juini Tito kuu se griegu te n‑kunduu‑s xiʼin‑da,
ko ña n‑ka kidajuexa ñaʼa‑s xa kaʼnde‑da nuu ii‑s.
4 Ñayiu ka kunduu xiʼin Jesucristu kuu‑ro.
N‑ka kɨu tnaʼa se ka jaʼan xa jandixa‑s Jesucristu,
ko ña ndaa.
N‑ka juini‑s xa kotoyuʼu ñaʼa‑s,
nux kida‑ro ná io ná juaʼan tnuʼu taʼu tniu Moisés,
a ñaʼa.
N‑ka juini‑s xa kadajuexa ñaʼa‑s,
xa kada mee‑ro ná ka kida mee‑s.
5 Ni itaʼu ña n‑ka xejoon‑da xa kadajuexa ñaʼa‑s xa kada‑ro xa ka juini‑s.
N‑dadaʼan‑da tnuʼu vaʼa Jesucristu,
xa niʼi koio mee‑n tuku xa kuu xandaa.
6 Se ijan,
se ka kunuu nuu ñayiu ka jandixa Jesucristu Jerusalén,
ña n‑ka taxi‑s ni ɨɨn tnuʼu taʼu tniu xee.
(Ka jaʼan ñayiu xa se ka kunuu ka kuu‑s,
ña xini‑da.
Jaʼan Ianyuux xa ɨɨn nuu kuu‑ro ntdaa‑ro.)
7 N‑ka kutnuni ini‑s xa n‑kaxí ñaʼa Ianyuux mee‑da,
xa jaʼan‑da tnuʼu vaʼa Jesucristu nuu ñayiu ña ka kuu ñayiu Israel.
8 Dɨuni Ianyuux n‑tundaʼa Spedru nuu ñayiu Israel,
n‑tundaʼa ñaʼa mee‑da nuu ñayiu ña ka kuu ñayiu Israel.
Se n‑tundaʼa Jesucristu kuu Spedru,
te se n‑tundaʼa Jesucristu kuu mee‑da.
9 Se ijan,
Jacobo xiʼin Spedru xiʼin Sua,
se ka kunuu nuu ñayiu ka jandixa Jesucristu Jerusalén,
n‑ka kutnuni ini‑s xa xá n‑taxi Ianyuux xamani‑ia nuu mee‑da tuku.
N‑ka tnɨtnandaʼa‑da xiʼin‑s,
xa n‑ka xeka ñaʼa vaʼa‑s.
N‑ka kida ɨɨn nuu‑da xiʼin‑s,
xa jɨʼɨn mee‑da xiʼin Bernabé nuu ñayiu ña ka kuu ñayiu Israel,
te jɨʼɨn mee‑s nuu ñayiu Israel.
10 Diko ni n‑ka xijan‑s xa chindee‑da ñayiu kundaʼu,
te xaʼa duʼa ni xani ini‑da xa kada‑da.
N‑kanandee‑da Spedru ñuu Antioquía
11 Na n‑xee Spedru ñuu nani Antioquía,
te n‑kanandee‑da‑s,
chi n‑xini‑da xa ña n‑kida‑sɨ xa kuu xavaʼa.
12 Duʼa n‑kuu.
Antecas xa xee koio se kunduu xiʼin Jacobo,
te n‑xo xaxi Spedru xiʼin ñani‑ro kuʼa‑ro ña ka kuu ñayiu Israel.
Ko hora n‑ka xee se ka kunduu xiʼin Jacobo,
te n‑dandoo Spedru ñani‑ro kuʼa‑ro ña ka kuu ñayiu Israel.
Ñatuka n‑xaxi‑s xiʼin‑i,
chi n‑yuʼu‑s nuu se ka jaʼan xa ndoñuʼu xa kaʼnde‑ro nuu ii‑ro.
13 Hora ijan,
se jaʼan ɨɨn te kida ɨnka n‑kuu Spedru.
Te duʼa n‑ka kida ntdaa ɨnka ñani‑ro kuʼa‑ro ka kuu ñayiu Israel n‑ka xo tuu Antioquía.
Nde Bernabé,
se jaʼan ɨɨn te kida ɨnka n‑kuu‑s,
chi n‑dandoo‑s ñani‑ro kuʼa‑ro ña ka kuu ñayiu Israel.
14 N‑xini‑da xa ña n‑ka kida‑s ná io ná juaʼan tnuʼu vaʼa Jesucristu,
te n‑kanandee‑da Spedru nuu ntdaa ñani‑ro kuʼa‑ro.
Xiaʼan‑da:
“Ndoʼo kuu se Israel,
ko hora n‑kii‑n yaʼa,
ña n‑xo tuu‑n ná xtuu ñayiu Israel.
N‑xo tuu‑n xiʼin ñani‑ro kuʼa‑ro ña ka kuu ñayiu Israel,
te n‑xo tuu mee‑n ná xtuu mee‑i.
Te vitna,
juini‑n xa kadajuexa‑n ñani‑ro kuʼa‑ro ña ka kuu ñayiu Israel,
xa kutuu koio mee‑i ná xtuu ñayiu Israel.”
Nde ñayiu Israel, io xa jandixa koio‑i Jesucristu
15 Nduu‑ro,
n‑kaku‑ro ñuu Israel.
Xaxeʼe xa n‑tnɨɨ‑ro tnuʼu taʼu tniu Moisés,
te ña n‑kida‑ro ntdaa xa uʼu ka kida ñayiu ña ka kuu ñayiu Israel.
16 Xini‑ro xa ni ɨɨn ñayiu ma kuaʼa xa kada‑i ná io ná juaʼan tnuʼu taʼu tniu Moisés.
Te dɨuni xini‑ro xa ma jaʼan Ianyuux xa ña tuu na kuechi‑i io.
Ko ɨɨn ñayiu,
nux jandixa‑i Jesucristu,
da kuu xa jaʼan Ianyuux xa kuu ná kuu xa ña tuu na kuechi‑i io.
Xijan kuu xa mee‑ro tuku,
jandixa‑ro Jesucristu.
Juini ña kuaʼa‑ro xa kada‑ro ná io ná juaʼan tnuʼu taʼu tniu Moisés,
ko xaxeʼe xa jandixa‑ro Jesucristu,
te jaʼan Ianyuux xa ña tuu na kuechi‑ro.
Chi ni ɨɨn ñayiu ma kuaʼa xa kada‑i ná io ná juaʼan tnuʼu taʼu tniu Moisés,
te xijan kuu xa ma jaʼan Ianyuux xa ña tuu na kuechi‑i io.
17 Nduku‑ro xa na jaʼan Ianyuux xa ña tuu na kuechi‑ro io xaxeʼe xa kunduu‑ro xiʼin Jesucristu.
Xijan kuu xa ña ndoñuʼu xa kada‑ro ná io ná juaʼan tnuʼu taʼu tniu Moisés.
Xijan kuu xa,
¿Xá n‑kida Cristu xa ku kuu‑ro ñayiu kida kuechi?
¡Ña ndaa!
18 Nux danaa‑da ɨɨn xa danaa‑da,
te dada ndadavaʼa‑da ɨnka vuelta,
xijan kuu xa dakuido kuechi‑da mee‑da.
19 Kuu ná kuu xa n‑xiʼí‑da,
xaxeʼe xa ña n‑kida‑da ná io ná juaʼan tnuʼu taʼu tniu Moisés.
Te xaxeʼe xa n‑xiʼí‑da,
ma kada‑da ná io ná juaʼan tnuʼu jan.
Tuu‑da xa kada‑da xa juini Ianyuux.
20 N‑xiʼí Cristu nuu curuxi,
te kuu ná kuu xa n‑xiʼí mee‑da xiʼin‑ia.
Xijan kuu xa ñatuka taxnuni‑da nuu mee‑da,
chi taxnuni Cristu nuu‑da.
Tuu‑da vitna,
xaxeʼe xa kunduu‑da xiʼin Daʼya Yɨɨ Ianyuux.
N‑xemani ñaʼa‑ia,
te n‑xiʼí‑ia xaxeʼe‑da.
21 Ña juini‑da xa kada yata‑da xamani Ianyuux.
Nux jaʼan Ianyuux xa ña tuu na kuechi ɨɨn ñayiu,
xaxeʼe xa n‑kida‑i ná io ná juaʼan tnuʼu taʼu tniu Moisés,
nux duʼa kuu,
te ñatu xiniñuʼu xa n‑xiʼí Jesucristu xaxeʼe‑ro.