Jandixa‑ro tnuʼu taʼu tniu Moisés, o jandixa‑ro Jesucristu
3
Ñani‑da kuʼa‑da,
ñayiu Galacia,
¡ñayiu lilu ka kuu‑n!
¿Jundu n‑dandaʼu ñaʼa,
xa ñatu ka jandixa‑n xa kuu xandaa?
Na n‑kachitnuʼu‑da tnuʼu vaʼa Jesucristu,
te n‑kuu ná kuu xa n‑ka xini‑n xiʼin nuu‑n hora n‑ka xatakaa‑s‑ia nuu curuxi.
2 Juini‑da xa kachitnuñaʼa koio‑n.
Xá n‑ka tnɨɨ‑n Espíritu Ianyuux.
¿Nanda n‑kuu?
¿Xaxeʼe xa n‑ka kida‑n ná io ná juaʼan tnuʼu taʼu tniu Moisés?
O xaxeʼe xa n‑ka teku‑n tnuʼu vaʼa Jesucristu te n‑ka jandixa‑n.
3 ¿Ñatu ka kutnuni ini‑n a?
Na n‑ka kixeʼe‑n xa jandixa‑n Jesucristu,
te n‑taxi Ianyuux Espíritu Ii,
ko vitna ka dandoo‑n Espíritu Ii,
xa kada koio‑n ná io ná juaʼan tnuʼu taʼu tniu.
4 Te,
¿ñatu xiniñuʼu xa kueʼe vida n‑ka yaʼa‑n a?
¡Naka vaʼa nuxa xiniñuʼu!
5 Hora taxi Ianyuux Espíritu Ii te kida‑ia milagru nuu ntnaʼa mee‑n,
¿nakuenda duʼa kida‑ia?
¿Xaxeʼe xa ka kida‑n ná io ná juaʼan tnuʼu taʼu tniu Moisés?
O xaxeʼe xa n‑ka teku‑n tnuʼu vaʼa Jesucristu te n‑ka jandixa‑n.
6 N‑jandixa Abraham Ianyuux,
te n‑jaʼan Ianyuux xa ña tuu na kuechi‑s io.
7 Xijan kuu xa,
ndoñuʼu xa jini koio‑n xa ñayiu ndaa ka jandixa Ianyuux,
ñayiu ijan,
ka kuu daʼya dana Abraham.
8 Jaʼan tnuʼu Ianyuux xa xee kɨu jandixa koio ñayiu ña ka kuu ñayiu Israel Ianyuux.
Te mee‑i tuku,
xaxeʼe xa jandixa‑i Ianyuux,
te jaʼan‑ia xa ña tuu na kuechi‑i io.
N‑jaʼan Ianyuux nuu Abraham:
“Xaxeʼe mee‑n,
kuvete xa kuvete koio ñayiu ntdaa ñuu ñuñayiu.”
9 Xaxeʼe xa n‑jandixa Abraham Ianyuux,
te n‑jaʼan Ianyuux xa ña tuu na kuechi‑s io.
Dani ntdaa ñayiu ka jandixa Ianyuux,
jaʼan Ianyuux xa ña tuu na kuechi‑i io.
10 Ñayiu ka xani ini xa kuaʼa‑i xa kada‑i ná io ná juaʼan tnuʼu taʼu tniu Moisés,
kuú koio‑i xiʼin kuechi‑i,
chi jaʼan tnuʼu Ianyuux:
“Ntdaa ñayiu ña ka kida ntdaa,
ná io ná juaʼan tnuʼu taʼu tniu,
kɨu xiʼin kɨu,
kuú koio‑i xiʼin kuechi‑i.”
11 Xijan kuu xa kutnuni ini‑ro xa ni ɨɨn ñayiu ma kuaʼa xa kada‑i ná io ná juaʼan tnuʼu taʼu tniu Moisés,
te dɨuni ma jaʼan Ianyuux xa ña tuu na kuechi‑i io.
Jaʼan tnuʼu Ianyuux:
“Ɨɨn ñayiu,
nux jaʼan Ianyuux xa ña tuu na kuechi‑i io,
te kutuu vaʼa‑i xaxeʼe xa jandixa‑i‑ia.”
12 Ɨɨn ñayiu io confianza xa kuaʼa‑i xa kada‑i ná io ná juaʼan tnuʼu taʼu tniu Moisés,
te kuu ná kuu xa ña ndoñuʼu‑i xa jandixa‑i Ianyuux n‑kuu,
chi jaʼan tnuʼu taʼu tniu Moisés:
“Nux kada ɨɨn ñayiu xaʼa,
te kutuu‑i xaxeʼe xaʼa.”
13 Nux ña kuaʼa‑ro xa kada‑ro ná io ná juaʼan tnuʼu taʼu tniu Moisés,
te kuú‑ro xiʼin kuechi‑ro.
Ko n‑chiyaʼu Cristu kuechi‑ro,
hora n‑xiʼí‑ia xaxeʼe‑ro.
Chi jaʼan tnuʼu Ianyuux:
“Kida uʼu Ianyuux davaʼa nga se n‑takaa nuu yutnu.”
14 N‑xiaʼan Ianyuux tnuʼu‑ia nuu Abraham xa kuvete koio ñayiu ntdaa ñuu ñuñayiu.
Te duʼa kuu.
Xaxeʼe xa n‑xiʼí Jesucristu,
nux jandixa ɨɨn ñayiu mee‑ia,
te jaʼan Ianyuux xa ña tuu na kuechi‑i io.
Te nde ñayiu ña ka kuu ñayiu Israel,
nux jandixa‑i Jesucristu,
te tnɨɨ koio‑i Espíritu Ianyuux,
ná n‑jaʼan‑ia.
N‑taxi Moisés tnuʼu taʼu tniu, n‑taxi Ianyuux tnuʼu mee‑ia
15 Ñani‑da kuʼa‑da,
kani ini koio‑n nanda kuu hora ka kida uu seyɨɨ tratu te kida firmari‑s ɨɨn tutu.
Io xa kada‑s,
nduu‑s,
ná yodotnuni nuu tutu.
Te ni ɨɨn ñayiu ma kuaʼa xa dama‑i xa yodotnuni jan.
16 Ná kuu tutu jan kuu tnuʼu n‑xiaʼan Ianyuux nuu Abraham.
N‑xiaʼan‑ia tnuʼu‑ia nuu Abraham xiʼin daʼya‑s.
Ko ñatu n‑jaʼan Ianyuux “kueʼe daʼya Abraham”,
chi n‑jaʼan‑ia “idini daʼya‑s.”
Te daʼya ijan kuu Cristu.
17 Xaʼa kuu xa jaʼan‑da:
Kiʼna ka n‑xiaʼan Ianyuux tnuʼu‑ia nuu Abraham.
Ijan dada,
nu n‑yaʼa koon cientu oko uxi kuia,
te n‑xiaʼan Moisés tnuʼu taʼu tniu nuu taxaʼnu tnetnu‑ro.
Ko tnuʼu taʼu tniu Moisés,
ña n‑kida xa ñatuka xiniñuʼu tnuʼu n‑xiaʼan Ianyuux nuu Abraham,
chi ni ɨɨn ña dama.
18 N‑xiaʼan Ianyuux tnuʼu‑ia nuu Abraham xa duʼa koo.
Xijan kuu xa ña ndoñuʼu‑ro xa kada‑ro ná io ná juaʼan tnuʼu taʼu tniu Moisés,
xa niʼi‑ro xa taxi Ianyuux,
chi n‑jaʼan‑ia nuu Abraham xa io ɨɨn xa tax duʼa nga‑ia.
19 Xijan kuu xa,
¿nakuenda io tnuʼu taʼu tniu?
N‑xiaʼan Moisés tnuʼu taʼu tniu nuu ñayiu,
xa na kutnuni ini koio‑i xa ka kuu‑i ñayiu ka kida kuechi.
N‑xio tnuʼu taʼu tniu Moisés,
nde n‑kixee se kuu daʼya Abraham nuu se n‑xiaʼan‑ia tnuʼu‑ia.
N‑ka xiaʼan ángel,
ia ka xinokuechi nuu Ianyuux,
tnuʼu taʼu tniu nuu Moisés,
te Moisés n‑xiaʼan tnuʼu jan nuu ñayiu.
20 Ko ni ɨɨn ñayiu ña n‑xo nujuiin meʼñu Abraham xiʼin Ianyuux,
chi Ianyuux,
idini‑ia kuu‑ia.
Tnuʼu taʼu tniu Moisés kandeka ñaʼa jɨʼɨn nuu Cristu
21 ¿Xaʼa juini jaʼan xa tnuʼu taʼu tniu Moisés kida xa ña io vaʼa tnuʼu n‑xiaʼan Ianyuux nuu Abraham?
¡Ñaʼa!
Ñatu n‑kuaʼa tnuʼu taʼu tniu n‑xiaʼan Moisés nuu ñayiu,
xa kutuu vaʼa‑i.
Ña n‑kuaʼa ni ɨɨn ñayiu,
xa kada‑i ná io ná juaʼan tnuʼu taʼu tniu Moisés.
Te dɨuni ña n‑kuaʼa xa jaʼan Ianyuux xa ña tuu na kuechi‑i io.
22 Jaʼan tnuʼu Ianyuux xa ntdaa ñayiu ñuñayiu io kuechi‑i.
Kuu ná kuu xa yɨndiʼu‑i vekaa xaxeʼe kuechi ka kida‑i.
Xaʼa kuu xa jandixa koio‑i Jesucristu.
Ntdaa ñayiu ka jandixa Jesucristu,
tnɨɨ koio‑i xa n‑jaʼan Ianyuux xa juñaʼa‑ia.
23 Antecas xa tnɨɨ‑ro tnuʼu vaʼa Jesucristu,
n‑ka kuu‑ro ná kuu ñayiu yɨndiʼu vekaa.
Xaxeʼe tnuʼu taʼu tniu Moisés,
n‑yɨndiʼu‑ro nde n‑kixee Jesucristu.
24 Ná kuu ɨɨn ñá xinokuechi ñunuu daʼya‑da,
n‑kuu tnuʼu taʼu tniu Moisés kandeka ñaʼa jɨʼɨn nuu Cristu.
Xá jandixa‑ro Cristu,
te jaʼan Ianyuux xa ña tuu na kuechi‑ro io.
25 Xá n‑kixee Jesucristu,
te ma kundeka ñaʼa ka tnuʼu taʼu tniu Moisés.
26 Ntdaa‑n n‑ka nduu daʼya Ianyuux,
xaxeʼe xa ka jandixa‑n Jesucristu.
27 Xá n‑ka najuendute‑n xaxeʼe,
xa ka kunduu‑n xiʼin Cristu.
Kuu ná kuu xa dandukutu ñaʼa Jesucristu daʼma xee.
28 Ntdaa‑n,
ɨɨn nuu n‑ka nduu‑n.
Ma jaʼan‑ro xa ɨɨn‑n n‑kaku se Israel,
te ɨnka‑n ña n‑kaku se Israel.
Ma jaʼan‑ro xa ɨɨn‑n n‑kaku libre,
te ɨnka‑n n‑kuu se kidatniu duʼa nuu ɨnka ñayiu.
Ma chinuu ka‑ro xa ɨɨn‑n kuu ñadɨʼɨ,
te ɨnka‑n kuu seyɨɨ.
Ntdaa‑n ka kuu ɨɨn nuu nuu Ianyuux,
xaxeʼe xa ka jandixa‑n Jesucristu.
29 Xaxeʼe xa ka kunduu‑n xiʼin Cristu,
n‑ka nduu‑n daʼya Abraham,
te xijan kuu xa tnɨɨ koio mee‑n ntdaa xa n‑jaʼan Ianyuux xa juñaʼa‑ia nuu Abraham.