4
Xaʼa kuu xa jaʼan‑da:
Ɨɨn seluchi,
juini na tnɨɨ‑s ntdaa xa juñaʼa taa‑s,
ko nɨni kuu‑sɨ seluchi,
ɨɨn nuu kuu‑s xiʼin se ka xinokuechi nuu taa‑s.
Ntdaa kuu xaxii‑s,
ko ta kuaʼa ka‑s xa tnɨɨ‑s ni ɨɨn.
2 Te se xinokuechi nuu taa‑s xñunuu seluchi jan,
te xnevaʼa‑s xaxii‑s,
nde na kueʼnu‑sɨ xa nakueka‑sɨ xaxii‑s.
3 Mee‑ro du.
N‑ka kida‑ro ntdaa xa n‑ka taʼu tniu taxaʼnu tnetnu‑ro,
ntdaa xa ka kida ñayiu ñuñayiu.
N‑ka kuu‑ro ná kuu sekuechi,
o se kidatniu duʼa nuu ɨnka ñayiu.
4 Ko nu n‑xee kɨu vii kɨu vaʼa,
te n‑tundaʼa Ianyuux Daʼya Yɨɨ‑ia ñuñayiu.
N‑ñuʼu‑ia xiti ɨɨn ñadɨʼɨ.
N‑kaku‑ia ñuu Israel,
te n‑kida‑ia ná io ná juaʼan tnuʼu taʼu tniu Moisés.
5 N‑kixi‑ia xa chiyaʼu‑ia kuechi mee‑ro,
xaxeʼe xa ña n‑kuaʼa‑ro xa kada‑ro ná io ná juaʼan tnuʼu taʼu tniu.
Te duʼa,
n‑ndadadaʼya ñaʼa Ianyuux mee‑ro.
6 Te xá dandeʼa ñaʼa Ianyuux mee‑ro xa n‑nduu‑ro daʼya‑ia.
N‑tundaʼa‑ia Espíritu Daʼya Yɨɨ‑ia,
xa kutuu‑ia anu‑ro.
Te ijan kana‑ia:
“¡Taa‑da,
Taa Mani‑da!”
7 Xijan kuu xa,
ñatuka kuu‑n ɨɨn se kidatniu duʼa nuu tnuʼu taʼu tniu,
chi kuu‑n ɨɨn daʼya Ianyuux.
Te xaxeʼe xa kuu‑n daʼya Ianyuux,
te tnɨɨ‑n ntdaa xa taxi‑ia,
chi n‑kida Cristu xa duʼa koo.
Ndu ini‑da xaxeʼe‑n
8 Antecas xa jandixa koio‑n Ianyuux,
ñayiu n‑ka xo xinokuechi duʼa nuu santu n‑ka kuu‑n.
Te ñatu kuu santu Ianyuux Ndito.
9 Ko vitna ka kunduu‑n xiʼin Ianyuux,
o vaʼa ka xa jaʼan‑ro,
kunduu Ianyuux xiʼin mee‑n.
¿Nakuenda ka juini‑n xa dandoo‑n Ianyuux Ndito,
xa jandixa‑n ɨɨn tnuʼu taʼu tniu,
ɨɨn xa ña ndaku,
ɨɨn xa ña ndaa?
Ɨnka vuelta ka kuu‑n ñayiu ka xinokuechi nuu ɨɨn xa ñatu xiniñuʼu.
10 Ka jaʼan‑n xa io xa ndadakaʼnu‑n viko ñayiu,
xiʼin xa xetniu ñayiu.
Viko kɨu,
viko yoo,
viko kuia,
viko dandeé‑n tata,
te viko xa ka xaxi ka xiʼi‑n.
11 Yuʼu‑da,
xa ñatu xiniñuʼu xa n‑jaʼan‑da tnuʼu vaʼa Jesucristu nuu‑n.
12 Ñani‑da kuʼa‑da,
xijan‑da nuu mee‑n xa nduu‑n ná kuu mee‑da,
chi n‑nduu mee‑da ná n‑ka xo kuu mee‑n.
Na n‑xo tuu‑da xiʼin‑n,
ñatu n‑ka kida ñaʼa‑n ni ɨɨn xa uʼu.
13 Ka xini‑n xa kiʼna nuu n‑xo tuu‑da xiʼin‑n xaxeʼe xa n‑kuʼu‑da,
te n‑jaʼan‑da tnuʼu vaʼa Jesucristu nuu‑n.
14 Juini xa n‑xio xa kundee ini koio‑n xa yo n‑kuʼu‑da,
ko ña n‑ka kuyichi ini ñaʼa‑n,
te ña n‑ka jaʼan‑n xa ma xe ini ñaʼa‑n.
N‑ka xeka vaʼa ñaʼa‑n,
kuenda kuu‑da ɨɨn ángel Ianyuux,
o mee Jesucristu n‑kuu‑da.
15 ¿Te vitna naxa n‑kuu?
¿Nakuenda kuu xa ñayo ka‑n ka kuvete?
Jaʼan ndaa‑da xaxeʼe‑n,
xa nux n‑kuaʼa koio‑n xa tava‑n nduchi nuu‑n xa taa‑n,
te kada‑n n‑kuu.
16 Te vitna,
xaxeʼe xa jaʼan‑da xa kuu xandaa,
¿te xijan ka xani ini‑n xa kuu‑da se xini uʼu tnaʼa xiʼin‑n a?
17 Se ka dandaʼu ñaʼa mee‑n,
ka juini‑s xa kada‑s xa dandoo ñaʼa koio‑n mee‑da,
xa kunduu koio‑n xiʼin mee‑s.
18 Maxku kani ini‑n xa kukuedi ini‑da.
Ñaʼa.
Naka vaʼa xa juini ñayiu xa chindee ñaʼa‑i mee‑n.
Hora tuu‑da xiʼin‑n,
o hora ña yoo‑da xiʼin‑n.
Ko io xa chindee ñaʼa‑i,
io xa dakuaʼa ñaʼa‑i xa kuu xandaa.
Se yaʼa,
ka dandaʼu ñaʼa‑s.
19 Daʼya‑da ka kuu‑n.
Kueʼe vida yaʼa‑da xaxeʼe‑n.
Ná kuu ñadɨʼɨ hora kaku daʼya‑ña kuu‑da,
chi juini‑da xa xee koio‑n xa kunduu vaʼa koio‑n xiʼin Cristu.
20 Naka vaʼa nux kutuu mee‑da xiʼin‑n vitna,
xa ndatnuʼu‑ro ntdaa‑ro.
Chi ndu ini‑da xaxeʼe‑n,
ñatu kutnuni ini‑da nax ka kida‑n.
Agar xiʼin Sara
21 ¿Xandaa kuu xa ka juini‑n xa kada koio‑n ná io ná juaʼan tnuʼu taʼu tniu Moisés?
¿Ñatu n‑ka teku‑n xa jaʼan tnuʼu taʼu tniu a?
22 Jaʼan xa n‑xio uu daʼya Abraham:
ɨɨn‑s kuu daʼya ɨɨn ñadɨʼɨ xinokuechi duʼa nuu ñadɨʼɨ Abraham,
te ɨnka‑s kuu daʼya mee ñadɨʼɨ‑s.
23 Daʼya ñadɨʼɨ mee Abraham,
n‑kaku‑s xaxeʼe xa n‑xiaʼan Ianyuux tnuʼu‑ia nuu Abraham xa koo daʼya ñadɨʼɨ‑s.
Daʼya ɨnka ñadɨʼɨ jan xiʼin Abraham,
n‑kaku‑s ná kaku davaʼa nga ñayiu.
24 Xaʼa kuu ɨɨn xa dandeʼa ñaʼa Ianyuux nuu mee‑ro.
Agar xiʼin Sara kuu ná kuu uu tutu legal.
Nani kuu tnuʼu taʼu tniu n‑tnɨɨ Moisés yuku nani Sinaí,
duʼa kuu Agar.
Daʼya mee‑i ka kuu ñayiu ka kidatniu duʼa nuu ɨnka ñayiu.
25 Ná kuu Yuku Sinaí io do Arabia kuu Agar,
te ná kuu Agar kuu ñuu Jerusalén.
Chi ná kuu ñayiu kidatniu duʼa nuu ɨnka ñayiu ka kuu ñayiu Israel,
chi ka kidatniu‑i xa kada koio‑i ná io ná juaʼan tnuʼu taʼu tniu n‑tnɨɨ Moisés.
26 Ko io ɨnka Jerusalén,
Jerusalén io andɨu kuu.
Ná kuu Sara kuu Jerusalén io andɨu.
Daʼya mee‑ña kuu mee‑ro,
te io libre‑ro.
27 Jaʼan tnuʼu Ianyuux:
Ndoʼo,
ñadɨʼɨ ña yoo daʼya,
io xa kudɨ ini‑n.
Juini ñayo daʼya‑n n‑kaku xa tna uʼu‑n,
ko kana‑n.
Kana‑n xaxeʼe xa kudɨ ini‑n.
Juini ñayo yɨɨ‑n io,
ko kudɨ ini‑n,
chi koo koio kueʼe ka daʼya mee‑n dada ñadɨʼɨ n‑tnundaʼa.
28 Ñani‑da kuʼa‑da,
xijan kuu xa kuu mee‑ro ná kuu Isaac,
daʼya Sara.
N‑xiaʼan Ianyuux tnuʼu‑ia nuu Abraham xa koo koio kueʼe xa kueʼe daʼya‑s,
te daʼya ijan kuu mee‑ro.
29 Isaac,
daʼya ñadɨʼɨ mee Abraham,
n‑kaku‑sɨ xaxeʼe xa n‑kidatniu Espíritu Ianyuux.
Te daʼya ɨnka ñadɨʼɨ xiʼin Abraham,
n‑xini uʼu‑s Isaac.
Te dani kuu vitna.
30 ¿Te nax jaʼan tnuʼu Ianyuux?
“Kineʼe‑n Agar xiʼin daʼya‑i,
chi ma tnɨɨ daʼya Agar xaxii Abraham.
Xaxii Abraham tnɨɨ daʼya Sara.”
31 Ñani‑da kuʼa‑da,
ñayo‑ro kuu daʼya Agar.
Ka kuu‑ro daʼya Sara.