Ñayiu libre ka kuu‑n
5
Xaxeʼe xa jandixa‑ro Cristu,
te jaʼan Ianyuux xa kuu ná kuu xa ña tuu na kuechi‑ro.
Xijan kuu xa kundee ini koio‑n,
xa jandixa naʼi ka‑n Jesucristu.
Maxku juejoon‑n xa kadajuexa ñaʼa koio‑s,
xa kada koio‑n ná io ná juaʼan tnuʼu taʼu tniu Moisés.
2 Kunini koio‑n.
Mee‑da,
Spalu,
jaʼan‑da nuu‑n.
Nux juejoon‑n xa kadajuexa ñaʼa‑s xa kaʼnde‑n nuu ii‑n,
te xijan juini kachi xa ñatu xiniñuʼu xa n‑xiʼí Cristu xaxeʼe‑n.
3 Jaʼan‑da ɨnka vuelta.
Ɨɨn seyɨɨ,
nux juejoon‑s xa kaʼnde koio‑s nuu ii‑s,
te xijan kuu xa ndoñuʼu‑sɨ xa kada‑s ná io ná juaʼan ntdantuʼu tnuʼu taʼu tniu Moisés.
4 Ka xani ini‑n xa kada koio‑n ná io ná juaʼan tnuʼu taʼu tniu Moisés.
Ka xani ini‑n xa nux duʼa kada koio‑n,
te jaʼan Ianyuux xa ña tuu na kuechi‑n io.
Xá n‑ka dandoo‑n Jesucristu,
xá n‑ka xande ini‑n xamani Ianyuux.
5 Ko mee‑ro,
xaxeʼe xa kidatniu Espíritu Ianyuux anu‑ro te jandixa‑ro Jesucristu,
xndetu kuee‑ro xa jaʼan Ianyuux xa ña tuu na kuechi‑ro.
6 Ñayiu kunduu xiʼin Cristu kuu‑ro.
¿Nuu se Israel n‑kaku‑n,
te n‑xaʼnde taa‑n nuu ii‑n?
Vatuka.
¿Nuu se ña ka kuu se Israel n‑kaku‑n,
te ña n‑xaʼnde taa‑n nuu ii‑n?
Vatuka tuku.
Xa ndoñuʼu kuu xa jandixa‑ro Jesucristu.
Te xaxeʼe xa jandixa‑ro Jesucristu,
io xa juemani‑ro Ianyuux xiʼin ñayiu.
7 Vaʼa n‑ka kixeʼe‑n xa jandixa koio‑n Jesucristu.
¿Jundu n‑dajaʼan ñaʼa,
xa ñatuka ka jandixa‑n xa kuu xandaa?
8 Ña n‑tundaʼa Ianyuux se ka dandaʼu ñaʼa.
Chi jaʼan ñaʼa Ianyuux xa kunduu koio‑n xiʼin Jesucristu.
9 Tnuʼu se ijan kuu ná kuu itaʼu ni ndɨdɨ́.
Te maxku ndunaa koio‑n xa jaʼan‑ro xa “itaʼu ni ndɨdɨ́ dandaa yuxa tila.”
10 Xaxeʼe xa io‑da confianza nuu Xtoʼo‑ro Jesucristu,
te io‑da confianza nuu mee‑n,
xa ma juejoon koio‑n xa kadajuexa ñaʼa ka‑s.
Ko kada uʼu Ianyuux se ka daka niʼna ñaʼa,
juini ndese kuu‑s.
11 Ñani‑da kuʼa‑da,
ka xini‑n xa se Israel,
ña kuaʼa‑sɨ xa jandixa‑s xa n‑chiyaʼu Jesucristu kuechi‑ro na n‑xiʼí‑ia nuu curuxi.
Xijan kuu xa nux juña tnuʼu‑da nuu se ka jandixa Jesucristu xa io xa kaʼnde koio‑s nuu ii‑s,
te ma jini uʼu ñaʼa ka se Israel mee‑da n‑kuu.
12 Se ka daka niʼna ñaʼa mee‑n,
¡Naka vaʼa nux kaʼnde koio‑s mee‑s n‑kuu!
13 Ñani‑da kuʼa‑da,
xa n‑jaʼan ñaʼa Ianyuux mee‑n,
xa kunduu koio‑n xiʼin Jesucristu.
Xaxeʼe xa jandixa‑n Jesucristu,
te jaʼan Ianyuux xa ña tuu na kuechi‑n io.
Ko maxku kani ini koio‑n xa kuaʼa‑n xa kada‑n davaʼa nga xa juini‑n.
Io xa juemani tnaʼa‑n,
te chindee tnaʼa‑n,
ɨɨn‑n nuu ɨnka‑n.
14 Nuxa xemani tnaʼa‑n,
ka kida‑n xa jaʼan tnuʼu taʼu tniu,
chi jaʼan tnuʼu taʼu tniu Ianyuux:
“Nani xemani‑n mee‑n,
dani io xa juemani‑n ɨnka ñayiu.”
15 Koo koio‑n cuedado xa maxku kax tnaʼa‑n.
Maxku jantnaʼa‑n,
maxku jini uʼu tnaʼa‑n,
chi duʼa koo xa danaa tnaʼa‑n.
Io xa kada koio‑n xa juini Espíritu Ianyuux
16 Xaʼa kuu xa jaʼan‑da:
Kada koio‑n xa juini Espíritu Ianyuux.
Te maxku kada‑n xa ka kukajan ini mee‑n.
17 Antecas xa kixeʼe‑ro xa kunduu‑ro xiʼin Ianyuux,
te n‑kida‑ro davaʼa nga xa n‑juini‑ro,
ko vitna io xa kada‑ro xa juini Espíritu Ianyuux.
Kuu ná kuu xa jantnaʼa xa juini mee‑ro xiʼin xa juini Espíritu Ianyuux,
te xijan kuu xa ña kuaʼa‑n xa kada‑n ntdaa xa ka kukajan ini‑n.
18 Nux kada‑n xa juini Espíritu Ianyuux,
te ma kada tnuʼu taʼu tniu Moisés xa dakuido datau‑n anu‑n.
19 Vaʼa ka xini‑n xa kukajan ini ñayiu.
Ka kidi‑i xiʼin ñayiu ña n‑tnundaʼa xiʼin‑i,
ka kida‑i xa ñatu kuu xavaʼa,
ka kida‑i davaʼa nga xa ka juini‑i,
ña ka kunxaʼnu‑i.
20 Ka ndadakaʼnu‑i santu ñatu kuu Ianyuux Ndito,
te ka chibruju tnaʼa‑i.
Ka xini uʼu tnaʼa‑i,
te kida‑i pletu.
Kukuedi ini‑i,
te yachi kiti ini‑i.
Kida‑i xavaʼa mee‑i,
te jantnaʼa tnuʼu‑i.
21 Kukajan ini‑i xaxii ɨnka ñayiu,
te xaʼni‑i ndɨyɨ.
Ñayiu xini ka kuu‑i,
te ndeʼe ka xaxi‑i,
xa kudɨ ini koio‑i.
Te kueʼe ka ɨnka xa ka kida‑i.
Nani xá n‑jaʼan‑da,
jaʼan‑da vitna.
Ñayiu ka kida xaʼa,
ma xee‑i xa kutuu‑i nuu taxnuni Ianyuux.
22 Ko nux juejoon ɨɨn ñayiu xa taxnuni Espíritu Ianyuux anu‑i,
te kada‑ia xa ku kuu‑i ná kuu ɨɨn yutnu juun xavidi vaʼa.
Kada‑ia xa juemani‑i ñayiu,
te kuvete‑i,
te kutuu mani‑i xiʼin ñayiu.
Kada‑ia xa kundetu kuee anu‑i,
te ku kuu‑i ñayiu vaʼa.
Kada‑ia xa chindee‑i ñayiu,
te jandixa naʼi ka‑i Ianyuux.
23 Kada‑ia xa ma kuxee ini‑i,
te kada‑ia xa kada maxu‑i mee‑i,
xa ma kada ka‑i xa uʼu.
Nux juejoon‑i xa taxnuni Espíritu Ianyuux anu‑i,
te ma kada ni ɨɨn tnuʼu taʼu tniu xa dakuido datau‑i anu‑i.
24 Ɨɨn ñayiu kunduu xiʼin Cristu,
kuu ná kuu xa n‑xiʼí‑i,
xa ma kada ka‑i xa juini mee‑i.
25 Nux tuu‑ro xiʼin Espíritu Ianyuux,
na juejoon‑ro xa taxnuni‑ia anu‑ro,
xa kada‑ro xa juini mee‑ia.
26 Maxku najuen tnuʼu‑ro mee‑ro,
xa dakiti ini nuu tnaʼa‑ro,
ni maxku kukuedi ini nuu tnaʼa‑ro.