Chindee tnaʼa‑n, ɨɨn‑n xiʼin ɨnka‑n
6
Ñani‑da kuʼa‑da,
xtuu‑n xiʼin Espíritu Ianyuux.
Nuxa ka xini‑n xa ñani‑n kuʼa‑n kida kuechi,
io xa chindee‑n‑yɨ xa najani ini‑i kuechi‑i.
Xiʼin xa xemani‑n‑yɨ,
chindee‑n‑yɨ.
Te koo koio‑n cuedado,
nada juejoon mee‑n tuku xa kadatniu kuiʼna anu‑n.
2 Xa juini kuiʼna xa kadajuexa ñaʼa‑i mee‑ro xa kada‑ro kuechi,
kuu ná kuu xa ndido‑ro ɨɨn xa vee.
Io xa chindee tnaʼa‑ro,
te duʼa kada‑ro ná io ná juaʼan tnuʼu taʼu tniu Cristu jaʼan xa io xa juemani tnaʼa‑ro.
3 Te nux ɨɨn‑n xani ini xa vaʼa ka mee‑n dada ñani‑n kuʼa‑n,
dani dandaʼu‑n mee‑n.
4 Kototnuni koio‑n,
ɨɨn ɨɨn‑n,
nax kida mee‑n.
Nuxa xini‑n xa kida‑n xavaʼa,
vatuka.
Ko maxku jaʼan‑n xa vaʼa ka mee‑n dada ɨnka ñayiu.
5 Ɨɨn ɨɨn‑ro,
io xa kada‑ro xa juini Ianyuux xa kada‑ro.
6 Nux ɨɨn ñayiu dakuaʼa ñaʼa tnuʼu vaʼa Jesucristu,
te juñaʼa‑n ntdaa xa ndoñuʼu‑i.
7 Maxku dandaʼu koio‑n mee‑n.
Ni ɨɨn ñayiu,
ma kuaʼa xa kuekundee‑i Ianyuux.
Xa kida‑ro ñuñayiu,
kuu ná kuu xa xajan‑ro trɨu.
Xajan‑ro xavaʼa,
te nakueka‑ro xavaʼa.
8 Ɨɨn ñayiu,
nux kada‑i davaʼa nga xa kukajan ini‑i,
te kueʼe vida yaʼa‑i,
vitna xiʼin kuia ma jɨn ndɨʼɨ.
Ko nux kada‑i xa juini Espíritu Ianyuux,
te kada Espíritu Ianyuux xa kutuu vaʼa‑i vitna,
te kutuu vaʼa‑i andɨu kuia ma jɨn ndɨʼɨ.
9 Xijan kuu xa maxku ku xiau‑ro ni maxku natu ini‑ro xa kida‑ro xavaʼa,
te dada tnɨɨ‑ro ntdaa xa taxi Ianyuux.
10 Xijan kuu xa,
nɨni kuaʼa‑ro,
na kada‑ro xavaʼa nuu ntdaa ñayiu.
Te na koo‑ro cuedado xa kada‑ro xavaʼa nuu ñani‑ro kuʼa‑ro ka jandixa Jesucristu.
Xanyuux nuu‑n
11 Kundeʼa koio‑n xa xiʼin ndaʼa mee‑da kidavaʼa‑da nuu‑n vitna.
Letra naʼnu kidavaʼa‑da vitna.
12 Se ka juini xa kadajuexa ñaʼa‑sɨ xa kaʼnde koio‑n nuu ii‑n,
diko ni ka kida‑sɨ xa kendoo vaʼa‑s nuu ñayiu.
Ka yuʼu‑s xa jini uʼu ñayiu Israel mee‑s,
xaxeʼe xa ka jandixa mee‑n Cristu,
Ia n‑xiʼí nuu curuxi.
13 Ko mee‑s,
juini xá n‑ka taʼnde nuu ii‑s,
ko ña ka kida‑s ná io ná juaʼan ntdaa tnuʼu taʼu tniu Moisés.
Ka juini‑s xa najuen tnuʼu‑s mee‑s,
xaxeʼe xa n‑kidajuexa ñaʼa‑s xa kunetnuni koio‑n.
14 Ko mee‑da,
nux jaʼan vaʼa‑da,
jaʼan vaʼa‑da xaxeʼe curuxi nuu n‑xiʼí Xtoʼo‑ro Jesucristu.
Xaxeʼe xa jandixa‑da Jesucristu,
kuu ná kuu xa n‑xiʼí‑da,
te ñatuka chinuu‑da xa io ñuñayiu.
15 Ka kunduu‑ro xiʼin Jesucristu.
Xijan kuu xa ñatu xiniñuʼu nuxa n‑taʼnde nuu ii‑ro,
a ñaʼa.
Xa xiniñuʼu,
kuu xa n‑nduu‑ro ñayiu xee,
xaxeʼe xa jandixa‑ro Jesucristu.
16 Ntdaa ñayiu ka kida ná io ná juaʼan tnuʼu yaʼa,
na kundau ini Ianyuux mee‑i,
te na kada‑ia xa kutuu vaʼa koio‑i.
Duʼa na koo nuu ntdaa ñayiu ndaa jandixa Ianyuux.
17 Nde vitna xiʼin ntdaa kɨu,
maxku datnañaʼa ka ni ɨɨn ñayiu mee‑da.
Chi menga xa neʼe doʼo ñɨɨ‑da,
xaxeʼe xa kuu‑da se xinokuechi nuu Xtoʼo‑ro Jesucristu.
18 Ñani‑da kuʼa‑da,
na taxi Xtoʼo‑ro Jesucristu xamani‑ia nuu‑n,
ntdaa‑n.
Duʼa na koo.