Carta n‑tundaʼa Spalu nuu ñayiu Éfeso
Ndajan tnuʼu Spalu ñayiu ka kukanu ini Jesucristu xndaxio Éfeso
1
Daña Spalu,
se n‑tundaʼa ñaʼa Cristu Jesús xa dakuaʼa‑da ñayiu,
tundaʼa‑da carta yaʼa juan xee nuu ndixi xa n‑kida Ianyuux xa n‑ka nduu‑n ñayiu ii,
te xndaxio‑n Éfeso,
te ka kukanu ini‑n Cristu Jesús.
N‑tundaʼa ñaʼa‑ia chi daa n‑ñu ini Ianyuux xa koo.
2 Xijan taʼu‑da nuu Taa‑ro Ianyuux xiʼin nuu Jesucristu xa na chindee chituu ñaʼa‑ia.
Xijan taʼu‑da nuu‑ia xa na kada‑ia xa na ku kundaa ku kuvatu anu koio‑n chi n‑ka natu ini‑n xa n‑ka kida‑n kuechi.
Kueʼe xavaʼa kida Ianyuux ñayiu ka kukanu ini Jesucristu
3 Na ndadakaʼnu‑ro Taa‑ro Ianyuux,
Ia kuu Taa Jesucristu.
Dɨuni kuu‑ia Ianyuux‑ia.
Xtoʼo‑ro kuu Jesucristu.
Kueʼe xavaʼa kida ñaʼa Ianyuux.
Kida‑ia xa xee‑ro ku kuu‑ro ñayiu vaʼa ka,
te kutuu‑ro xiʼin‑ia andɨu.
Xaxeʼe xa kunduu‑ro xiʼin Cristu,
daa kida ñaʼa‑ia.
4 N‑kaxi ñaʼa‑ia xa ku kuu‑ro daʼya‑ia,
te n‑kida‑ia xa n‑nduu‑ro ñayiu ii.
Naka vaʼa‑ia.
Dɨuni n‑kida‑ia xa n‑nduu‑ro ñayiu ñatuka xndido xtau kuechi‑i.
Na ta nkavatuu ka ñuñayiu,
n‑kaxi ñaʼa‑ia.
Xaxeʼe xa xemani ñaʼa‑ia n‑kaxi ñaʼa‑ia.
5 Xa daa nga n‑xo ñu ini‑ia xa ndudaʼya ñaʼa‑ia,
te n‑ndudaʼya ñaʼa‑ia.
Daa n‑ñu ini‑ia xa kada‑ia chi daa n‑juini‑ia,
te tna ini‑ia xijan.
Dɨuni xa daa nga n‑xo ñu ini‑ia xa kada Jesucristu ɨɨn xa kada‑ia na kuaʼa nduu koio‑ro daʼya‑ia.
Xijan kuu xa n‑ndudaʼya ñaʼa‑ia.
6 Xaxeʼe xa n‑kida Cristu,
Ia mani juini‑ia,
xa n‑kida‑ia,
ntdaa xijan n‑kida Ianyuux.
Na jaʼan koio‑ro,
“Naka kueʼe xavaʼa n‑kida ñaʼa‑ia.
Naka vaʼa‑ia.”
Xijan n‑kida ñaʼa‑ia xa na ndadakaʼnu‑ro‑ia.
7 N‑xatu nɨñɨ Cristu xa n‑chiyaʼu‑ia kuechi‑ro,
te n‑taxkanu ini Ianyuux kuechi n‑ka‑kida‑ro.
Ña tuu nax jeyaʼu‑ia xa daa n‑kida‑ia.
Naka kueʼe xavaʼa n‑kida ñaʼa‑ia.
8 Xaxeʼe xa yo vaʼa‑ia,
n‑kida‑ia xa ku kuu‑ro ñayiu kaxi ini,
te vaʼa xini‑ro nax kuu xa n‑kida‑ia.
9 Vitna n‑kida‑ia xa n‑xini‑ro xa n‑xo ñu ini‑ia xa yaʼa.
Yaʼa ɨɨn xa ñayo uun n‑xo xini,
chi mee ni‑ia n‑xo naʼa xijan.
Vitna dada n‑datuu‑ia xijan nuu‑ro.
Xa daa nga n‑ñu ini‑ia xa kada‑ia xaʼa chi daa n‑juini‑ia xa yaʼa.
10 N‑ñu ini‑ia xa nkonetniu Cristu.
Kɨu n‑ñu ini‑ia xa nkonetniu‑ia,
kɨu ijan n‑xe konetniu‑ia.
N‑ñu ini‑ia xa taxnuni Cristu nuu ntdaa ñayiu xiʼin nuu ntdaa ángel xiʼin nuu xaloko.
11 Xaxeʼe xa kunduu‑ro xiʼin Cristu ku kuu‑ro taʼu Ianyuux.
Xa daa nga n‑kaxi ñaʼa Ianyuux xa ku kuu‑ro taʼu‑ia.
Xa daa nga n‑ñu ini‑ia xa duʼa yaʼa.
Mee‑ia kida xa yaʼa ntdaa xa n‑xio xa yaʼa;
koo ntdaa xa ñu ini‑ia xa koo.
12 Kiʼna ka daña n‑ka kukanu ini Cristu,
ijan dada n‑ka kukanu ini ndixi‑ia.
Ntdaa‑ro,
nani daña,
dani ndixi,
xñu ini xa ndixi‑ia,
te ku kuu‑ro taʼu Ianyuux.
N‑ñu ini‑ia xa ku kuu‑ro taʼu‑ia,
te ndadakaʼnu‑ro‑ia.
13 N‑kida Cristu xa n‑ka teku‑n nax io xa kada koio‑n xa nanitaʼu‑n.
Ɨɨn xandaa kuu xijan.
N‑keé Espíritu Ianyuux anu‑n xaxeʼe xa n‑ka kukanu ini‑n Cristu.
N‑taxi Ianyuux tnuʼu‑ia xa taxi‑ia Espíritu‑ia.
Kuenda kɨu ɨɨn sellu kuu Espíritu‑ia,
te kuenda kɨu ɨɨn nuu ndenee sellu jan ka kuu‑n.
14 Xa na kunaʼa‑ro xa niʼi‑ro taʼu‑ro n‑taxi Ianyuux Espíritu‑ia.
N‑chiyaʼu Cristu kuechi‑ro xa na kuaʼa kaku‑ro.
Xa na ndadakaʼnu koio‑ro‑ia daa n‑kida‑ia.
Xijan taʼu Spalu nuu Ianyuux xa na juñaʼa‑ia xa xaxtnuni ñayiu ka kukanu ini Jesucristu
15-16 N‑teku‑da xa ka kukanu ini naʼi‑n Jesús,
Ia kuu Xtoʼo‑ro.
Dɨuni n‑teku‑da xa yo ka xemani‑n dava ka ñayiu n‑kida Ianyuux xa n‑ka nduu‑i ñayiu ii.
Xijan kuu xa hora xijan taʼu‑da nuu Ianyuux,
najaʼan ñaʼa‑da,
te kɨu xiʼin kɨu xiaʼan‑da nuu‑ia xa n‑kutaʼu‑da xaxeʼe xa n‑ka kukanu ini‑n Cristu.
17 Xijan taʼu‑da nuu Taa‑ro Ianyuux,
Ia tuu andɨu,
Ia kuu Taa Xtoʼo‑ro Jesucristu,
xa na taxi‑ia xa xaxtnuni xa na kutnuni ini koio‑n jundu kuu Ianyuux.
Dɨuni xijan taʼu‑da nuu‑ia xa na kada‑ia xa na jini‑n nax kuu xa n‑jaʼan‑ia na kuaʼa na jini ndaa jini kuiti‑n jundu kuu‑ia.
18 Xijan taʼu‑da nuu‑ia xa na jini‑n nakuenda n‑kida‑ia xa n‑ka teku koio‑n tnuʼu‑ia.
Xa na kuaʼa na jun ini‑n xa ndixi‑ia,
n‑kida‑ia xa n‑ka teku koio‑n tnuʼu‑ia.
Dɨuni xijan taʼu‑da nuu‑ia xa maxku ndunaa‑n xa ku kuu‑ro taʼu‑ia.
Ndandɨʼɨ‑ro nuu‑ia xa ka kuu‑ro ñayiu n‑kida‑ia xa n‑ka nduu‑ro ñayiu ii,
te ku kuu‑ro ñayiu yo ndandɨʼɨ.
19 Dɨuni xijan taʼu‑da nuu‑ia xa maxku ndunaa‑n xa yo kidatniu‑ia anu roo,
ñayiu ka kukanu ini‑ia xa na kuaʼa na ku kuu‑ro ñayiu vaʼa.
Naka kueʼe xa kida‑ia.
Naka kidatniu‑ia anu‑ro.
20 N‑kida‑ia xa n‑nandoto Cristu te n‑xantuu‑ia‑ia diñi kuaʼa‑ia andɨu xa taxnuni‑ia
21 nuu ntdandituʼu ñayiu xiʼin nuu ntdandituʼu se ka taxnuni ñuñayiu,
nuu xaloko xiʼin nuu ángel‑yɨ,
nuu ángel xtuu andɨu du.
Ñayo xee ñaʼa.
Taxnuni‑ia vitna,
te dani taxnuni‑ia nɨkava nɨkuita.
22 Junukuechi ntdaa ñayiu,
ntdaa ángel,
ntdaa xaloko du nuu‑ia.
Dani roo,
ñayiu ka kukanu ini‑ia,
n‑kida Ianyuux xa taxnuni‑ia nuu ntdandituʼu roo.
Kuenda kɨu dɨkɨ ntdandituʼu‑ro kuu‑ia.
23 Kuenda kɨu yɨkɨ kuñu‑ia ka kuu‑ro.
N‑keé‑ia anu‑ro te ñuʼu ñaʼa‑ia ntdaa‑ro,
te ka kuu‑ro ná kuu‑ia.