Xaxeʼe xa n‑kundaʼu ini ñaʼa Ianyuux dananitaʼu ñaʼa‑ia
2
N‑ka xo kida‑n kueʼe kuechi na ta jandixa ka‑n Ianyuux.
Kuenda kɨu ndɨyɨ n‑ka xo kuu‑n chi ñatu n‑ka kutnuni ini‑n jundu kuu‑ia.
2 Daa n‑ka xo kida‑n xaloko xaduʼa ná ka kida ñayiu ñatu ka jandixa Ianyuux.
N‑ka xo kida‑n xa n‑xo taʼu tniu Kuiʼna.
Taxnuni Kuiʼna nuu dava ka xaloko,
te kidatniu‑i anu ñayiu ka kuxe ini nuu Ianyuux.
3 Ntdaa‑ro n‑ka kida ná ka kida ñayiu ka kuxe ini jan.
Nandɨkaa nandituʼu kuechi n‑ka xo kida‑ro xa n‑ka xo kida‑ro xa juini mee‑ro.
N‑ka xo kida‑ro ntdandituʼu kuechi n‑ka kuu ini‑ro xa kada‑ro chi daa vaa‑ro ñuñayiu.
N‑ka kida‑ro davaʼa nga xaloko n‑kixdɨkɨ‑ro xa kada‑ro.
Daa n‑xo kiti ini Ianyuux nuu‑ro ná kiti ini‑ia nuu dava ka ñayiu ka kuxe ini nuu‑ia,
te kada uʼu ñaʼa‑ia n‑kuu.
4-5 Kuenda kɨu ndɨyɨ n‑ka kuu‑ro xaxeʼe xa ñatu n‑kuaʼa‑ro xa kada‑ro xavaʼa;
te n‑ka xo kida‑ro kuechi.
Kuenda kɨu ndɨyɨ n‑ka kuu‑ro,
ko n‑nadandoto ñaʼa‑ia na n‑nadandoto‑ia Cristu.
Xaxeʼe xa n‑kundaʼu ini ñaʼa Ianyuux roo xiʼin xaxeʼe xa mani juini ñaʼa‑ia,
daa n‑kida ñaʼa‑ia.
N‑dananitaʼu ñaʼa‑ia xaxeʼe xa vaʼa‑ia.
Naka vaʼa‑ia.
6 Xaxeʼe xa kunduu‑ro xiʼin Cristu Jesús,
kuenda kɨu n‑nadandoto ñaʼa Ianyuux roo na n‑nadandoto‑ia‑ia,
te jantuu ñaʼa‑ia xiʼin‑ia andɨu.
7 Xa na jini ñayiu ta koo ka xa yo vaʼa‑ia,
duʼa n‑kida‑ia.
Vaʼa xa vaʼa n‑kida ñaʼa‑ia.
Xaxeʼe xa kunduu‑ro xiʼin Cristu Jesús,
n‑kida ñaʼa‑ia xaʼa.
Yo vichi vaʼa‑ia.
8 N‑dananitaʼu ñaʼa Ianyuux,
ko xaxeʼe xa vaʼa‑ia xiʼin xaxeʼe xa n‑kundaʼu ini ñaʼa‑ia xiʼin xaxeʼe xa kukanu ini‑ro Jesucristu;
ñadu xaxeʼe xa ka kida‑ro xavaʼa.
Ña tuu nax n‑jenyaʼu‑ia.
Nakutaʼu‑ro xa daa n‑kida ñaʼa‑ia.
9 Ñadu xa xaxeʼe xa n‑ka jandixa‑ro‑ia,
nanitaʼu‑ro chi nuu n‑xio xa xaxeʼe xijan nanitaʼu‑ro n‑kuu,
naka ku kuu iʼni‑ro.
10 Xaxeʼe xa kunduu‑ro xiʼin Cristu Jesús kidatniu Ianyuux anu‑ro xa nduu‑ro ñayiu vaʼa xa na kuaʼa kada‑ro xavaʼa.
Xa daa nga n‑ñu ini Ianyuux xa na nduu‑ro ñayiu vaʼa te kada‑ro xavaʼa ndɨkɨu ndɨñuu.
N‑kida Jesucristu xa n‑ka kumani ñayiu ñatu ka kuu ñayiu Israel xiʼin ñayiu Israel
11 Ndixi,
xaxeʼe xa ñatu ka taʼnde ndodo ñɨɨ nuu ii‑n,
ka dandee ñaʼa se Israel se ña taʼnde ndodo ñɨɨ nuu ii.
Maxku ndunaa koio‑n janda n‑ka xo kuu‑n.
12 Ñatu n‑ka xo xini‑n jundu kuu Cristu.
Na jaʼan‑da ɨɨn tnuʼu.
Kuenda kɨu ñatu n‑yɨtnaʼa‑n nuu ñayiu Israel,
ko vitna yɨtnaʼa‑n nuu‑i.
Ñayiu juera n‑ka xo kuu‑n.
Ña n‑ka xo xini‑n nuu nax n‑jaʼan Ianyuux xa juñaʼa‑ia ñayiu Israel.
Ñatu n‑ka xani ini‑n xa nanitaʼu‑n.
Ni ñatu n‑xo ndeka ñaʼa Ianyuux,
13 ko vitna ndeka ñaʼa‑ia xaxeʼe xa n‑xiʼí Cristu xaxeʼe kuechi‑n,
te kunduu‑n xiʼin‑ia nuu ka xikonuu ka xikondodo‑n.
14 N‑xio ɨɨn xa n‑xo kida xa n‑ka xo xini uʼu tnaʼa‑n xiʼin ñayiu Israel.
Kuenda kɨu ɨɨn nama dujun nukoo meʼñu uu ñuu n‑xo kuu xijan,
te n‑xanu Jesucristu xijan na n‑xiʼí‑ia.
Te n‑kida‑ia xa n‑ka kumani‑n xiʼin ñayiu Israel,
kuenda kɨu ɨɨn nga ñuu teyu‑n xiʼin‑i vitna.
15 Ley n‑xo taxnuni nuu ñayiu Israel kuu nama dujun jan.
N‑kida‑ia xa ñatuka taxnuni ley ñayiu Israel nuu‑i.
Xa na nduu‑n ntdaa‑n xiʼin ñayiu Israel ɨɨn nga ñayiu n‑kida‑ia xijan.
Kuenda kɨu ɨɨn ni ñuu ɨɨn ni teyu‑n ntdaa‑n vitna,
te n‑ka kumani‑i xiʼin‑n.
16 N‑xiʼí‑ia nuu curuxi xa na kuaʼa na nduu koio‑n ɨɨn nga ñayiu te kumani Ianyuux xiʼin‑n ntdaa‑n.
Dɨuni na n‑xiʼí‑ia n‑kida‑ia xa ma jini uʼu tnaʼa ka‑n xiʼin ñayiu Israel.
17 Na n‑kixi Cristu ñuñayiu,
n‑jaʼan‑ia nax io xa kada‑ro xa kumani koio‑ro xiʼin Ianyuux.
Xa n‑jaʼan‑ia nuu ndixi xa ñatu n‑xo ndeka ñaʼa‑ia,
xijan n‑jaʼan‑ia nuu ñayiu xa daa nga ndeka‑ia.
18 Ka kuu‑ro ñayiu Israel a ka kuu‑ro ñayiu ñatu kuu ñayiu Israel,
ko chinuu Taa‑ro Ianyuux tnuʼu jaʼan‑ro nuu‑ia xaxeʼe xa ñuʼu ñaʼa Espíritu‑ia.
Xa na kuaʼa juʼun ñaʼa Espíritu Ianyuux ntdaa‑ro,
n‑xiʼí Cristu.
19 Ñatuka ka jaʼan ñayiu Israel jan xa ka kuu‑n ñayiu juera chi kuenda kɨu ɨɨn ni ñuu ɨɨn ni teyu‑n xiʼin‑i vitna.
N‑kɨu tnaʼa‑n nuu ñayiu n‑kida Ianyuux xa n‑ka nduu‑i ñayiu ii vitna.
Ka kuu‑n daʼya Ianyuux vitna na ka kuu ñayiu Israel daʼya‑ia.
20 Kuenda kɨu yuú xe kava tnaʼa nama veʼe kuaʼa juaʼan ka kuu‑ro ntdaa‑ro.
Kuenda kɨu cimientu nama jan ka kuu uxi uu se n‑tundaʼa ñaʼa Jesús xa dakuaʼa‑s ñayiu xiʼin se n‑ka xo jaʼan nuu ñayiu xa n‑jaʼan Ianyuux nuu‑s.
Yuú ñukax ini ka yɨtnɨɨ nama veʼe jan kuu Cristu Jesús.
21 Xa vax kukueʼe ka ñayiu ka kukanu ini Jesucristu juaʼan kuu xa xe kava tnaʼa ka yuú kuaʼa nama veʼe jan juaʼan.
Na xinokava veʼe jan,
te ku kuu veñuʼu ii.
Kuenda kɨu veñuʼu ii jan ku kuu‑ro chi ka kunduu‑ro xiʼin Cristu,
Ia kuu Xtoʼo‑ro.
22 N‑kida Ianyuux xa n‑ka kɨu tnaʼa‑n nuu‑da ntdaa‑da te kukueʼe ka‑ro juaʼan.
Kuenda kɨu ɨɨn veʼe tuu Ianyuux ku kuu‑ro ntdaa‑ro chi ñuʼu ñaʼa Espíritu‑ia ntdaa‑ro.