N‑tetutniu Ianyuux Spalu xa juña tnuʼu‑s ñayiu ñatu ka kuu ñayiu Israel xa n‑kida Cristu
3
Xaxeʼe ntdaa xaʼa xiʼin xaxeʼe ntdaa ndixi,
ñayiu ñatu ka kuu ñayiu Israel,
yɨndiʼu daña vekaa.
2 Kuiti xnaʼa‑n xa n‑tetutniu ñaʼa Ianyuux xa kachitnuʼu ñaʼa‑da nax io xa kada‑n xa na dananitaʼu ñaʼa‑ia.
Vaʼa‑ia xa duʼa n‑tetutniu ñaʼa‑ia.
3 N‑kachitnuʼu ñaʼa Ianyuux nax kada‑ia xa na kuaʼa nanitaʼu koio‑n.
Mee ni‑ia xa daa nga n‑xo naʼa xijan.
Xá n‑chidotnuni‑da xaku xa kakuneʼe‑da ya juan xee nuu‑n.
4 Na yaʼa xa kaʼu koio‑n tutu yaʼa,
jini koio‑n nax kuu xa n‑kida Cristu.
Xijan kuu xa n‑kachitnuʼu ñaʼa Ianyuux daña.
5 Ñatu n‑datuu Ianyuux xijan nuu ñayiu antes,
ko vitna n‑datuu Espíritu‑ia nuu se n‑tundaʼa ñaʼa Jesús xa dakuaʼa koio‑s ñayiu xiʼin nuu se ka jaʼan nuu ñayiu xa n‑jaʼan Espíritu Ianyuux nuu‑s.
N‑kida Ianyuux xa n‑ka nduu‑s se ii.
6 N‑kachitnuʼu ñaʼa‑ia xa teku ñayiu ñatu kuu ñayiu Israel vitna nax io xa kada‑i xa nanitaʼu‑i na kuaʼa niʼi‑i taʼu‑i andɨu tuku.
Nani niʼi ñayiu Israel taʼu‑i,
dani niʼi ñayiu ñatu kuu ñayiu Israel taʼu‑i.
Niʼi koio‑i xa n‑jaʼan Ianyuux xa juñaʼa‑ia xaxeʼe xa ka kunduu‑i xiʼin Cristu Jesús.
Kuenda kɨu idii nga ñayiu ka kuu‑i ntdaa‑i.
7 N‑tetutniu ñaʼa Ianyuux xa juña tnuʼu‑da ñayiu xijan.
Mudu yaʼa xinokuechi‑da nuu‑ia.
Kidatniu‑ia anu‑da xa na ndaku‑da xa kada‑da tniu‑ia.
Na kutaʼu‑da xa n‑tetutniu ñaʼa‑ia.
Naka vaʼa‑ia.
8 Daña,
se ndijun nga ndandɨʼɨ nuu ñayiu ii kuu‑da,
ko n‑tetutniu ñaʼa‑ia xa juña tnuʼu‑da ñayiu ñatu ka kuu ñayiu Israel nax n‑kida Cristu xa na nanitaʼu‑i.
Vaʼa xa vaʼa kida ñaʼa‑ia.
Yo vichi vaʼa‑ia.
9 N‑xantuu Ianyuux,
Ia n‑kidavaʼa ñayiu,
ángel,
ntdaa xa io du xa juña tnuʼu koio‑da ñayiu nax kuu xa n‑ñu ini‑ia xa kada‑ia na kuaʼa nanitaʼu‑i.
Mee ni Ianyuux xa daa nga n‑xo naʼa xijan.
10 Xa na jini koio xaloko xiʼin ángel ndeka‑i xa yo vaʼa tuʼa Ianyuux,
kida‑ia ñayiu kukanu ini Jesucristu xijan vaxi.
Dɨuni jini koio‑i xa yo ndichi tnuʼu‑ia.
11 Nde na ta nkavatuu ka ñuñayiu xa daa nga n‑ñu ini Ianyuux xa daa kada ñaʼa‑ia chi n‑xo naʼa‑ia xa kuú Cristu Jesús,
ia kuu Xtoʼo‑ro.
12 Xaxeʼe xa kunduu‑ro xiʼin Cristu Jesús,
kuyɨɨ‑ro xa xijan taʼu‑ro nuu Ianyuux,
te tuu‑ro xa nini‑ia ntdaa xa jaʼan‑ro nuu‑ia.
13 Xaxeʼe xijan,
xijan taʼu‑da nuu Ianyuux xa maxku ku tnau ini koio‑n xa ndaʼu yaʼa‑da.
Koo kaʼnu anu koio‑n.
Xaxeʼe xa dakuaʼa ñaʼa‑da ntdaa‑n,
duʼa yaʼa‑da.
Kuu mee‑n xavaʼa xa duʼa yaʼa‑da chi ndukaʼnu koio‑n andɨu.
Yo vichi xemani Cristu ñayiu ka kukanu ini‑ia
14 Xaxeʼe xijan xko xijan taʼu‑da nuu Taa‑ro Ianyuux.
Xjuiin xiti‑da hora xijan taʼu‑da.
15 Taa ntdaa ñayiu kuu Ianyuux xaxeʼe xa n‑kidavaʼa‑ia‑i.
Dɨuni kuu‑ia Taa ntdaa ángel,
ia io andɨu,
chi n‑kidavaʼa‑ia‑ia tuku.
16 Xijan taʼu‑da nuu‑ia xa na kadatniu Espíritu‑ia anu‑n na kuaʼa na kukanu ini ka‑n‑ia.
Naka kueʼe xa kuaʼa Ianyuux xa kada‑ia.
Naka vichi kidatniu‑ia anu‑ro.
17 Dɨuni xijan taʼu‑da nuu‑ia xa na kada‑ia xa kunduu‑n xiʼin Cristu chi ka kukanu ini‑n‑ia.
Na kada Cristu xa juemani koio‑n‑ia xiʼin ñayiu.
18 Xijan taʼu‑da nuu Ianyuux xa na chindee ñaʼa‑ia xa na jini‑n ntdaa‑n xiʼin ntdaa ñayiu n‑kida Ianyuux xa n‑ka nduu‑i ñayiu ii xa yo vichi xemani ñaʼa Cristu.
Naka xemani ñaʼa‑ia.
Naka mani ini‑ia.
19 Yo vichi xemani ñaʼa‑ia.
Xijan taʼu‑da nuu Ianyuux xa na nduu ntdandituʼu‑n ñayiu vaʼa na vaʼa‑ia.
20 Kidatniu‑ia anu‑ro,
te kueʼe xavaʼa kida ñaʼa‑ia.
Nde xa ña kixdɨkɨ‑ro xa jaʼan‑ro nuu‑ia xa kada ñaʼa‑ia,
kada ñaʼa‑ia.
Nde xa ña kixdɨkɨ‑ro xa kada ñaʼa‑ia,
kada ñaʼa‑ia.
21 Na ndadakaʼnu roo,
ñayiu ka kukanu ini Cristu Jesús,
Ianyuux nɨkava nɨkuita,
chi ka kunduu‑ro xiʼin‑ia.
Dani na ndadakaʼnu ñaʼa dava ka ñayiu xndaxio vitna xiʼin ñayiu ta koo ka.
Amén.