Carta n‑kidavaʼa Spalu nuu ñayiu Filipos
Kidavaʼa Spalu nuu ñayiu Filipos
1
Pablo xiʼin Timoteo,
se xinokuechi nuu Jesucristu ka kuu‑da,
ka kidavaʼa‑da carta yaʼa nuu ntdaa ñayiu ka kunduu xiʼin Cristu Jesús ñuu nani Filipos.
N‑kida dɨɨn Ianyuux mee‑n,
xa ku kuu koio‑n ñayiu mee‑ia.
Dani kidavaʼa‑da nuu se ka taxnuni nuu‑n,
xiʼin se ka kuu jefe veñuʼu.
2 Na taxi Taa‑ro Ianyuux xiʼin Xtoʼo‑ro Jesucristu xamani‑ia nuu‑n,
te na kada‑ia xa kutuu vaʼa koio‑n.
Xijan taʼu‑da nuu Ianyuux xaxeʼe‑n
3 Ntnaʼa najaʼan ñaʼa‑da,
xiaʼan‑da xa n‑kutaʼu‑da nuu Ianyuux xaxeʼe‑n.
4 Kɨu xiʼin kɨu kuvete‑da xaxeʼe‑n te xijan taʼu‑da xaxeʼe‑n,
ntdaa‑n.
5 Kuvete‑da xaxeʼe xa ka kidatniu‑n xiʼin‑da.
Na n‑xee‑da ñuu‑n kiʼna nuu,
n‑ka chindee ñaʼa‑n.
Nde vitna,
ka chindee ñaʼa‑n,
xa juña tnuʼu‑da tnuʼu vaʼa Jesucristu nuu ñayiu.
6 Xini‑da xa kidatniu Ianyuux anu‑n.
Io‑da confianza nuu‑ia xa daxinokava‑ia ntdaa xa kida‑ia.
Nani n‑kixeʼe‑ia xa kadatniu‑ia anu‑n,
dani kadatniu naʼi‑ia anu‑n nde na ndixi Jesucristu.
7 Te vatuka xa vaʼa xani ini‑da xaxeʼe‑n.
Vaʼa xemani ñaʼa‑da.
N‑taxi Ianyuux xamani‑ia mee‑da,
te n‑taxi‑ia xamani‑ia mee‑n tuku.
Kunduu‑ro,
ntdaa‑ro,
xiʼin Jesucristu.
Tuu‑da vekaa te jɨʼɨn‑da nuu juxtixia,
xa jaʼan ndaa‑da xaxeʼe Jesucristu.
Dadaʼan‑da tnuʼu vaʼa Jesucristu,
xa kuu xandaa.
8 Vaʼa naʼa Ianyuux xa xemani ñaʼa‑da,
ntdaa‑n.
Naʼa‑ia xa nani xemani ñaʼa Jesucristu mee‑n,
dani xemani ñaʼa mee‑da tuku.
9 Xijan taʼu‑da xa juemani koio‑n mee‑ia xiʼin ñayiu.
Xijan taʼu‑da xa vaʼa jini koio‑n,
xa kutnuni ini‑n xa kuu xavaʼa te kada koio‑n xavaʼa.
10 Duʼa kada koio‑n xa juini Ianyuux,
te ma kuaʼa xa tekuechi ñaʼa ni ɨɨn ñayiu,
kɨu na ndixi Jesucristu xa ndadandaa‑ia ntdaa xa io.
11 Ná kuu cosecha vaʼa kuu xa kada‑n xa kuu xavaʼa.
Na kada Jesucristu xa duʼa kada koio‑n.
Te xaxeʼe xavaʼa kada koio‑n,
te koo koio ñayiu xañuʼu nuu Ianyuux,
te jaʼan vaʼa‑i xaxeʼe‑ia.
Nux kutuu naʼi‑da ñuñayiu yaʼa, kutuu‑da xiʼin Cristu
12 Ñani‑da kuʼa‑da,
juini‑da xa kutnuni ini koio‑n,
xa ntdaa xa yaʼa‑da kida xa kueʼe xa kueʼe ñayiu ka teku tnuʼu vaʼa Jesucristu vitna.
13 Ntdaa soldado io yaʼa,
xiʼin ntdaa ñayiu xtuu yaʼa,
ka xini xa yɨndiʼu‑da vekaa xaxeʼe xa kunduu‑da xiʼin Cristu.
14 Te vaʼa ka kida ñani‑ro kuʼa‑ro yaʼa.
Xaxeʼe xa yɨndiʼu mee‑da vekaa,
te ka xian tnuʼu mee‑s tnuʼu Ianyuux nuu ñayiu.
Xndaxio‑s kueʼe ka confianza nuu Xtoʼo‑ro Jesucristu vitna,
te ñatu ka yuʼu‑s nuu ñayiu.
15 Xandaa kuu,
xa io ñayiu ka jaʼan tnuʼu Cristu,
xaxeʼe xa ka kukuedi ini‑i nuu mee‑da,
te ka juini‑i xa kunuu‑i nuu‑da.
Ko io ɨnka ñayiu ka jaʼan tnuʼu Cristu,
xaxeʼe xa ka kuu ini vaʼa‑i.
16 Io ñayiu,
juini ka xian tnuʼu‑i tnuʼu Cristu,
ko ɨɨn xa jaʼan‑i te ɨnka xa kida‑i,
chi kida‑i xavaʼa mee‑i.
Ka juini‑i xa kueʼe ka vida na yaʼa‑da vitna xa yɨndiʼu‑da.
17 Dɨuni,
io ñayiu ka xian tnuʼu tnuʼu Cristu,
xaxeʼe xa xemani ñaʼa‑i mee‑da.
Ka xini‑i xa n‑kaxí ñaʼa Ianyuux,
xa dadaʼan‑da tnuʼu vaʼa Jesucristu.
18 Ko ñatu xkuu,
nux ka jaʼan vaʼa‑i,
a ñaʼa.
Ko xaxeʼe xa ka xian tnuʼu‑i tnuʼu Cristu nuu ñayiu,
te kuvete‑da.
Te kueʼe ka kuvete‑da.
19 Xaxeʼe xa ka xijan taʼu‑n nuu Ianyuux xaxeʼe‑da,
te chindee ñaʼa Espíritu Jesucristu mee‑da,
te xini‑da xa kada naʼi ka‑da xa juini Ianyuux.
20 Io‑da confianza xa ma dakendoo ñaʼa Ianyuux xa januu.
Juini‑da xa jaʼan‑da xaxeʼe Cristu,
te ma yuʼu‑da ni ɨɨn nuu ñayiu.
Ntdaa xá n‑kida‑da,
n‑kida‑da xa kutnuni ini koio ñayiu xa Ia kunxaʼnu ka kuu Cristu.
Dani vitna.
Nux kutuu naʼi‑da,
te juini‑da xa kada‑da xa koo koio ñayiu xañuʼu nuu Cristu.
Nux io xa kuú‑da,
ko dani juini‑da xa kada‑da xa koo koio ñayiu xañuʼu nuu Cristu.
21 Nux kutuu naʼi‑da ñuñayiu yaʼa,
kutuu‑da xiʼin Cristu,
te kada‑da xa juini mee‑ia.
Nux kuú‑da,
jɨʼɨn‑da andɨu,
xa kutuu vaʼa ka‑da xiʼin‑ia ijan.
22 Ko nux yaʼa kutuu‑da,
kuaʼa‑da xa kadatniu ka‑da xaxeʼe Xtoʼo‑ro Jesucristu.
Ña kuaʼa‑da xa kaxí‑da.
Nux kutuu‑da yaʼa,
te vatuka.
Nux jɨʼɨn‑da andɨu,
te vatuka.
23 Yo uʼu xa kaxí‑da.
Juini mee‑da xa jɨʼɨn‑da,
xa kutuu‑da xiʼin Cristu andɨu.
Yo vaʼa ka.
24 Ko ndoñuʼu mee‑n xa kutuu‑da yaʼa.
25 Xaxeʼe xa kutnuni ini‑da xa ndoñuʼu ñaʼa‑n,
io‑da confianza xa vitna ma kuú‑da.
Kutuu‑da xiʼin mee‑n,
xa chindee ñaʼa‑da,
xa kunduu koio‑n xiʼin Cristu,
xa jandixa ka‑n te kuvete ka‑n.
26 Xee‑da ñuu‑n ɨnka vuelta,
te duʼa koo xa juñaʼa koio‑n xa n‑kutaʼu‑n nuu Cristu Jesús xaxeʼe‑da.
27 Idini xa juini‑da:
Xá n‑ka xeka vaʼa‑n tnuʼu vaʼa Jesucristu.
Na kada koio‑n xa juini mee‑ia.
Nuxa xee‑da a ñaʼa,
ko juini‑da xa teku‑da xa kunduu koio‑n xiʼin Cristu.
Chindee tnaʼa‑n xa kundee ini‑n xa jandixa koio‑n tnuʼu vaʼa Jesucristu,
te chindee tnaʼa‑n xa juñaʼa koio‑n tnuʼu‑ia nuu ɨnka ñayiu.
28 Juini‑da xa teku‑da xa ñatu ka yuʼu‑n ni ɨɨn nuu ñayiu.
Juini io ñayiu ka kiti ini nuu‑n,
te ka jantnaʼa‑i xiʼin‑n,
ko maxku yuʼu koio‑n.
Xijan kuu xa,
jini koio‑i xa ndadandaa Ianyuux mee‑i andea,
te dakaku ñaʼa‑ia mee‑n xa kutuu vaʼa‑n andɨu.
Duʼa kada Ianyuux.
29 Xaxeʼe xa ka kunduu‑n xiʼin Cristu,
te taxi Ianyuux xamani‑ia,
xa jandixa koio‑n‑ia,
te dani xa kueʼe vida yaʼa koio‑n xaxeʼe‑ia.
30 N‑ka xini ñaʼa‑n mee‑da,
hora n‑xini uʼu ñaʼa ñayiu,
te ka tekutnuʼu‑n xa dani kuu vitna.
Nani kundee ini mee‑da,
dani na kundee ini koio mee‑n tuku.