Na kani ini koio mee‑n ná n‑xani ini Cristu Jesús
2
Chindee ñaʼa Cristu mee‑n,
xa maxku kuita anu‑n.
Xemani ñaʼa‑ia,
te taxi‑ia tnuʼu kanu ini.
Ka kunduu‑n xiʼin Espíritu Ii,
te kidatniu‑ia anu‑n.
Ka xemani tnaʼa‑n,
ɨɨn‑n xiʼin ɨnka‑n,
te chindee tnaʼa‑n.
2 Xijan kuu xa,
kada koio‑n xa kuvete xa kuvete‑da.
Ɨɨn nuu kani ini koio‑n.
Juemani koio‑n Cristu,
te juemani tnaʼa‑n ɨɨn‑n xiʼin ɨnka‑n.
Kunduu koio‑n xiʼin Cristu,
te kunduu koio‑n ɨɨn‑n xiʼin ɨnka‑n.
Te kada koio‑n xa juini Ianyuux.
3 Maxku kadatniu‑n xa kunuu mee‑n nuu ñani‑n kuʼa‑n.
Maxku najuen tnuʼu‑n mee‑n.
Xakee xandaʼu kadatniu‑n.
Kani ini koio‑n xa vaʼa ka ñani‑n kuʼa‑n dada mee‑n.
4 Maxku nduku‑n xa niʼi‑n ntdaa xa juini mee‑n,
nduku‑n xa niʼi ñani‑n kuʼa‑n xa ndoñuʼu mee‑i tuku.
5 Na kani ini koio mee‑n ná n‑xani ini Cristu Jesús.
6 N‑xo tuu‑ia xiʼin Taa‑ia Ianyuux andɨu,
n‑taxnuni‑ia nduu‑ia xiʼin‑ia.
Ko juini ɨɨn nuu kuu Jesucristu xiʼin Taa‑ia Ianyuux,
ko n‑dandoo‑ia nuu taxnuni‑ia,
xa kixee‑ia ñuñayiu.
7 Ñatu n‑taxnuni ka‑ia.
Ná kuu ɨɨn se xinokuechi nuu ɨnka ñayiu n‑kuu‑ia ñuñayiu.
N‑kaku‑ia,
ná kaku mee‑ro.
8 N‑kuu‑ia ɨɨn seyɨɨ,
ná kuu mee‑ro.
Ñatu n‑kuxee ini‑ia.
Xaxeʼe xa n‑jandixa‑ia Taa‑ia Ianyuux,
te n‑xiʼí‑ia.
Nde xa n‑xejoon‑ia xa n‑ka xaʼni ñaʼa‑s nuu curuxi,
n‑jandixa‑ia Taa‑ia Ianyuux.
9 Xijan kuu xa,
n‑kida Ianyuux xa kunxaʼnu ka Cristu dada ntdaa ɨnka xa io.
N‑kida‑ia xa jaʼan koio ntdaa ñayiu:
“Xtoʼo‑ro kuu Jesús.”
10 Xaxeʼe xa taxnuni Jesús nuu ntdaa xa io,
te xá n‑kida Ianyuux xa nujuiin xiti koio ntdaa ñayiu nuu‑ia.
Ntdaa xa io andɨu,
ntdaa xa io ñuñayiu,
ntdaa xa io andea.
11 Xá n‑kida Ianyuux xa kutnuni ini koio ntdaa ñayiu xa taxnuni Xtoʼo‑ro Jesucristu nuu ntdaa xa io,
te duʼa ka kutnuni ini ntdaa ñayiu xa Ia kunxaʼnu ka kuu Taa‑ia Ianyuux.
Ka kuu‑n ná kuu chudini diñu ñuu nee
12 Ñani‑da kuʼa‑da,
xemani ñaʼa‑da mee‑n.
Na n‑xo tuu‑da xiʼin‑n,
n‑ka jandixa‑n tnuʼu Ianyuux n‑jaʼan‑da nuu‑n.
Dani vitna,
juini‑da xa jandixa koio ka‑n Ianyuux,
juini xika tuu‑da.
N‑jaʼan ñaʼa Ianyuux xa kunduu koio‑n xiʼin‑ia.
Ɨɨn ɨɨn‑n,
kunduu naʼi ka‑n xiʼin‑ia.
Yuʼu‑n nuu‑ia,
te kada‑n xa juini‑ia.
13 Xaxeʼe ntdaa xa juini‑ia,
kidatniu Ianyuux anu‑ro,
xa kani ini‑ro xa kada‑ro xavaʼa,
te chindee ñaʼa‑ia xa duʼa kada‑ro.
14 Maxku jaʼan‑n:
“¿Nakuenda io xa kada‑da xaʼa?”
Maxku jantnaʼa tnuʼu‑n xiʼin Ianyuux.
15 Chi daʼya Ianyuux n‑ka nduu‑n.
Kada koio‑n xavaʼa,
xa ma kuaʼa xa tekuechi ñaʼa ni ɨɨn ñayiu,
te ma dakuido datau‑n anu‑n.
Xtuu‑n meʼñu ñayiu ka kida xa uʼu,
ñayiu kuxee ini.
Io xa ku kuu mee‑n ñayiu ka kida xa juini Ianyuux.
Meʼñu ñayiu jan,
ka kuu‑n ná kuu chudini diñu ñuu nee.
16 Xá n‑ka tnɨɨ‑n tnuʼu vaʼa Jesucristu,
te xtuu vaʼa‑n xiʼin Ianyuux.
Hora na ndixi Cristu,
te juini‑da xa jaʼan vaʼa‑da xaxeʼe‑n.
Kuu ná kuu xa kendava‑da xa tnɨɨ‑da premiu‑da.
Juini‑da xa jini‑da xa vaʼa n‑kidatniu‑da te vaʼa n‑kendava‑da.
17 Xa ka jandixa‑n Jesucristu,
kuu ná kuu xa ka xiaʼan‑n ɨɨn xa doko‑n nuu Ianyuux.
Te nux kaʼni ñaʼa koio ñayiu mee‑da,
te kuu ná kuu xa daxinokava‑da xa n‑ka doko mee‑n.
Ko vatuka.
Xaxeʼe xa ka kunduu mee‑n xiʼin Jesucristu,
te kuvete mee‑da,
te juini‑da xa kuvete koio mee‑n tuku.
18 Nux io xa kuú‑da,
xaxeʼe xa n‑chindee ñaʼa‑da xa kunduu‑n xiʼin Cristu,
ko kuvete‑da.
Te juini‑da xa kuvete koio mee‑n tuku.
Timoteo xiʼin Epafrodito
19 Nux juejoon Xtoʼo‑ro Jesús,
te juini‑da xa yachi tundaʼa‑da Timoteo na xee‑s ñuu‑n,
xa kuvete‑da hora na teku‑da xa xtuu vaʼa‑n.
20 Chi ña yoo ɨnka se xani ini ná xani ini mee‑da.
Ɨnka ñani‑ro yaʼa,
ka xani ini‑sɨ xaxeʼe tniu mee‑s,
ñatu ka xani ini‑sɨ xa chindee ñaʼa‑s mee‑n.
21 Ka nduku‑sɨ xavaʼa mee‑s,
te ñatu ka kida‑s xa juini Jesucristu.
22 Ko n‑ka xini‑n Timoteo hora n‑kidatniu‑da xiʼin‑s ñuu‑n.
Xini‑n xa vaʼa n‑kidatniu‑s.
Na n‑kachitnuñaʼa‑s tnuʼu vaʼa Jesucristu,
n‑kidatniu mee‑s xiʼin mee‑da ná kidatniu ɨɨn daiyɨɨ xiʼin taa‑s.
23 Xijan kuu xa,
juini‑da xa yachi tundaʼa‑da‑sɨ xee‑s ñuu‑n,
diko ni na jini‑da nax kada koio juxtixia yaʼa.
24 Te io‑da confianza nuu Xtoʼo‑ro Jesús,
xa yachi xee mee‑da ñuu‑n tuku.
25 N‑xani ini‑da xa tundaʼa‑da Epafrodito xee‑s tuku.
N‑ka tundaʼa‑n‑sɨ xa kixi‑s xa chindee ñaʼa‑s,
te vaʼa n‑chindee ñaʼa‑s.
Ñani mani‑da kuu‑s.
Xá n‑kidatniu‑s xiʼin‑da,
te n‑kundee ini‑s xiʼin‑da.
Vaʼa n‑kida‑s ntdaa xa n‑ka juini‑n.
26 Ko yo n‑kukajan ini‑sɨ xa jini ñaʼa‑s,
ntdaa‑n.
Yo n‑ndu ini‑s,
hora n‑teku‑sɨ xa n‑ka tekutnuʼu mee‑n xa n‑kuʼu‑s.
27 Xandaa kuu xa yo n‑kuʼu‑s,
diko nga xa kuú‑s,
ko duʼa ña n‑kuu.
Chi n‑kundau ini ñaʼa Ianyuux mee‑s,
te mee‑da tuku,
xa maxku yo kukoʼyo ini‑da xa kukoʼyo ini‑da.
28 Xijan kuu xa yachi ni tundaʼa‑da‑s nuu‑n,
xa na kuvete koio‑n hora najini‑n‑sɨ ɨnka vuelta,
te xa maxku yo kukoʼyo ini ka mee‑da.
29 Xijan kuu xa kueka vaʼa koio‑n‑sɨ,
te kuvete koio‑n,
te juñaʼa‑n xa n‑kutaʼu‑n nuu Xtoʼo‑ro Jesús xaxeʼe‑s.
Io xa koo koio‑n xañuʼu nuu seyɨɨ ka kuu ná kuu mee‑s.
30 Xaku nga xa kuú‑s,
xaxeʼe xa kuu‑sɨ se xinokuechi nuu Cristu.
Xaxeʼe xa n‑kida‑s ntdaa xa ña n‑kuu kada koio mee‑n xaxeʼe‑da,
te xaku nga xa kuú‑s.