Carta n‑tundaʼa Spalu nuu ñayiu Colosas
Ndajan tnuʼu Spalu ñayiu ka kukanu ini Jesucristu xndaxio Colosas
1
1-2 Daña Spalu xiʼin ñani‑ro Timoteo,
tundaʼa‑da carta yaʼa juan xee nuu ndixi xa xndaxio‑n Colosas,
te ka kuu‑n ñayiu n‑kida Ianyuux xa n‑ka nduu ii‑n,
te dani ka kukanu ini naʼi‑n‑ia.
Xaxeʼe xa ka kukanu ini‑ro Cristu,
ka kuu ñani tnaʼa‑ro.
N‑tundaʼa ñaʼa Cristu Jesús xa dakuaʼa‑da ñayiu chi daa ñu ini Ianyuux.
Xijan taʼu‑da nuu Taa‑ro Ianyuux xa na chindee chituu ñaʼa‑ia.
Xijan taʼu‑da nuu‑ia xa na kada‑ia xa na ku kundaa ku kuvatu anu koio‑n,
chi n‑ka natu ini‑n xa n‑ka kida‑n kuechi.
Xiaʼan Spalu nuu Ianyuux xa n‑kutaʼu‑s xaxeʼe xa ka kukanu ini ñayiu Colosas Jesucristu
3 Ntnaʼa vuelta ka xijan taʼu‑da nuu Ianyuux,
Ia kuu Taa Xtoʼo‑ro Jesucristu,
ka xiaʼan‑da xa n‑kutaʼu‑da
4 xaxeʼe xa n‑ka kukanu ini‑n Cristu Jesús xiʼin xaxeʼe xa ka xemani tnaʼa‑n xiʼin ntdaa ñayiu n‑kida Ianyuux xa n‑ka nduu‑i ñayiu ii.
Daa n‑ka teku‑da.
5 Xaxeʼe xa ka jandixa‑n xa xandaa xakuiti io taʼu‑n andɨu,
ka kida‑n xijan.
N‑ka teku‑n xijan na n‑ka teku‑n nax io xa kada koio‑n xa nanitaʼu‑n.
Ɨɨn xandaa kuu.
6 Kueʼe ñayiu ñuu ñuñayiu n‑ka teku xaʼa,
te ka jandixa‑i Cristu,
te ka kida‑i xavaʼa,
te ka teku ka dava ñayiu juaʼan.
Dani ndixi,
nde na n‑ka teku‑n nax n‑kida Ianyuux xa nanitaʼu‑n te n‑ka jandixa‑n xa ɨɨn xandaa kuu,
nde daa ka kida‑n xavaʼa.
Dɨuni ka teku ka ñayiu ñuu‑n xaʼa juaʼan.
7 Xá ka xini‑n xaʼa chi Epafras,
se mani juini‑ro,
n‑kachitnuʼu ñaʼa.
Ka xinokuechi‑da xiʼin‑s nuu Cristu.
N‑tetutniu ñaʼa Cristu nduu‑da xiʼin‑s xa junukuechi‑da xiʼin‑s nuu‑n.
8 Dɨu‑s n‑kachitnuʼu ñaʼa ntdaa‑da xa kida Espíritu Ianyuux xa ka xemani tnaʼa‑n.
9 Xijan kuu xa nde na n‑ka teku tnuʼu‑da xaʼa,
ka xijan taʼu‑da nuu Ianyuux xaxeʼe‑n ndɨkɨu ndɨñuu.
Xko xijan taʼu‑da xa na kada‑ia xiʼin Espíritu‑ia xa na kutnuni vaʼa ini koio‑n tnuʼu‑ia yodotnuni na kuaʼa kada koio‑n xa juini‑ia.
Dani xijan taʼu‑da nuu‑ia xa na kada Espíritu‑ia xa nduu‑n ñayiu kaxi ini
10 na kuaʼa na kutuu kunukoo koio‑n ná xtuu ñayiu ndeka ñaʼa Cristu.
Xa na kuaʼa na kutuu kunukoo koio‑n ná xtuu ñayiu ndeka ñaʼa Cristu,
jandixa naʼi‑n‑ia,
te kada naʼi‑n xavaʼa,
te jun ini‑n xa jini vaʼa ka‑n jundu kuu‑ia xiʼin nuu nax juini‑ia xa kada‑ro.
Kada koio‑n xijan chi tna ini Ianyuux.
Davaʼa nga nuu kuikonuu kuikondodo‑n kada‑n xa juini‑ia.
11 Kada koio‑n xaʼa,
te kada Ianyuux xa kundee ini koio‑n hora ndaʼu na yaʼa‑n,
te ma ndundeʼe‑n nuu ñayiu kida uʼu ñaʼa.
Naka kueʼe xa kuaʼa‑ia kada‑ia.
12 Na jaʼan‑ro xa n‑kutaʼu‑ro nuu Ianyuux xaxeʼe xa n‑kida‑ia xa niʼi koio‑ro taʼu‑ro na niʼi ntdaa ñayiu n‑kida‑ia xa n‑ka nduu‑i ñayiu ii taʼu‑i,
te kuvete‑ro.
Niʼi koio‑ro taʼu‑ro nuu jaʼan ñayiu mee ni xa ndaa.
Taxnuni Jesucristu xiʼin Ianyuux nuu ntdaa xa n‑kidavaʼa‑ia
13 Kuenda kɨu nuu nee n‑ka xo xikonuu‑ro xa n‑ka xo kida‑ro kuechi.
Daa n‑dananitaʼu ñaʼa Ianyuux.
Mee‑ia n‑kida xa n‑ka kɨu tnaʼa‑ro nuu ñayiu ka jandixa xa taxnuni Daʼya Yɨɨ mani‑ia nuu‑ro.
14 Daʼya Yɨɨ‑ia kuu Ia n‑chiyaʼu kuechi‑ro,
te n‑taxkanu ini Ianyuux kuechi n‑ka kida‑ro.
15 Kuu‑ia ná kuu mee Ianyuux,
Ia ña kanda ndeʼa‑ro.
Kunuu‑ia nuu ntdaa xa n‑kidavaʼa Ianyuux.
16 Dɨuni n‑kidavaʼa‑ia ntdaa xa io andɨu,
ntdaa xa io ñuñayiu,
ñayiu,
ángel du.
Mee‑ia n‑kidavaʼa ntdaa xa ndeʼa‑ro xiʼin ntdaa xa ña kanda ndeʼa‑ro.
Mee‑ia n‑xani ini xa koo se taxnuni xiʼin xa koo se kunxaʼnu.
Xa na ndadakaʼnu ñaʼa koio ntdaa xijan,
n‑kidavaʼa Daʼya Yɨɨ‑ia xiʼin‑ia xijan.
17 Xa daa nga io Cristu.
Dada n‑xe koo ntdaa xa n‑kidavaʼa‑ia xiʼin ñayiu,
ángel du.
Mee‑ia kida xa ñatu naa xijan,
ni ñayiu,
ni ángel.
Xndaxio naʼi‑i xiʼin‑ia.
18 Dɨuni kuu‑ia kuenda kɨu dɨkɨ roo xa kuu ro ñayiu ka kukanu ini‑ia xa taxnuni‑ia nuu‑ro.
Kiʼna ka‑ia n‑nandoto.
N‑nandoto‑ia xa na kuaʼa na nandoto ndɨyɨ,
te kunuu‑ia nuu roo,
ñayiu ka xiʼí.
N‑nandoto‑ia chi taxnuni‑ia.
19 N‑juini Ianyuux xa ku kuu‑ia ná kuu mee‑ia.
Ntdaa xa kuaʼa Ianyuux kada‑ia kuaʼa Cristu kada‑ia.
Ɨnuu ka tuʼa‑ia.
20 Dɨuni n‑juini Ianyuux xa kada Daʼya Yɨɨ‑ia xa na kumani‑ia xiʼin ntdaa xa io andɨu xiʼin ntdaa xa io ñuñayiu,
ñayiu du.
Xaxeʼe xa n‑xitakaa dika‑ia nuu curuxi,
te n‑xatu nɨñɨ‑ia,
ñatuka kiti ini Ianyuux nuu ñayiu.
21 N‑ka xo kida‑n kuechi xaxeʼe xa mee ni xaloko n‑ka xo ñuʼu anu‑n.
Kuenda kɨu ñayiu juera n‑ka xo kuu‑n nuu Ianyuux xa ñatu n‑xo ndeka ñaʼa‑ia,
te n‑ka xo xini uʼu‑n‑ia,
22 ko vitna n‑kida Jesucristu xa n‑kumani Ianyuux xiʼin‑n na n‑xiʼí‑ia nuu curuxi.
Hora na nadayujun nadataka ñaʼa Ianyuux nuu‑ia,
jini‑ia xa n‑ka nduu‑n ñayiu ii,
ñayiu ña tuu na kuechi ndido tau,
te jaʼan‑ia xa n‑ka ndundoo n‑ka ndunini‑n.
23 Jini‑ia xa n‑ka ndundoo n‑ka ndunini‑n xiʼin xa ña tuu ka na kuechi xndido xtau‑n xiʼin xa n‑ka nduu‑n ñayiu ii nux dani na kukanu ini naʼi‑n‑ia,
te nux dani na jun ini‑n xa ndixi‑ia.
Na n‑ka teku‑n xa dananitaʼu ñaʼa Ianyuux,
n‑ka teku‑n xa kutuu koio‑n xiʼin‑ia nɨkava nɨkuita.
Kueʼe ñayiu ñuu ñuñayiu n‑ka teku xa dananitaʼu ñaʼa Ianyuux xiʼin xa kutuu koio‑i xiʼin‑ia nɨkava nɨkuita.
Xaʼa jaʼan daña,
Spalu nuu ñayiu.
Mudu yaʼa xinokuechi‑da nuu Ianyuux.
N‑xe konetniu Spalu xa jaʼan‑s nuu ñayiu ka kukanu ini Jesucristu xa n‑jaʼan Ianyuux
24 Ndaʼu yaʼa‑da vitna xaxeʼe‑n,
ko kudɨ ini‑da xa duʼa yaʼa‑da.
Juini kueʼe vida n‑yaʼa Cristu xaxeʼe ñayiu ka kuu kuenda kɨu yɨkɨ kuñu‑ia,
ko ndoñuʼu xa ndaʼu yaʼa‑da tuku,
na kuaʼa na kɨu tnaʼa ndɨʼɨ ñayiu io xa kɨu tnaʼa‑i nuu ñayiu ka kukanu ini‑ia,
ñayiu kuu kuenda kɨu yɨkɨ kuñu‑ia.
25 N‑tetutniu ñaʼa Ianyuux xa jaʼan‑da nuu ndixi xa n‑jaʼan‑ia.
Ná io ná juaʼan jaʼan‑da.
26 Ñatu n‑datuu‑ia nuu ñayiu xanaʼa xa n‑ñu ini‑ia xa kada‑ia ñayiu ñatu ka kuu ñayiu Israel xavaʼa,
ko n‑datuu‑ia xijan vitna nuu roo,
ñayiu n‑kida‑ia xa n‑ka nduu‑ro ñayiu ii.
27 N‑juini Ianyuux xa jini‑ro ntdaa‑ro xijan vitna.
Ñu ini‑ia xa ñayiu ñatu ka kuu ñayiu Israel kunduu xiʼin Cristu,
te kukanu ini‑i xa kutuu‑i xiʼin‑ia andɨu.
Naka vaʼa‑ia.
Naka kueʼe xavaʼa kida ñaʼa‑ia ntdaa‑ro.
Ñayo n‑ka xo xini xa kada ñaʼa‑ia ndixi,
ñayiu ñatu ka kuu ñayiu Israel xavaʼa.
Ñayo n‑ka xo xini xijan,
chi ñatu n‑datuu‑ia.
28 Ka jaʼan‑da nuu ntdaa ñayiu jundu kuu Cristu te nax n‑kida‑ia,
te ka jan doʼo‑da‑i.
Ka xanu ichi koio‑da ñayiu ichi vaʼa na kuaʼa kada‑i xavaʼa.
Ka dakuaʼa‑da‑i na kuaʼa na nduu koio‑i ñayiu vaʼa na vaʼa mee‑ia.
29 Xaxeʼe xijan vichi ndeʼe kidatniu‑da te ndukundee‑da.
Kida Cristu xa kuaʼa‑da kada‑da tniu‑ia.