2
Kachitnuʼu ñaʼa‑da xa ndeʼe kidatniu‑da xa na kuaʼa kutnuni ini koio‑n xiʼin ñayiu Laodicea xiʼin dava ka ñayiu ña xini tnaʼa xiʼin‑da tnuʼu Ianyuux.
2 Jaʼan‑da nuu‑n tnuʼu Ianyuux xa na kukaʼnu anu koio‑n.
Io xa juemani tnaʼa‑n na kuaʼa vivii kada koio‑n tniu Ianyuux,
te ma jantnaʼa tnuʼu‑n.
Xa na kuaʼa vivii kada koio‑n tniu‑ia,
io xa kaʼu ka‑n tnuʼu‑ia yodotnuni te kutnuni vaʼa ka ini‑n.
Dɨuni io xa jandixa‑n xa ɨɨn xandaa kuu tnuʼu‑ia;
maxku jɨn tnɨɨ anu‑n.
Nux daa na kada koio‑n,
kukaʼnu anu‑n.
Nux vaʼa na kaʼu koio‑n tnuʼu‑ia yodotnuni,
jini koio‑n xa Cristu kuu Ia n‑ñu ini Ianyuux xa kixi‑ia ñuñayiu.
Ñatu n‑datuu‑ia xijan nuu ñayiu xá n‑ka xiʼí.
3 Cristu ntdandituʼu tuʼa‑ia,
ntdandituʼu xini‑ia.
4 Kachitnuʼu ñaʼa‑da xa io xa jini vaʼa koio‑n xa yodotnuni jan na kuaʼa maxku jandixa‑n xa jaʼan ñayiu ka tuʼa xa dajaʼan‑i ɨnka ñayiu xa na jandixa‑i ɨɨn xa ñatu kuu xandaa.
5 Vichi ñu ini ñaʼa‑da ɨɨn ɨɨn‑n.
Vichi kuvete‑da xa n‑teku‑da xa xtuu vii xtuu vaʼa‑n.
Naka vaʼa xa ɨnuu ka xani ini‑n,
te ñatu ka jantnaʼa‑n.
Dɨuni kuvete‑da xaxeʼe xa dani ka kukanu ini‑n Cristu,
xiʼin xa ñatu dandoo‑n‑ia.
N‑ka dama ñayiu n‑ka kukanu ini Cristu mudu‑i
6 Xaxeʼe xa n‑ka kukanu ini‑n Cristu Jesús,
Ia kuu Xtoʼo‑ro io xa kunduu‑n xiʼin‑ia,
te kada koio‑n ná n‑kida mee‑ia.
7 Idii ni vuelta io xa kajan‑n anu‑n xa kunduu‑n xiʼin‑ia,
te jandixa naʼi‑n xa xandaa kuu xa n‑jaʼan‑ia.
Jandixa naʼi‑n xa n‑ka jaʼan se n‑ka dakuaʼa ñaʼa.
Ndɨkɨu ndɨñuu ku juñaʼa‑n nuu Ianyuux xa n‑kutaʼu‑n.
8 Jun ini koio‑n xa maxku dandaʼu ñaʼa se jaʼan tnuʼu ndichi n‑ka xo jaʼan xixitna‑s.
Ñadu ɨɨn xa ñukax ini ka jaʼan‑s.
Ñadu ɨɨn xa ndaa kuu xa ka jaʼan‑s.
Xaloko ka xikonuu andɨu ka kida xa ka taʼu tniu‑s xa ka taʼu tniu‑s.
Ñatu kuu‑i tnuʼu n‑jaʼan Cristu,
9 Ia kuu Ianyuux.
Dɨuni n‑kuu Cristu ñayiu.
Ntdaa xa kuaʼa Ianyuux kada‑ia kuaʼa Cristu kada‑ia.
Ɨnuu ka tuʼa‑ia.
Ɨnuu ka kuu‑ia.
10 N‑ka nduu‑n ñayiu vaʼa ná vaʼa Cristu chi ka kunduu‑n xiʼin‑ia.
Mee‑ia taxnuni nuu ntdaa se ka taxnuni xiʼin nuu ntdaa xaloko ka taxnuni xiʼin nuu ntdaa ángel ka taxnuni.
11 Xaxeʼe xa ka kunduu‑n xiʼin‑ia,
kuenda kɨu n‑taʼnde ndodo ñɨɨ nuu ii‑n te n‑ka dajane‑n xijan xa ñatuka ka kida‑n xaloko.
12 Kuenda kɨu n‑ka xe konduxi‑n xiʼin Cristu te n‑ka nandoto‑n xiʼin‑ia na n‑nandoto‑ia xa n‑ka xendute‑n,
chi ka jandixa‑n xa n‑nadandoto Ianyuux Cristu.
13 Dɨuni kuenda kɨu ndɨyɨ n‑ka xo kuu‑n xaxeʼe xa ña tuu na xavaʼa n‑ka xo kida‑n.
Daa n‑ka xo kida‑n xaloko xaduʼa ka kida ñayiu ñatu ka chinuu Ianyuux.
Kuenda kɨu ndɨyɨ n‑ka xo kuu‑n,
ko kuenda kɨu n‑nadandoto ñaʼa‑ia na n‑nadandoto‑ia Cristu,
te n‑taxkanu ini Ianyuux ntdaa kuechi‑n,
te ña tuu nax jenyaʼu‑ia.
14 Kuenda kɨu n‑ndada ndoo Ianyuux kuechi n‑ka kida‑ro n‑yodotnuni.
N‑ka kida‑ro kuechi chi ñatu n‑ka jandixa‑ro ley‑ia.
Kuenda kɨu neʼe‑ia xijan juaʼan nuu n‑xitakaa dika Cristu te ijan n‑ndoo.
15 Ndaku Ianyuux nuu Kuiʼna xiʼin nuu dava ka xaloko ka taxnuni xiʼin‑i.
Kɨu n‑nandoto Cristu xa n‑xiʼí‑ia nuu curuxi,
n‑ndaku Ianyuux nuu Kuiʼna,
te ndaʼu ndaʼu n‑kendoo‑i te n‑ka xini ñayiu xa n‑ndaku‑ia nuu‑i.
Ná kida soldado xa xani yujun‑s se n‑ka tnɨɨ‑s te dakuikonuu ñaʼa‑s nuu xyuku ñayiu n‑kida Ianyuux Kuiʼna.
16 Xijan kuu xa maxku juejoon‑n xa jan tnuʼu ñaʼa ñayiu xa ka xaxi‑n ɨɨn xa ka xani ini‑i xa ñatu io vaʼa xa kaxi‑n,
ni maxku juejoon‑n xa jan tnuʼu ñaʼa‑i xa ka xiʼi‑n ɨɨn xa ka xani ini‑i xa ñatu io vaʼa xa koʼo‑n,
ni maxku juejoon‑n xa ku jan tnuʼu ñaʼa‑i xa ñatu neʼe ii‑n kɨu kuu viko,
ni xa ñatu neʼe ii‑n kɨu io yoo yɨjɨn,
ni xa ñatu neʼe ii‑n kɨu kuu sabado.
17 Kuenda kɨu juendaʼu ɨɨn yutnu kuu xa taʼu tniu ñayiu jan xa kada‑ro;
ñatu kuu‑i ná kuu mee yutnu.
Mee‑ro ntdaa‑ro,
ñayiu ka kukanu ini Cristu,
ñayiu kuu kuenda kɨu yɨkɨ kuñu‑ia ka kuu ná kuu mee yutnu.
18 Ka jaʼan ñayiu xa io xa jini uʼu‑n mee‑n,
xiʼin xa io xa ndadakaʼnu‑n ángel,
ia ka xinokuechi nuu Ianyuux,
ko maxku chinuu koio‑n xijan.
Maxku daa kada‑n chi na ñaʼa dakuita‑n taʼu‑n taxi Ianyuux.
Kakuneʼe‑i xa ka xko xini‑i espíritu,
te ka xko jaʼan espíritu jan nuu‑i.
Ka tutuku ni‑i.
Ndeʼe ka kuu iʼni‑i.
Diko ni xaloko xñuʼu anu‑i,
te ka xani ini‑i xa kada‑i xaloko.
19 Ñatuka ka kunduu‑i xiʼin Cristu,
Ia kuu kuenda kɨu dɨkɨ roo,
xa ka kuu‑ro ñayiu ka kukanu ini‑ia,
te kuenda kɨu ɨɨn ɨɨn parti yɨkɨ kuñu‑ia ka kuu‑ro.
Xaʼnu ɨɨn ɨɨn parti yɨkɨ kuñu ñayiu según janda xnetnaʼa‑i.
Kida‑ia xa chindee tnaʼa‑ro xa na kukanu ini ka‑ro‑ia.
Te kukueʼe ka‑ro juaʼan.
20 Kuenda kɨu n‑ka xiʼí‑n xiʼin Cristu na n‑xiʼí‑ia xa n‑ka dandoo‑n ntdaa xa ka taxnuni xaloko ka xikonuu ñuñayiu nuu‑n,
¿ko nakuenda xa dani ka jandixa naʼi‑n xaloko ka taxnuni nuu dava ka ñayiu ñuñayiu jan?
Duʼa taʼu tniu‑i:
21 “Maxku tnɨɨ‑n xa kuu anu‑n xa tnɨɨ‑n,
maxku kaxi‑n xa kuu anu‑n xa kaxi‑n,
ni maxku kajuʼun ndaʼa‑n xa kuu anu‑n xa tnɨɨ‑n.”
22 Duʼa ka jaʼan‑i xiʼin ñayiu ñatu ndeka Ianyuux,
ko ñadu daa jaʼan Ianyuux chi mee‑ia n‑xantuu xa juetniu ñayiu ntdaa xa ka xetniu‑ro,
te naa.
Dɨuni n‑xantuu‑ia xa kaxi xa koʼo‑ro ntdaa xa io xa kaxi‑ro,
te dɨuni naa.
23 Io ñayiu ka xani ini xa yo vaʼa ka tuʼa ñayiu n‑ka jantuu ley jan.
Dɨuni ka jaʼan‑i xa io xa jini uʼu‑ro mee‑ro xiʼin xa io xa kada uʼu‑ro mee‑ro xaxeʼe Ianyuux.
Ma kundee xijan xa kada‑i xa ma kuu ka anu ñayiu xa kada‑i xaloko.