Carta kiʼna nuu n‑kidavaʼa Spalu nuu ñayiu Tesalónica
Kidavaʼa Spalu nuu ñayiu ñuu nani Tesalónica
1
Mee‑da,
Spalu,
kidavaʼa‑da carta yaʼa xiʼin Silvanu xiʼin Timoteo.
Ka kidavaʼa‑da nuu mee‑n ka kuu ñayiu ka jandixa Jesucristu ñuu nani Tesalónica.
Ka kunduu‑n xiʼin Taa‑ro Ianyuux xiʼin Xtoʼo‑ro Jesucristu.
Na taxi‑ia xamani‑ia nuu‑n,
na kada‑ia xa kutuu vaʼa koio‑n.
Ka kuu mee‑n ɨɨn ichi kaneʼe katnɨɨ ntdaa ñayiu
2 Ntdaa kɨu ka xiaʼan‑da xa n‑kutaʼu‑da nuu Ianyuux xaxeʼe ntdaa mee‑n.
Ka najaʼan ñaʼa‑da,
hora ka xijan taʼu‑da nuu‑ia.
3 Kɨu xiʼin kɨu,
ka najaʼan ñaʼa‑da nuu Ianyuux.
Taa‑ro kuu‑ia.
Ka najaʼan ñaʼa‑da,
xa ka kida‑n xavaʼa,
xaxeʼe xa ka jandixa‑n Xtoʼo‑ro Jesucristu.
Ka najaʼan ñaʼa‑da,
xa yo vaʼa kidatniu‑n,
xaxeʼe xa ka xemani‑n Ianyuux xiʼin ñayiu.
Ka najaʼan ñaʼa‑da,
xa ka kundee ini‑n,
xaxeʼe xa xndetu‑n xa ndixi Xtoʼo‑ro Jesucristu.
4 Ñani‑da kuʼa‑da,
xemani ñaʼa Ianyuux mee‑n.
Ka xini‑da xa n‑kaxí ñaʼa‑ia mee‑n.
5 Na n‑ka kachitnuʼu‑da tnuʼu vaʼa Jesucristu,
ña n‑kachitnuʼu‑da tnuʼu duʼa ni.
N‑taxnuni Ianyuux nuu‑da,
te duʼa n‑ka kachitnuʼu‑da.
N‑kidatniu Espíritu Ii anu‑n,
xa kutnuni ini koio‑n xa ka jaʼan‑da xandaa.
Vaʼa ka xini‑n xa n‑xo tuu‑da xiʼin‑n xaxeʼe xa xemani ñaʼa‑da.
6 N‑ka kida mee‑n,
ná n‑ka kida mee‑da,
te ná n‑kida Xtoʼo‑ro Jesucristu.
Juini yo kueʼe vida n‑ka yaʼa‑n,
xaxeʼe xa n‑ka jandixa‑n tnuʼu n‑kachitnuʼu‑da,
ko dani n‑ka xeka vaʼa‑n tnuʼu jan.
Te n‑kida Espíritu Ii xa kuvete koio‑n xa kuvete koio‑n.
7 Te duʼa,
n‑ka kuu mee‑n ɨɨn ichi kaneʼe katnɨɨ ntdaa ñayiu ka jandixa Jesucristu,
distrito Macedonia xiʼin distrito Acaya.
8 Xaxeʼe mee‑n,
xá n‑ka teku ñayiu Macedonia,
xiʼin ñayiu Acaya,
xiʼin ñayiu ntdaa ɨnka ñuu,
tnuʼu Xtoʼo‑ro Jesucristu.
Ntdaa ñuu xá n‑ka teku ñayiu xa ka jandixa mee‑n Ianyuux.
Xijan kuu xa,
ña ndoñuʼu ka xa jaʼan koio mee‑da ni ɨɨn.
9 Ka jaʼan mee‑i xa n‑ka xitoniʼni ñaʼa‑da mee‑n te n‑ka xeka vaʼa ñaʼa‑n.
Ka jaʼan‑i xa n‑ka dandoo‑n santu,
xa kunduu koio‑n xiʼin Ianyuux Ndito.
Ianyuux ndaa kuu‑ia.
10 Dɨuni ka jaʼan‑i xa xndetu‑n xa ndixi Daʼya Yɨɨ Ianyuux nde andɨu.
N‑kida Ianyuux xa n‑nandoto Jesús nuu n‑kuu‑ia ndɨyɨ,
te dakaku ñaʼa Jesús mee‑ro,
hora ndundeʼe Ianyuux nuu ñayiu ñuñayiu.