Vaʼa xnaʼa‑n nax n‑kida‑da, na n‑xo tuu‑da xiʼin‑n Tesalónica
2
Ñani‑da kuʼa‑da,
ka xini‑n xa ñatu n‑ka xitoniʼni ñaʼa duʼa‑da.
2 Ka xini‑n xa yo kueʼe vida n‑ka yaʼa‑da ñuu nani Filipos,
te yo kuiʼa n‑ka jaʼan ñayiu ijan.
Te juini duʼa n‑kuu,
ko n‑ka jandixa‑da xa ñunuu ñaʼa naʼi Ianyuux,
te ña n‑ka yuʼu‑da xa juña tnuʼu ka‑da tnuʼu‑ia nuu ñayiu.
Xijan kuu xa n‑ka xee‑da ñuu‑n,
te nɨni kueʼe vida ka yaʼa‑da,
n‑ka kachitnuʼu‑da tnuʼu vaʼa Ianyuux nuu mee‑n tuku.
3 Meni xa kuu xandaa n‑jaʼan‑da.
Ña n‑ka kida‑da xa uʼu nuu‑n,
ña n‑ka dandaʼu ñaʼa‑da.
4 N‑xitotnuni ñaʼa Ianyuux mee‑da.
N‑xio‑ia confianza nuu‑da,
xa juña tnuʼu koio‑da tnuʼu vaʼa Jesucristu nuu ñayiu.
Te duʼa ka jaʼan‑da.
Ñatu ka jaʼan‑da,
xa kada‑da xa tna ini koio ñayiu,
ka jaʼan‑da,
xa kada‑da xa tna ini Ianyuux.
Xitotnuni mee‑ia anu‑da,
naʼa‑ia ntdaa xa ka kida‑da,
xiʼin ntdaa xa xani ini‑da.
5 Ka xini‑n xa nuncas ña n‑ka xetniu‑da tnuʼu vidi xa niʼi ñaʼa‑da,
te nuncas ña n‑ka dandaʼu ñaʼa‑da xa niʼi koio‑da tvini.
Naʼa Ianyuux xa duʼa n‑kuu.
6 Nuncas ña n‑ka nduku‑da xa koo koio ñayiu xañuʼu nuu mee‑da.
Ni mee‑n,
ni ɨnka ñayiu.
Se n‑tundaʼa ñaʼa Cristu ka kuu‑da,
te kuaʼa xa kada‑da xa koo koio‑n xañuʼu nuu‑da.
7 Ko ñatu duʼa ka kida‑da.
N‑ka xemani ñaʼa‑da.
Nani ñunuu vaʼa ɨɨn ñadɨʼɨ daʼya yɨjɨn‑ña,
dani n‑xo ñunuu ñaʼa mee‑da mee‑n.
8 Xaxeʼe xa ka xemani ñaʼa‑da,
n‑ka kachitnuʼu‑da tnuʼu vaʼa Ianyuux.
Te nux n‑ndoñuʼu n‑kuu,
te n‑xio anu‑da xa kuú koio‑da xaxeʼe‑n.
Chi n‑xee xa yo ka xemani ñaʼa‑da.
9 Ñani‑da kuʼa‑da,
najaʼan koio‑n nanda n‑ka kidatniu‑da.
Xnaʼa‑n xa kueʼe vida n‑ka yaʼa‑da xa kutuu‑da xiʼin‑n.
Nduu,
xakuaa n‑ka kidatniu‑da,
chi ña n‑ka juini‑da xa datnañaʼa‑da nɨni n‑ka kachitnuʼu‑da tnuʼu vaʼa Ianyuux.
10 Kuaʼa mee‑n xa jaʼan ndaa koio‑n xaxeʼe‑da,
te naʼa Ianyuux du,
ntdaa xa n‑ka kida‑da,
nɨni n‑ka xo tuu‑da xiʼin mee‑n,
ñayiu ka jandixa Jesucristu.
Meni xa juini Ianyuux n‑ka kida‑da,
n‑ka kida‑da xavaʼa.
Ni ɨɨn ñayiu ña kuaʼa xa tekuechi ñaʼa‑i.
11 Ka xini‑n xa n‑ka jaʼan‑da nuu ɨɨn ɨɨn‑n nani jaʼan ɨɨn taa nuu daʼya‑s.
N‑ka dakuaʼa ñaʼa‑da,
te n‑ka taxi‑da tnuʼu kanu ini.
12 Yo kueʼe n‑ka xijan‑da nuu‑n,
xa dandoo koio‑n kuechi‑n,
te kada koio‑n ntdaa xa juini Ianyuux.
Chi jaʼan ñaʼa‑ia,
xa kutuu koio mee‑n nuu taxnuni‑ia,
te jini koio‑n xa Ia kunxaʼnu ka kuu‑ia.
13 Xijan kuu xa,
kɨu xiʼin kɨu,
ka xiaʼan‑da xa n‑kutaʼu‑da nuu Ianyuux.
N‑ka xeka vaʼa‑n tnuʼu Ianyuux,
na n‑ka teku‑n tnuʼu jan,
hora n‑ka kachitnuʼu‑da.
N‑ka kutnuni ini‑n xa tnuʼu jan ñatu kuu tnuʼu seyɨɨ,
n‑ka kutnuni ini‑n xa xandaa xa tnuʼu Ianyuux kuu.
Te kidatniu tnuʼu jan anu ñayiu ka jandixa Ianyuux.
14 Ñani‑da kuʼa‑da,
n‑ka kida mee‑n ná n‑ka kida ñayiu ka jandixa Ianyuux distrito nani Judea.
Mee‑i tuku,
ka kunduu‑i xiʼin Cristu Jesús.
Ná n‑ka yaʼa mee‑i kueʼe vida,
xaxeʼe xa n‑ka xini uʼu ñaʼa ñayiu Israel,
da n‑ka yaʼa mee‑n kueʼe vida,
xaxeʼe xa ka xini uʼu ñaʼa ñayiu ñuu‑n.
15 N‑ka xaʼni ñayiu Israel Xtoʼo‑ro Jesús,
nani n‑ka xaʼni‑i se n‑ka xian tnuʼu tnuʼu Ianyuux nuu ñayiu xá n‑kuu kueʼe kuia.
N‑ka xijun ñaʼa ñayiu Israel mee‑da tuku.
Dani ka kida‑i xa ña tna ini Ianyuux,
te dani jantnaʼa‑i xiʼin ntdaa ñayiu.
16 Ka juini‑da xa juña tnuʼu‑da tnuʼu vaʼa Ianyuux nuu ñayiu ña ka kuu ñayiu Israel,
xa ma kuú koio‑i xiʼin kuechi‑i,
ko ña ka xejoon ñayiu Israel.
Kɨu xiʼin kɨu,
ka kida ka ñayiu Israel kuechi.
Ko vitna,
xa n‑xee hora xa ndundeʼe Ianyuux nuu mee‑i.
Kukajan ini‑da xa jini ñaʼa‑da ɨnka vuelta
17 Ñani‑da kuʼa‑da,
ka kuu‑da ná kuu ɨɨn ñadɨʼɨ hora n‑xiʼí daʼya‑ña.
Juini itaʼu ni kɨu ña yoo ka‑da xiʼin‑n,
ko yo kukajan ini‑da xa jini ñaʼa‑da.
18 Mee‑da,
Spalu,
kueʼe vuelta n‑juini‑da xa xee‑da ñuu‑n,
ko ña n‑xejoon kuiʼna xa xee‑da.
19 Xndetu‑da hora ndixi Xtoʼo‑ro Jesucristu,
chi hora ijan,
kunujuiin vaʼa koio mee‑n nuu mee‑ia,
te kuvete‑da xa kuvete‑da xaxeʼe‑n.
Kuu ná kuu xa niʼi‑da corona,
te najuen tnuʼu‑da xa najuen tnuʼu‑da xaxeʼe‑n.
20 Mee‑n ka kida xa ka xiaʼan‑da xa n‑kutaʼu‑da nuu Ianyuux.
Mee‑n ka kida xa kuvete‑da xa kuvete‑da.