3
Ña n‑kundee ini‑da xa tekutnuʼu koio‑da nanda xtuu‑n.
Xijan kuu xa n‑ka xani ini‑da xa vatuka xa ndoo meni mee‑da ñuu nani Atenas.
2 Te n‑ka tundaʼa‑da Timoteo nuu‑n.
Ñani‑ro kuu‑sɨ,
se xinokuechi nuu Ianyuux kuu‑s.
N‑kidatniu‑s xiʼin‑da,
xa juña tnuʼu‑s tnuʼu vaʼa Cristu nuu ñayiu.
N‑ka tundaʼa‑da‑sɨ,
xa chindee ñaʼa‑s mee‑n,
xa kundee ini koio‑n,
xa jandixa naʼi koio‑n Xtoʼo‑ro Jesús.
3 Ña n‑ka juini‑da xa dandoo koio‑n ni ɨɨn‑n Cristu,
hora ka xini uʼu ñaʼa ñayiu ña ka jandixa Cristu.
Vaʼa ka xini‑n xa io xa duʼa yaʼa‑ro.
4 Na n‑ka xo tuu ka‑da xiʼin‑n,
n‑ka jaʼan‑da xa io xa kueʼe vida yaʼa‑ro,
xaxeʼe xa jandixa‑ro Jesucristu,
te duʼa kuu,
nani xnaʼa‑n.
5 Ña n‑kundee ka ini‑da xa jini‑da nanda xtuu‑n.
Xijan kuu xa n‑tundaʼa‑da Timoteo,
xa kanetnuʼu‑s tnuʼu mee‑n ndixi,
nux dani ka jandixa‑n Xtoʼo‑ro Jesucristu.
N‑yuʼu‑da,
xa nada kadajuexa ñaʼa kuiʼna mee‑n,
te ma kunduu koio ka‑n xiʼin Cristu.
N‑juini‑da xa jini‑da nux dani xiniñuʼu tniu n‑ka kida‑da xaxeʼe‑n.
6 Ko vitna,
xa n‑xee Timoteo yaʼa.
Tnuʼu vaʼa neʼe‑s n‑nxee.
Jaʼan‑s xa dani ka jandixa‑n Jesucristu,
te vaʼa ka xemani‑n Ianyuux xiʼin ñayiu.
Jaʼan‑sɨ xa ntdaa kɨu ka najaʼan ñaʼa‑n,
te ka juini‑n xa jini ñaʼa koio‑n,
nani ka juini mee‑da xa jini ñaʼa‑da mee‑n.
7 Ñani‑da kuʼa‑da,
juini ka xini uʼu ñaʼa ñayiu,
te kueʼe vida ka yaʼa‑n,
ko kukaʼnu anu‑da,
xaxeʼe xa n‑ka teku‑da xa ka jandixa naʼi ka‑n Jesucristu.
8 Xaxeʼe xa ka kundee ini‑n xa kunduu naʼi koio ka‑n xiʼin Xtoʼo‑ro Jesús,
te duʼa kuu xa xtuu vaʼa mee‑da.
9 ¿Nanda kuaʼa xa nachiyaʼu koio‑da nuu Ianyuux?
Ka xiaʼan‑da xa ka xiaʼan‑da xa n‑kutaʼu‑da nuu‑ia,
xaxeʼe mee‑n.
Kuvete‑da xa kuvete‑da nuu Ianyuux.
Ia jandixa‑ro kuu‑ia.
10 Nduu,
xakuaa ka xijan taʼu‑da nuu Ianyuux xaxeʼe‑n.
Yo kueʼe ka xijan taʼu‑da,
xa nanitnaʼa nuu‑ro mee‑n xiʼin mee‑da.
Ka juini‑da xa chindee ñaʼa‑da,
xaxeʼe xa ndoñuʼu ka‑n,
xa jandixa vaʼa koio ka‑n Ianyuux.
11 Na kada Ianyuux xa nanitnaʼa nuu‑ro ɨnka vuelta.
Na chindee ñaʼa Taa‑ro Ianyuux xiʼin Xtoʼo‑ro Jesús,
xa kotoniʼni ñaʼa‑da.
12 Na kada Xtoʼo‑ro Jesús xa juemani tnaʼa koio‑n xa juemani tnaʼa koio ka‑n,
ɨɨn‑n xiʼin ɨka‑n.
Na kada‑ia xa juemani koio‑n ntdaa ñayiu.
Na kada‑ia xa juemani tnaʼa koio mee‑n,
ná ka xemani ñaʼa mee‑da mee‑n.
13 Na kada Xtoʼo‑ro Jesús xa kundee ini koio‑n.
Ndixi‑ia,
xiʼin ntdaa ñayiu n‑kida dɨɨn‑ia xa ku kuu koio‑i ñayiu mee‑ia.
Na ndixi‑ia,
te kunujuiin koio mee‑n nuu Ianyuux.
Ianyuux jandixa‑ro kuu‑ia.
Taa‑ro Ianyuux kuu‑ia.
Na kada Xtoʼo‑ro Jesús xa kada koio‑n xa juini Ianyuux,
na kada‑ia xa hora ijan ni,
ni ɨɨn ñayiu ma kuaʼa xa tekuechi ñaʼa‑i nuu mee‑ia.