Carta kuu uu n‑kidavaʼa Spalu nuu ñayiu Tesalónica
Kidavaʼa Spalu nuu ñayiu ñuu nani Tesalónica
1
Mee‑da,
Spalu,
kidavaʼa‑da carta yaʼa,
xiʼin Silvano xiʼin Timoteo.
Ka kidavaʼa‑da nuu mee‑n ka kuu ñayiu ka jandixa Jesucristu ñuu nani Tesalónica.
Ka kunduu‑n xiʼin Taa‑ro Ianyuux xiʼin Xtoʼo‑ro Jesucristu.
2 Na taxi‑ia xamani‑ia nuu‑n,
na kada‑ia xa kutuu vaʼa koio‑n.
Na ndixi Cristu, te ndadandaa Ianyuux ñayiu ka kida xa uʼu
3 Ñani‑da kuʼa‑da,
kɨu xiʼin kɨu,
io xa juñaʼa koio‑da xa n‑kutaʼu‑da nuu Ianyuux xaxeʼe‑n.
Te vatuka xa duʼa ka kida‑da,
chi kueʼe xa kueʼe ka jandixa‑n Xtoʼo‑ro Jesucristu,
te kueʼe xa kueʼe ka xemani tnaʼa‑n,
ɨɨn‑n xiʼin ɨnka‑n.
4 Xijan kuu xa najuen tnuʼu ñaʼa‑da nuu ntdaa ñayiu ka jandixa Ianyuux.
Najuen tnuʼu ñaʼa‑da,
chi ka kundee ini‑n xa jandixa koio ka‑n Jesucristu.
Juini ka xini uʼu ñaʼa ñayiu mee‑n,
ko ka jandixa naʼi‑n,
te juini kueʼe vida ka yaʼa‑n,
ko ka kundee ini naʼi‑n.
5 Duʼa xini‑ro xa kada Ianyuux xavaʼa,
hora ndadandaa‑ia ntdaa xa io.
Hora ijan,
jaʼan‑ia xaxeʼe mee‑n.
Jaʼan‑ia xa vaʼa n‑ka kida‑n,
te jaʼan‑ia xa taxnuni koio mee‑n xiʼin mee‑ia nuu taxnuni‑ia.
Xaxeʼe xaʼa,
kuu xa kueʼe vida ka yaʼa‑n vitna.
6 Meni xavaʼa kida Ianyuux.
Xijan kuu xa kada‑ia xa kueʼe vida yaʼa koio ñayiu ka kida xa kueʼe vida ka yaʼa mee‑n.
7 Kueʼe vida ka yaʼa‑n vitna,
ko kada Ianyuux xa kutuu vaʼa koio mee‑n xiʼin mee‑da nuu taxnuni‑ia.
Duʼa koo,
na ndixi Xtoʼo‑ro Jesús nde andɨu.
Kixee‑ia xiʼin ángel,
ia ka xinokuechi nuu‑ia,
ia ka kunxaʼnu.
Kixee‑ia nuu yanuʼu koko.
8 Te yo ndeʼe ku kuu‑ia,
hora ndadandaa‑ia ñayiu ña ka xini Ianyuux,
ñayiu ña jandixa tnuʼu vaʼa Xtoʼo‑ro Jesús.
9 Kada uʼu Ianyuux ñayiu jan.
Kuia ma jɨn ndɨʼɨ,
yaʼa koio‑i ntdaa xa kada ñaʼa‑ia.
Ma kutuu ñayiu jan xiʼin Xtoʼo‑ro Jesús.
Ma kɨu koio‑i nuu taxnuni Ia kunxaʼnu ka.
10 Na ndixi Xtoʼo‑ro Jesús,
kɨu ijan,
te ñayiu n‑kida dɨɨn‑ia,
ñayiu mee‑ia,
juñaʼa koio‑i xa n‑kutaʼu‑i nuu‑ia.
Ntdaa ñayiu n‑ka jandixa‑ia,
ndadakaʼnu‑i‑ia.
Mee‑n tuku,
chi n‑ka jandixa‑n‑ia,
na n‑ka jaʼan‑da xaxeʼe‑ia.
11 Xijan kuu xa,
kɨu xiʼin kɨu,
ka xijan taʼu‑da nuu Ianyuux xaxeʼe‑n.
Ka xijan taʼu‑da xa jaʼan Ianyuux xa vaʼa n‑kida‑ia,
hora n‑jaʼan ñaʼa‑ia mee‑n xa kunduu koio‑n xiʼin‑ia.
Taxnuni‑ia nuu ntdaa xa io.
Xijan kuu xa ka xijan taʼu‑da xa kada‑ia xa jɨn tnaʼa ntdaa xavaʼa ka juini‑n xa kada‑n,
te ka xijan taʼu‑da xa kada‑ia xa daxinokava koio‑n ntdaa tniu ka kida‑n xaxeʼe xa ka jandixa‑n‑ia.
12 Te duʼa kada koio mee‑n xa jini koio ntdaa ñayiu xa Ia kunxaʼnu ka kuu Xtoʼo‑ro Jesucristu.
Te taxnuni koio mee‑n xiʼin mee‑ia.
Duʼa koo,
xaxeʼe xamani taxi Taa‑ro Ianyuux xiʼin Xtoʼo‑ro Jesucristu.