Carta kiʼna nuu n‑tundaʼa Spalu nuu Timoteo
N‑ndajan tnuʼu Spalu Timoteo
1
Ruʼu,
Spalu,
kuu‑r se n‑tundaʼa ñaʼa Cristu Jesús xa juña tnuʼu‑r ñayiu xa n‑jaʼan‑ia ñuu xiʼin ñuu chi daa n‑taʼu tniu Taa‑ro Ianyuux,
Ia dananitaʼu ñaʼa.
Dɨuni daa n‑taʼu tniu Cristu Jesús,
Ia xndetu‑ro.
Xandaa xakuiti ndixi‑ia.
2 Tundaʼa‑r carta yaʼa juan xee nuu‑n,
Timoteo.
Xaxeʼe xa n‑dakuaʼa ñaʼa‑r,
xijan kuu xa n‑kukanu ini‑n Cristu Jesús.
Kuenda kɨu daʼya yɨɨ‑r kuu ñaʼa xaxeʼe xijan.
Xijan taʼu‑r nuu Ianyuux xiʼin nuu Cristu Jesús,
Ia kuu Xtoʼo‑ro xa na chindee chituu ñaʼa‑ia xiʼin xa na kundaʼu ini ñaʼa‑ia.
Dɨuni xijan taʼu‑r nuu‑ia xa na ku kundaa ku kuvatu anu‑n chi n‑natu ini‑n xa n‑kida‑n kuechi.
Maxku chinuu‑n xa ña ndaa
3 Xijan taʼu ntuku‑r nuu‑n xa na kutuu naʼi‑n Éfeso de na n‑xijan taʼu‑r nuu‑n xa kiʼna xa ndoo‑n dian na n‑kee‑r xa vaxi‑r Macedonia.
Kutuu naʼi xa na taʼu tniu‑n nuu dava ñayiu dian xa maxku jaʼan koio ka‑i nuu dava ka ñayiu ɨɨn xa ña ndaa.
4 Ni maxku chinuu koio‑i cuentu n‑ka xo xani ini mee xixitna‑i,
ni maxku nduku tnuʼu koio‑i nuu jundu n‑ka xo kuu tadɨʼɨ xixitna‑i chi ma kɨu xa jɨn ndɨʼɨ xijan nux dani na kuu kada‑i.
Diko ni dajantnaʼa ñaʼa cuentu jan,
te ñatu kachitnuʼu ñaʼa tnuʼu jaʼan‑ro nuu ñayiu dakuaʼa‑ro na kuaʼa na kukanu ini koio‑i Cristu Jesús.
5 Taʼu tniu‑r nuu‑n xa jaʼan‑n nuu ñayiu ka kukanu ini Cristu Jesús xndaxio dian xa na juemani‑i ɨnka ñayiu,
te na ku kuvaʼa anu‑i nuu‑i.
Na ku kukanu ini naʼi‑i Cristu Jesús,
te na koo ndaa na koo kuiti anu‑i.
6 Dava ñayiu ñatuka xemani‑i ɨnka ñayiu.
Ka jantnaʼa tnuʼu‑i te diko ni daka niʼno tnaʼa‑i.
7 Ka tna ini dava ñayiu xa dakuaʼa‑i ñayiu ka kukanu ini Cristu Jesús xa n‑chidotnuni Moisés chi ka jaʼan‑i xa vaʼa ka tuʼa‑i,
ko ña ka kutnuni ini‑i xa n‑chidotnuni‑s juini ka dakuaʼa‑i ñayiu xa n‑chidotnuni‑s.
8 Xá ka xini‑ro xa vaʼa ley n‑chidotnuni Moisés,
te io xa jandixa‑ro.
9 Ka xini‑ro xa ñadu xaxeʼe xa vaʼa ñayiu n‑xe koo ley n‑chidotnuni Moisés,
chi n‑xe koo xaxeʼe xa ka kida ñayiu davaʼa nga xa ka juini mee‑i.
N‑xe koo‑i xaxeʼe xa ka kuxe ini ñayiu nuu Ianyuux.
N‑xe koo‑i xaxeʼe xa ñatu xndaxio‑i xañuʼu nuu‑ia,
xaxeʼe xa kida‑i xaloko xaduʼa.
Dani n‑xe koo‑i xaxeʼe xa xaʼni‑i taa‑i,
xaʼni‑i dɨʼɨ‑i,
xaʼni‑i ñayiu.
Io xa kaʼu ntdaa ñayiu yaʼa ley n‑chidotnuni Moisés,
te io xa jandixa koio‑i.
10 Dani n‑xe koo ley xaxeʼe ñayiu n‑ka tnundaʼa xndaa xiʼin ɨnka ñayiu,
xaxeʼe se xndaa xiʼin tnaʼa seyɨɨ‑s,
xaxeʼe se ka diko ñayiu ka kidatniu duʼa,
xaxeʼe ñayiu vete,
xaxeʼe ñayiu n‑ka kida ɨɨn kuechi,
te ka jaʼan‑i nuu juxtixia xa ña tuu nax n‑ka kida‑i te ka chinaa‑i Ianyuux du.
Dɨuni n‑xe koo ley xaxeʼe ñayiu dadaʼan xa maxku jandixa dava ka ñayiu xa ka jaʼan‑ro nuu‑i.
Ɨɨn xandaa kuu.
11 Nakaxtnaʼa xa kakuneʼe‑r ya xiʼin xa dakuaʼa‑ro ñayiu vaxi.
Na najuen tnuʼu‑ro Ianyuux nuu ñayiu,
te ndadakaʼnu‑ro‑ia.
N‑kukanu ini ñaʼa‑ia xa jaʼan‑r xaʼa nuu ñayiu.
Ɨɨn xavaʼa kuu.
Na jaʼan‑ro xa n‑kutaʼu‑ro nuu Ianyuux chi kundau ini ñaʼa‑ia
12 Na kutaʼu‑r nuu Cristu Jesús,
Ia kuu Xtoʼo‑ro,
xa kuaʼa‑r kada‑r tniu‑ia.
N‑taxtutniu ñaʼa‑ia chi n‑kukanu ini ñaʼa‑ia xa junukuechi‑r nuu‑ia.
13 N‑xo jan kuiʼa‑r Jesús te n‑xo kida uʼu‑r ñayiu n‑ka kukanu ini‑ia.
Ɨɨn se loko n‑xo kuu‑r chi ma kachi ini‑r,
ko n‑kundaʼu ini ñaʼa Ianyuux chi ta kukanu ini ka‑r Cristu daa.
Daxa ta jini ka‑r jundu kuu‑ia.
14 N‑chindee n‑chituu ñaʼa Ianyuux.
Yo chindee ñaʼa‑ia.
N‑kida‑ia xa n‑kukanu ini‑r Cristu Jesús,
te dɨuni n‑kida‑ia xa nduu‑r se mani ini.
15 Io xa jandixa ntdaa ñayiu xa Jesús kuu Cristu te n‑kixi‑ia ñuñayiu xa nanitaʼu‑ro xiʼin ntaka dava ñayiu chi ntdaa‑ro xiʼin‑i ka kida kuechi.
Xandaa kuu xaʼa.
Ruʼu kuu ɨɨn se kueʼe ka kuechi n‑kida.
16 Xaxeʼe xa ndaʼu ini Cristu Jesús,
n‑taxkanu ini‑ia xa n‑kida‑r juini kueʼe xa n‑kida‑r.
N‑taxkanu ini‑ia xa n‑kida‑r xa na jini ñayiu ta kukanu ini ka‑ia xa ndaʼu ini‑ia,
te dani taxkanu ini‑ia‑i,
juini kueʼe xa n‑ka kida‑i tuku.
Kutuu koio‑ro xiʼin‑ia nuu tuu‑ia nɨkava nɨkuita.
17 Ma kɨu ma ñuu kuú‑ia,
te io xa taxnuni‑ia nɨkava nɨkuita.
Ña kanda ndeʼa‑ro‑ia.
Idii ni‑ia io.
Io xa najuen tnuʼu‑ro ntdaa‑ro xiʼin ñayiu ñuñayiu‑ia.
Nɨkava nɨkuita na kada‑ro xijan.
Amén.
18 Mani juini ñaʼa‑r,
Timoteo chi kuenda kɨu daʼya yɨɨ‑r kuu ñaʼa.
Nakaxtnaʼa xa taʼu tniu‑r xa kada‑n ya xiʼin xa xá n‑ka jaʼan se n‑ka jaʼan tnuʼu Ianyuux nuu‑n.
Nux jandixa‑n xa jaʼan‑r te jandixa‑n xa n‑ka jaʼan se ijan,
ndaku‑n xa kada naʼi‑n tniu Ianyuux.
19 Kukanu ini naʼi‑n Cristu Jesús.
Maxku ñaʼa kada‑n na kuaʼa maxku kune ini‑n.
Dava seyɨɨ,
kueʼe xa ka kida‑s,
te ñatuka ka kukanu ini‑s Cristu Jesús.
20 Himeneo kuu ɨɨn‑s,
Alejandro kuu ɨnka‑s.
Dɨuni kuiʼa n‑ka jaʼan‑s Ianyuux,
te n‑xejoon‑r xa n‑xeka ñaʼa Kuiʼna xa na dakuaʼa koio‑s.