Janda nakuetu koio ñayiu ka kukanu ini Jesucristu nuu Ianyuux, te janda kajan taʼu koio‑i
2
Taʼu tniu‑r nuu‑n xa jaʼan‑n nuu ñayiu ka kukanu ini Cristu Jesús xa na najaʼan koio‑i Ianyuux xiʼin xa na kajan taʼu koio‑i xa na kutuu vii kutuu vaʼa ntdaa ñayiu.
Dɨuni na jaʼan koio‑i nuu‑ia xa vaʼa‑ia chi xko chindee‑ia‑i.
2 Na kajan taʼu koio‑i nuu Ianyuux xa na taxnuni vaʼa koio se ka taxnuni xiʼin ntdaa se ka kuu juxtixia na kuaʼa na kutuu vii kutuu vaʼa koio‑ro.
Na kada koio‑ro xiʼin‑i xa juini Ianyuux,
te na kava ñukax ini tniu‑ro.
3 Tna ini Ianyuux,
Ia dakaku ñaʼa xaʼa chi ɨɨn xavaʼa kuu.
4 Juini‑ia xa kaku nandɨkaa nandituʼu ñayiu xiʼin xa najini koio‑i nax kuu xa ndaa.
5 Idii ni Ianyuux io te idii ni Ia iñi xeʼe‑ro io.
Kuu‑ia Cristu Jesús te n‑kuu‑ia ñayiu.
6 N‑xejoon‑ia xa n‑ka xaʼni ñaʼa ñayiu loko xa n‑chiyaʼu‑ia kuechi‑ro.
Te daa n‑yaʼa kɨu n‑xantuu Ianyuux.
Te n‑ka xini ñayiu xa duʼa n‑kuu.
7 N‑tundaʼa ñaʼa Cristu Jesús xa jaʼan‑r nuu ñayiu ñatu ka kuu ñayiu Israel xa n‑chiyaʼu‑ia kuechi‑ro ntdaa‑ro xiʼin‑i.
Dɨuni n‑tundaʼa ñaʼa‑ia xa jaʼan‑r nuu‑i xa na kukanu ini koio‑i‑ia te na jini‑i nax kuu xandaa.
Ndaa jaʼan‑r,
ñatu vete‑r.
8 Dɨuni taʼu tniu‑r nuu‑n xa jaʼan‑n nuu se ka kukanu ini Cristu Jesús xa na kajan taʼu koio‑s nuu Ianyuux davaʼa nga nuu xtuu‑s.
Hora na dandaa ndaʼa‑s xa kajan taʼu‑s,
maxku ku kiti ini‑s,
ni maxku kajan taʼu koio‑s hora ka jantnaʼa tnuʼu‑s xiʼin ñayiu.
9 Dɨuni juini‑r xa jaʼan‑n nuu ñadɨʼɨ xa na kundix kudaʼu‑ña daʼma natau xiʼin‑ña.
Na kava nxaʼnu daʼma kuiʼno‑ña.
Maxku yo kadakutu‑ña mee‑ña.
Maxku kukutu‑ña oro a perla.
Maxku yo naʼa dandee‑ña yoo‑ña,
ni maxku kuiʼno‑ña daʼma yo yaʼu.
10 Naa xa kadakutu koio‑ña mee‑ña na kada koio‑ña xavaʼa ná ka kida ñá ka xinokuechi nuu Ianyuux.
11 Hora dakuaʼa ɨɨn seyɨɨ ñayiu ka kukanu ini Cristu Jesús n‑ka nataka,
nanini na kunini koio‑ña.
Maxku chitnaʼa‑ña.
Ndaʼu ndaʼu na kunini koio‑ña.
12 Ñatu tna ini‑r xa dakuaʼa ɨɨn ñadɨʼɨ se ka kuu seyɨɨ ka kukanu ini Cristu Jesús nuu ka nataka ñayiu ka kukanu ini‑ia ni maxku taxnuni‑ña nuu‑s.
Nanini na kunini‑ña hora ka dakuaʼa‑s‑yɨ a hora ka taʼu tniu‑s nuu‑i.
13 Na kunuu seyɨɨ chi kiʼna nuu n‑kidavaʼa Ianyuux Adán,
ijan dada n‑kidavaʼa‑ia Eva.
14 Daxa ñadu Adán n‑dandaʼu ñaʼa Kuiʼna chi Eva n‑dandaʼu‑i,
te xaxeʼe xijan n‑kuu‑ña ñayiu n‑kida kuechi.
15 Kueʼe vida ka yaʼa‑ña hora ka xajan‑ña daʼya,
ko ma kuú‑ña nux kukanu ini‑ña Cristu Jesús,
nux xemani‑ña Ianyuux,
nux kida‑ña xa juini‑ia,
nux kunxaʼnu‑ña du.