Se taxnuni nuu ñayiu ka kukanu ini Jesucristu xiʼin se nkonetniu xa junukuechi‑s nuu‑i
3
Se juini xa nkonetniu‑s xa taxnuni‑s nuu ñayiu ka kukanu ini Cristu Jesús te junuu‑s‑yɨ,
tniu vaʼa juini‑s xa kuneʼe‑s.
Ñatu jaʼan vete‑r chi ɨɨn xandaa kuu.
2 Se juini xa kada‑s tniu yaʼa,
kidayɨka‑i xa ku kuu‑s ɨɨn se io ñayiu xañuʼu nuu‑s,
chi kuu‑s se vaʼa.
Na ku kuu‑s se idii ni ñadɨʼɨ io.
Dɨuni na ku kuu‑s se kunxaʼnu,
se kuñukax ini xiʼin se xitondee ñayiu ka xeʼen nukee nuveʼe‑s.
Na ku kuu‑s se tuʼa vaʼa na kuaʼa daa na dakuaʼa‑s ñayiu.
3 Na ku kuu‑s se ñatu xiʼi xa nde xini‑s.
Maxku ku kuu‑s se ma kachi ini,
se jantnaʼa.
Na ku kuu‑s se jan vii jan vaʼa,
se tuu mani xiʼin ñayiu.
Maxku ku kuu‑s se yo kajan ini tvini.
4 Dɨuni na ku kuu‑s se yɨndaʼa vaʼa familia‑s xiʼin se ka jandixa ñaʼa daʼya‑s,
te xndaxio‑i xañuʼu nuu‑s
5 chi nux ña kuaʼa ɨɨn seyɨɨ xa kɨndaʼa‑s daʼya‑s,
ma kada‑s xa kɨndaʼa‑s ñayiu ka kukanu ini Cristu Jesús.
6 Ɨɨn se dijan n‑kixeʼe xa kukanu ini‑s Cristu Jesús,
maxku kɨndaʼa‑s ñayiu ka kukanu ini‑ia na ñaʼa yo ku ku iʼni‑s te kada‑s kuechi te kada uʼu ñaʼa Ianyuux ná kada uʼu‑ia Kuiʼna.
7 Kidayɨka‑i xa ku kuu‑s se io ñayiu ñatu ka kukanu ini Cristu Jesús xañuʼu nuu‑s chi nux ñatu kuu‑s se xndaxio ñayiu ijan xañuʼu nuu‑s,
kuiʼa jaʼan‑i‑sɨ,
te kuvete Kuiʼna.
8 Dani se nkonetniu xa junukuechi‑s nuu ñayiu ka kukanu ini Cristu Jesús,
ndoñuʼu xa ku kuu‑s se io ñayiu xañuʼu nuu‑s.
Na ku kuu‑s ɨɨn se ɨɨn ni tnuʼu.
Maxku ku kuu‑s se tuʼa ndɨdɨ́,
ni maxku ku kuu‑sɨ se tnɨɨ tvini ñayiu.
9 Na ku kuu‑s se jandixa xa ɨɨn xandaa kuu xa ka jandixa ñayiu ka kukanu ini Cristu Jesús.
Na ku kuu‑s se ña tuu nax kida xa kune ini‑s.
10 Kiʼna ka na kototnuni ñayiu ka kukanu ini Cristu Jesús se nduku‑i xa junukuechi‑s nuu‑i.
Nux vaʼa kida‑s,
na nkonetniu‑s.
11 Na ku kuu ñadɨʼɨ se tetutniu‑n,
ñá xndaxio ñayiu xañuʼu nuu‑ña,
te maxku ku kuu‑ña ɨɨn ñá jan tnuʼu ñayiu.
Dɨuni na ku kuu‑ña ɨɨn ñá ña xiʼi xa nde xini‑ña.
Na ku kuu‑ña ñá kukanu ini‑n xa vaʼa kada‑ña tniu io xa kada‑ña.
12 Kidayɨka‑i xa ku kuu se junukuechi ya se io idii ni ñadɨʼɨ,
se yɨndaʼa vaʼa daʼya‑s xiʼin dava ka ñayiu xtuu nukee nuveʼe‑s.
13 Nux vaʼa ka xinokuechi ɨɨn se xinokuechi,
vaʼa ka tniu kuneʼe‑s,
te kuyɨɨ‑s xa jaʼan‑s nuu ñayiu xa kukanu ini‑s Cristu Jesús.
14 Nu xaku kɨu xe kotoniʼni ñaʼa‑r,
15 ko xa kachitnuʼu ñaʼa‑r nax io xa jaʼan‑n nuu ñayiu ka kukanu ini Ianyuux ndixa,
n‑kidavaʼa‑r tutu yaʼa juan xee nux kukuee‑r xa xee‑r.
Ñayiu yaʼa dani ka jandixa‑i xa xandaa kuu tnuʼu n‑jaʼan Ianyuux,
te mee ni xandaa ka jaʼan‑i nuu ɨnka ñayiu hora ka dakuaʼa‑i‑yɨ.
16 Xandaa xakuiti ña ka xini vaʼa‑ro nax juini Ianyuux xa kada‑ro xa na jandixa ka‑ro‑ia.
Cristu kuu Ia n‑kuu ñayiu,
te n‑ka xini ñaʼa ñayiu ñuñayiu xiʼin ángel,
ia ka xinokuechi nuu Ianyuux.
N‑jaʼan Espíritu Ianyuux xa ni ɨɨn kuechi ñatu n‑kida Cristu.
Xitendodo xa n‑jaʼan‑ia xiʼin xa n‑kida‑ia nación xiʼin nación juaʼan.
Te ka jandixa ñayiu xa kuu‑ia Ianyuux.
Te juan ndaa‑ia andɨu nuu ndukaʼnu‑ia.