Carta kuu uu n‑tundaʼa Spalu nuu Timoteo
Ndajan tnuʼu Spalu Timoteo
1
Ruʼu,
Spalu,
kuu‑r se n‑tundaʼa ñaʼa Cristu Jesús xa jaʼan‑r nuu ñayiu xa n‑jaʼan‑ia.
Daa n‑juini Taa‑ro Ianyuux.
N‑jaʼan‑ia xa kutuu‑ro xiʼin‑ia nɨkava nɨkuita xaxeʼe xa kunduu‑ro xiʼin Cristu Jesús.
2 Tundaʼa‑r carta yaʼa juan xee nuu‑n,
Timoteo.
Xaxeʼe xa n‑dakuaʼa ñaʼa‑r,
xijan kuu xa n‑kukanu ini‑n Cristu Jesús.
Kuenda kɨu daʼya yɨɨ‑r kuu ñaʼa xaxeʼe xijan,
te xemani ñaʼa‑r.
Xijan taʼu‑r nuu Taa‑ro Ianyuux xiʼin nuu Cristu Jesús,
Ia kuu Xtoʼo‑ro xa na chindee chituu ñaʼa‑ia xiʼin xa na kundaʼu ini ñaʼa‑ia.
Dɨuni xijan taʼu‑r nuu‑ia xa na ku kundaa ku kuvatu anu‑n chi n‑natu ini‑n xa n‑kida‑n kuechi.
Io xa jaʼan Timoteo nuu ñayiu xa n‑kida Cristu Jesús
3 Ná n‑xo xinokuechi xixitna‑ro nuu Ianyuux daa xinokuechi‑r nuu‑ia,
te ña kune ini‑r xa xinokuechi‑r nuu‑ia chi ña tuu nax kida‑r.
Ntnaʼa vuelta xko xijan taʼu‑r nuu Ianyuux xiaʼan‑r:
“Na kutaʼu‑da,
Taa‑ro Ianyuux xa n‑kida‑n xa n‑kukanu ini ñaʼa Timoteo.”
Nduu xakuaa xijan taʼu‑r,
4 te najaʼan‑r xa xko ndaʼi‑n.
Hora najaʼan‑r xa xko ndaʼi‑n,
kuu anu‑r xa xe kotoniʼni ñaʼa‑r xa na kuvete‑r.
5 Naʼa‑r xa xandaa xakuiti kukanu ini‑n Cristu Jesús,
te ñatu xe tnɨɨ ini‑r.
Kukanu ini‑n Jesús ná kukanu ini Loida,
ñá kuu dɨxaʼnu‑n xiʼin Eunice,
ñá kuu dɨʼɨ‑n Ianyuux.
6 Xaxeʼe xijan na jaʼan‑r nuu‑n xa kada naʼi‑n tniu n‑jaʼan Ianyuux xa kada‑n.
Koo ini‑n koo anu‑n kada‑n tniu‑ia.
Na n‑xajan ndodo‑r ndaʼa‑r dɨkɨ‑n,
n‑jaʼan‑ia xa kada‑n tniu‑ia,
te kida‑ia xa kida‑n tniu xko kida‑n.
7 Kada tniu‑ia chi n‑kida‑ia xa ñatu kuu‑ro ñayiu io.
Chindee ñaʼa‑ia xa ñatu yuʼu‑ro xa jaʼan‑ro nuu ñayiu xa n‑jaʼan‑ia.
Dɨuni kida‑ia xa xemani‑ro ñayiu,
te ñatu kundee Kuiʼna xa dajaʼan ñaʼa‑i xa kada‑ro xaloko xaduʼa.
8 Xijan kuu xa maxku yuʼu‑n xa kakuneʼe‑n Cristu Jesús,
Ia kuu Xtoʼo‑ro nuu ñayiu,
ni maxku kujanuu‑n xa kakuneʼe‑n‑ia nuu‑i,
ni maxku kujanuu‑n xa yɨndiʼu‑r xaxeʼe‑ia.
Ndaʼu yaʼa ruʼu xaxeʼe xa kakuneʼe‑r xa n‑jaʼan Ianyuux.
Nux ndaʼu yaʼa‑n ná yaʼa‑r xaxeʼe‑ia,
maxku kundu ini‑n chi kada‑ia xa ndaku‑n xa kakuneʼe naʼi‑n‑ia.
9 N‑dakaku ñaʼa‑ia te n‑kaxi ñaʼa‑ia xa ku kuu‑ro daʼya‑ia.
N‑kaxi ñaʼa‑ia xaxeʼe xa xemani ñaʼa‑ia xiʼin xaxeʼe xa vaʼa‑ia xiʼin xaxeʼe xa daa n‑juini‑ia;
ñadu xaxeʼe xa kida‑ro ɨɨn xavaʼa.
Ndena ta nkavatuu ka ñuñayiu n‑ñu ini Ianyuux xa kaxí ñaʼa‑ia.
Dɨuni n‑ñu ini‑ia xa kuú Jesús,
Ia kuu Xtoʼo‑ro xaxeʼe‑ro.
10 Xaxeʼe xa ndaʼu ini Ianyuux xiʼin xaxeʼe xa vaʼa‑ia n‑kida‑ia xa n‑ka xini‑ro Cristu Jesús na n‑kixi‑ia ñuñayiu,
te mee‑ia kuu Ia n‑kida xa ñatu n‑teʼyu yɨkɨ kuñu Jesús na n‑yɨnduxi‑ia.
Dɨuni kada‑ia xa kɨu na nandoto koio roo,
ñayiu ka kukanu ini‑ia xa kuú‑ro,
ma kuu ka xa teʼyu yɨkɨ kuñu‑ro chi ma kuú‑ro ɨnka vuelta te nɨkava nɨkuita kutuu‑ro xiʼin‑ia.
Ka xian tnuʼu‑ro ñayiu nax kada‑i xa nanitaʼu‑i xa na kuaʼa kutuu koio‑i xiʼin‑ia nɨkava nɨkuita.
11 N‑tundaʼa ñaʼa Ianyuux xa jaʼan‑r xaʼa nuu ñayiu;
n‑kaxi ñaʼa‑ia xa ku kuu‑r se dakuaʼa‑i.
12 Te xaxeʼe xijan yɨndiʼu‑r te ndaʼu yaʼa‑r,
ko ñatu kujanuu‑r xa yɨndiʼu‑r xaxeʼe xa n‑kukanu ini‑r xa junuu‑ia xa n‑taxndee‑r‑ia.
Xini‑r jundu kuu‑ia te n‑kukanu ini‑r‑ia.
13 Dakuaʼa ñayiu xa n‑dakuaʼa ñaʼa‑r;
maxku kakuneʼe‑n ɨɨn xa ña ndaa na kuaʼa na jini‑i xa kukanu ini‑n Cristu Jesús xiʼin xa xemani‑n‑yɨ.
Ndaku‑n xa dani kukanu ini‑n‑ia xiʼin xa dani juemani‑n ñayiu chi kunduu‑n xiʼin‑ia.
14 Maxku tuku jaʼan‑n nuu ñayiu hora dakuaʼa‑n‑yɨ.
N‑jaʼan Ianyuux nuu‑n xa jaʼan‑n tnuʼu‑ia nuu‑i.
Ɨɨn xavaʼa kuu xijan.
Na chindee ñaʼa Espíritu Ianyuux ñuʼu ñaʼa hora na dakuaʼa‑n‑yɨ.
15 Xa naʼa‑n xa ntdaa ñayiu ka kukanu ini Cristu Jesús ñuu xndatuu Asia n‑ka dandoo ñaʼa.
Ɨɨn‑s nani Figelo te ɨnka‑s nani Hermógenes
16 Na kundaʼu ini Ianyuux Onesíforo xiʼin familia‑s.
Na chindee ñaʼa‑ia chi kueʼe vuelta n‑taxi‑s xa n‑ndoñuʼu‑r,
te ña kujanuu‑s xa yɨndiʼu‑r xaxeʼe Cristu Jesús.
17 Na n‑kixi‑s Roma n‑nanduku ñaʼa‑s xa nde na n‑naniʼi ñaʼa‑s.
18 Na kundaʼu ini ñaʼa Ianyuux kɨu na ndixi Cristu Jesús.
Vaʼa ka naʼa mee‑n xa yo n‑chindee ñaʼa‑s na n‑xo tuu‑s Éfeso.