Carta n‑tundaʼa Spalu nuu Tito
Ndajan tnuʼu Spalu Tito
1
Ruʼu,
Spalu,
se xinokuechi nuu Ianyuux tundaʼa carta yaʼa juan xee nuu‑n,
Tito.
Dɨuni kuu‑r se n‑tundaʼa ñaʼa Jesucristu xa jaʼan‑r nuu ñayiu n‑kaxi Ianyuux xa n‑jaʼan‑ia xa na kuaʼa na kukanu ini koio‑i Jesucristu xiʼin xa na jini koio‑i ndeda xa kuu xandaa te kada koio‑i xavaʼa.
2 Nux na jandixa koio‑i Jesucristu,
kutuu‑i nuu tuu Ianyuux nɨkava nɨkuita na nandoto‑i xa kuú‑i.
Ndena ta nkavatuu ka ñuñayiu n‑jaʼan Ianyuux,
Ia jaʼan ndaa,
xa kutuu koio‑ro xiʼin‑i nuu tuu‑ia nɨkava nɨkuita.
3 Ianyuux,
Ia dananitaʼu ñaʼa,
n‑xantuu‑ia kɨu kixeʼe ñayiu xa jaʼan‑i tnuʼu yaʼa nuu dava ka ñayiu.
Na n‑ka kixeʼe‑i xa jaʼan‑i xijan,
n‑taʼu tniu‑ia xa jaʼan‑r nuu ɨnka ñayiu xijan tuku.
N‑kukanu ini ñaʼa‑ia.
4 Kuenda kɨu daʼya‑r kuu ñaʼa,
Tito,
xaxeʼe xa n‑dakuaʼa ñaʼa‑r,
te n‑kukanu ini‑n Jesucristu.
Tniu kida Tito Creta
Xijan taʼu‑r nuu Taa‑ro Ianyuux xiʼin nuu Cristu Jesús,
Ia dananitaʼu ñaʼa,
xa na chindee chituu ñaʼa‑ia nduu‑ia.
Dɨuni xijan taʼu‑r nuu‑ia xa na ku kundaa ku kuvatu anu‑n chi n‑natu ini‑n xa n‑kida‑n kuechi.
5 N‑dandoo ñaʼa‑r Creta de xaxeʼe xa na kada ndɨʼɨ‑n xa n‑kendoo ka xa kada‑ro xiʼin xa kaxí‑n se taxnuni koio nuu ñayiu ka kukanu ini Cristu Jesús ntaka ñuu nuu xndaxio ñayiu ka kukanu ini‑ia.
Kada nani n‑jaʼan‑r xa kada‑n.
6 Se nduku‑n xa taxnuni‑s nuu ñayiu kukanu ini‑ia,
na ku kuu‑s se ña tuu na tnuʼu io.
Maxku ku kuu‑s se io uu ñadɨʼɨ.
Na taxnuni se nduku‑n nuu ñayiu jan nux kukanu ini daʼya‑s Cristu Jesús xiʼin nux ñatu kutnuʼu xa ka ndandita‑s nuu‑s xiʼin nux ñayo jaʼan xa ñatu ka kunxaʼnu‑s.
7 Kidayɨka‑i xa ku kuu se taxnuni nuu ñayiu ka kukanu ini‑ia ɨɨn se ña tuu na tnuʼu io chi tniu Ianyuux kada‑s.
Io xa ku kuu‑s se ñatu xe ini,
ɨɨn se ñatu yachi kiti ini.
Maxku ku kuu se taxnuni nuu ñayiu ka kukanu ini‑ia ɨɨn se xiʼi.
Maxku ku kuu‑s se ma kachi ini,
se jantnaʼa,
ni maxku ku kuu‑sɨ se tnɨɨ tvini ñayiu.
8 Na ku kuu se nduku‑n xa taxnuni‑s nuu ñayiu ka kukanu ini Cristu Jesús ɨɨn se xitondee ñayiu ka xeʼen nukee nuveʼe‑s,
ɨɨn se ñu ini xa kada‑s mee ni xavaʼa,
ɨɨn se kunxaʼnu,
ɨɨn sevaʼa,
ɨɨn se kida xa juini Ianyuux,
ɨɨn se ndedi ini hora kuu anu‑s xa kada‑s ɨɨn xaloko.
9 Na taxnuni ɨɨn se nduku‑n nux xandaa xakuita jandixa‑s xa ɨɨn xandaa kuu xa n‑dakuaʼa‑ro‑s xiʼin dava ka ñayiu,
te na dakuaʼa‑s ɨnka ñayiu.
Na jaʼan‑s nuu ñayiu ka jan tnuʼu ñaʼa ndeda xa ka jaʼan‑i kuu xa ñatu nakaxtnaʼa xiʼin xa n‑jaʼan Cristu Jesús,
te na daxino ini‑s‑yɨ.
10 Duʼa na kada‑s chi yo xndaxio ñayiu ka kuxe ini nuu dava se ka taxnuni nuu ñayiu ka kukanu ini Cristu Jesús.
Te ka dandaʼu‑i ñayiu ka dakuaʼa‑i chi mee ni tnuʼu vete ka jaʼan‑i nuu‑i.
Ñatu ka dakuaʼa‑i‑yɨ ɨɨn xa ñukax ini.
Kueʼe ñayiu ka kuu yatnuʼu Israel duʼa ka kida.
11 Maxku juejoon koio se ka taxnuni nuu ñayiu ka kukanu ini Cristu Jesús xa daa kada ñayiu ijan chi daka niʼno‑i ñayiu ka dakuaʼa‑ro.
Nɨkee nɨveʼe ñayiu daka niʼno‑i.
Ñatu ka dakuaʼa‑i ñayiu xa dakuaʼa‑ro‑i chi tuku xa ka dakuaʼa‑i‑yɨ.
Xa na niʼi‑i tvini ka dakuaʼa‑i‑yɨ.
Duʼu‑i ñayiu xa duʼa kida‑i.
12 Mee ɨɨn se Creta n‑xo dakuaʼa ñayiu n‑jan tnuʼu ñayiu ñuu‑s.
Duʼa n‑jaʼan‑s:
“Yo unu vete ñayiu Creta.
Yo unu loko‑i.
Ndeʼe ka xaxi‑i.
Te unu kudi‑i.”
13 Te ndaa n‑jaʼan‑s.
Kanandee‑n ñayiu tuku dakuaʼa ɨnka ñayiu jan te juñaʼa‑n nuu‑i xa na jandixa‑i xa dakuaʼa‑ro ñayiu vaxi.
Ɨɨn xandaa kuu xijan.
14 Maxku chinuu‑n cuentu n‑ka xani ini mee xixitna ñayiu Israel,
ni xa ka taʼu tniu ñayiu ñatu ka jandixa xa n‑jaʼan Jesús.
Ɨɨn xa ndaa n‑jaʼan Jesús.
15 Ñayiu vaʼa,
mee ni xavaʼa ñu ini‑i xa kada‑i,
te ma kani ini loko‑i,
ni ma nduu‑i ñayiu loko.
Ñayiu ñuʼu xaloko anu,
mee ni xaloko ka xani ini‑i,
te ma kada xaloko ka xani ini‑i jan xa nduu‑i ñayiu vaʼa.
Ñatu ka jandixa‑i Cristu Jesús.
Mee ni xane xayichi ka xani ini‑i,
te ña tuu nax kuu anu‑i.
16 Ka jaʼan‑i xa kunduu‑i xiʼin Ianyuux,
ko xaxeʼe xa ka kida‑i xaloko xaduʼa,
ña ndaa xa kunduu‑i xiʼin‑ia.
Kueʼe xane xayichi ka kida‑i.
Ɨɨn xa januu kuu.
Ka kuxe ini‑i nuu Ianyuux.
Ñatu ndaku‑i xa kada‑i ɨɨn xavaʼa.
Daa juñaʼa‑n ñayiu.