4
1-2 Taʼu tniu‑r nuu‑n xa maxku dakuita‑n xa jaʼan‑n nuu ñayiu xa n‑jaʼan Ianyuux.
Nani jaʼan‑n nuu ñayiu ka juini xa kunini koio‑i xa n‑jaʼan‑ia,
dani jaʼan‑n xijan nuu ñayiu ña ka juini xa kunini koio‑i xijan.
Jaʼan‑n nuu‑i nax kuu kuechi ka kida‑i.
Jan doʼo‑n‑yɨ xa maxku kada ka‑i kuechi,
te dɨuni jaʼan‑n nuu‑i nax kada koio‑i.
Vivii dakuaʼa‑n‑yɨ;
maxku kukiti ini‑n nuu‑i.
Nini Ianyuux xiʼin Cristu Jesús,
Ia ndadandaa kuechi ntdaa roo,
ñayiu io vitna xiʼin kuechi ñayiu xa n‑ka xiʼí xa xaʼa taʼu tniu‑r nuu‑n.
Kixi Cristu Jesús ɨnka vuelta ñuñayiu xa taxnuni‑ia.
3 Xaʼa jaʼan‑n nuu ñayiu vitna chi xee kɨu kunini koio ñayiu xa kuu ini mee‑i,
te ma kachi ka‑i xa kunini‑i xa jaʼan‑ro.
Ɨɨn xandaa kuu xijan.
Nanduku koio‑i kueʼe maestru kakuneʼe xa ka tna ini mee‑i,
te kada koio‑i xa kuu ini mee‑i.
4 Ma kachi ka‑i xa jaʼan‑ro nuu‑i xa n‑jaʼan Ianyuux.
Ɨɨn xandaa kuu xijan.
Kunini koio‑i cuentu n‑ka xani ini mee xixitna‑i.
5 Ndoʼo,
maxku kada‑n ɨɨn xa ñatu natau.
Kada nde ini‑n hora ndaʼu yaʼa‑n.
Jaʼan nuu ñayiu nax io xa kada‑i xa na nanitaʼu‑i,
te kada‑n ntdaa tniu n‑taxi Ianyuux.
6 Xaʼa jaʼan‑r nuu‑n vitna,
te io xa chinuu vaʼa‑n xa jaʼan‑r chi vax kuyatni xa kuú‑r xaxeʼe Ianyuux.
Doko‑r mee‑r nuu‑ia.
7 Ndaʼu n‑xo yaʼa‑r xa n‑kida‑r ntdaa tniu n‑taxi‑ia,
ko n‑kida naʼi‑r.
Dani kukanu ini‑r Cristu Jesús;
ñatu n‑dandoo‑r‑ia.
Kuenda kɨu ɨɨn se n‑xeʼen dava,
te n‑ndaku‑s kuu‑r xa n‑kida‑r ntdaa tniu n‑taxi‑ia,
8 te taxi Ia kuu Xtoʼo‑ro,
Ia ndadandaa kuechi‑ro,
ɨɨn xa taxi‑ia na xee kɨu chi kida‑r xa juini‑ia.
Kidandaa‑ia hora ndadandaa‑ia kuechi‑ro.
Ñadu ruʼu ni niʼi xa taxi‑ia chi dɨuni niʼi ntdaa ñayiu ka kuvete xa ndixi‑ia.
N‑jaʼan Spalu xa kada Timoteo xa mani juini‑s
9 Kundu ini‑n ki kotoniʼni ñaʼa‑n.
Maxku kukuee‑n.
10 Ndoñuʼu ñaʼa‑r chi n‑dandoo ñaʼa Demas xaxeʼe xa yo n‑kukajan ini‑s xa io ñuñayiu,
te juan nuʼu‑s Tesalónica.
Se kuu Crescente juan nuʼu Galacia,
te Tito juaʼan Dalmacia.
11 Sluka nga tuu xiʼin‑r.
Kandeka‑n Smarku kixi na kuaʼa na junukuechi‑r nduu‑r xiʼin‑s nuu Ianyuux.
12 Se nani Tíquico,
n‑natundaʼa‑r‑sɨ juan naxee Éfeso de.
13 Kaneʼe‑n capa‑r n‑dandoo‑r Troas veʼe ɨɨn se nani Carpo kixi xiʼin ntaka rollo tutu xiʼin rollo ñɨɨ xyodotnuni tnuʼu‑r kixi.
Mee ni rollo ñɨɨ kaneʼe‑n kixi nux ma kuu xa kaneʼe‑n ntdaa rollo jan kixi chi xijan yo ndoñuʼu ka‑r.
14 Alejandro,
se kuu herrero,
n‑dadaʼan‑s xa dakuaʼa‑r dava ñayiu.
Juñaʼa Ianyuux taʼu‑s chi kueʼe xa n‑kida ñaʼa‑s.
15 Koo‑n cuedado nuu‑s ná io mee‑r cuedado chi dadaʼan‑s xa dakuaʼa‑ro ñayiu xa n‑jaʼan Cristu Jesús.
Vichi dadaʼan‑s.
16 Na n‑dadaʼan niʼno‑r mee‑r nuu juxtixia xa kiʼna nuu,
ni ɨɨn ñayo n‑chindee ñaʼa.
Ntdaa se xinitnaʼa xiʼin‑r n‑ka dandoo ñaʼa.
Na taxkanu ini Ianyuux xa daa n‑ka kida ñaʼa‑s.
17 N‑ka dandoo ñaʼa‑s,
ko ña n‑dandoo ñaʼa Ianyuux Ia kuu Xtoʼo‑ro.
N‑chindee ñaʼa‑ia xa n‑kakuneʼe‑r‑ia nuu ñayiu.
Ntdaa ñayiu ña ka kuu yatnuʼu Israel n‑ka teku xa n‑kaku‑r nuu ngaʼa chi n‑chindee ñaʼa Ianyuux.
18 Mayo ka kada uʼu ñaʼa chi nakueka ñaʼa‑ia.
Kutuu‑r nuu taxnuni‑ia.
Juan kɨu juan ñuu io xa ndadakaʼnu‑ro‑ia.
Nuncas ma jɨn ndɨʼɨ xa ndukaʼnu‑ia.
Amén.
Ndajan tnuʼu Spalu ñayiu ka kukanu ini Cristu Jesús xndaxio nuu tuu Timoteo
19 Ndajan tnuʼu‑r Priscila xiʼin Áquila xiʼin familia Onesíforo.
20 Erasto,
tuu‑s Corinto.
Trófimo,
kuʼu‑s.
N‑dandoo‑r‑sɨ Mileto.
21 Kundu ini‑n kixi‑n na kuaʼa xa kutuu‑n yaʼa dadaa xee‑ro yoo vixi.
Ndajan tnuʼu ñaʼa Eubulo xiʼin Pudente.
Dɨuni ndajan tnuʼu ñaʼa Lino xiʼin Claudia xiʼin ntdaa ka se ka kukanu ini Cristu Jesús.
22 Na kunduu‑n xiʼin Ianyuux,
Ia kuu Xtoʼo‑ro.
Na chindee chituu ñaʼa‑ia,
Timoteo.