Janda ku kuu ñayiu na kuyatni xa naa ñuñayiu
3
Kunaʼa xa yo ndaʼu yaʼa ñayiu tiempo na kuyatni xa naa ñuñayiu.
2 Mayo ka ñayiu kachi ndaʼu nuu tnaʼa chi mee nga‑i jun ini‑i.
Yo vichi kukajan ini koio ñayiu jan tvini,
te ku jaʼan iʼni koio‑i,
te ku kuu‑i ñayiu xe ini.
Dɨuni kuiʼa jaʼan koio‑i Ianyuux.
Ma jandixa koio‑i tadɨʼɨ‑i.
Ni ma jaʼan koio‑i nuu Ianyuux:
“Na kutaʼu‑da,
Taa‑ro”,
ni ma koo‑i xañuʼu nuu‑ia.
3 Ma juemani koio‑i ɨnka ñayiu,
ni familia‑i ma kundaʼu ini‑i.
Jantnaʼa koio‑i,
te ma ndumani koio‑i.
Tekuechi neñuu koio‑i ɨnka ñayiu.
Mee ni xaloko kada‑i chi ma kundedi ini‑i.
Ndundeʼe koio‑i hora na jan doʼo ñaʼa ɨnka ñayiu.
Jini uʼu koio‑i ñayiu kada xavaʼa.
4 Diko koio‑i ñayiu n‑ka xo kumani xiʼin‑i.
Ma yuʼu koio‑i xa kaʼni koio‑i ndɨyɨ a xa kada‑i ɨnka xa kada‑i.
Xaxeʼe xa kutuu vaʼa koio‑i ku kuu koio‑i ñayiu xe ini.
Vaʼa ka ku kuu anu‑i xa kada‑i xa juini koio mee‑i dada xa kada‑i xa juini Ianyuux.
5 Jaʼan nga‑i xa jandixa‑i Ianyuux,
ko ña ndaa xa jandixa‑i‑ia,
chi ma najaʼan koio‑i‑ia xa na kuaʼa na chindee ñaʼa‑ia.
Maxku kandeka tnaʼa‑n xiʼin ñayiu io vitna ka kida na kada ñayiu ijan.
6 Ka kɨu ñayiu yaʼa veʼe ñá lilu,
ñá kueʼe xa n‑ka kida,
xa dajaʼan ñaʼa‑i xa kada koio ka‑ña xaloko xaduʼa,
te ka xejoon‑ña chi ka tna ini‑ña xa kada‑ña xijan.
7 Ndɨkɨu ndɨñuu ka dakuaʼa ñá yaʼa ɨɨn xa ka dakuaʼa‑ña,
ko ma uun jini‑ña ndeda xa kuu xandaa.
8 Ná n‑ka kida se n‑xo nani Janes xiʼin se n‑xo nani Jambres xa n‑ka jaʼan‑s nuu ñayiu xa maxku jandixa‑i xa n‑jaʼan Moisés,
daa ka kida ñayiu yaʼa vitna xa ka dadaʼan‑i xa jaʼan‑ro nuu ñayiu ka dakuaʼa‑ro ndeda xa kuu xa ndaa.
Mee ni xaloko xaduʼa xñuʼu anu‑i.
N‑xika yata Ianyuux nuu‑i xaxeʼe xa ñatu jandixa‑i‑ia.
9 Juini ka dadaʼan‑i xa jaʼan‑ro xijan nuu ñayiu,
ko xee xa ma dadaʼan ka‑i chi jini ñayiu xa ñayiu lilu ka kuu‑i.
Yaʼa koio‑i na n‑ka yaʼa nduu se ña n‑ka jandixa Moisés.
Jaʼan Spalu nuu Timoteo na tniu io xa kada‑s
10 Xini vaʼa‑n nax dakuaʼa‑r ñayiu,
Timoteo.
Dɨuni xini‑n janda xko kuu‑r,
te naʼa‑n nax n‑xo kuu anu‑r xa kada‑r.
Xini‑n xa kukanu ini‑r Ianyuux.
Xini‑n xa ñatu yachi ini‑r,
te xemani‑r ñayiu.
Dɨuni xini‑n xa kunde ini‑r hora ndaʼu yaʼa‑r.
11 Koto na n‑ka kida uʼu ñaʼa ñayiu ñuu Antioquía,
Iconio,
Listra du xaxeʼe Cristu Jesús.
Ndaʼu n‑yaʼa‑r ijan,
ko n‑kundee ini‑r.
¡Naka kueʼe xa n‑ka kida ñaʼa ñayiu!
Ko ñatu n‑xaʼni ñaʼa‑i chi n‑chindee ñaʼa Ianyuux,
Ia kuu Xtoʼo‑ro.
12 Ntdaa ñayiu ka kida xa juini Ianyuux te ka kunduu‑i xiʼin Cristu Jesús,
yo ndeʼe ndaʼu ka yaʼa‑i.
13 Ñayiu loko,
kueʼe ka xa ka kida‑i juaʼan.
Dani ñayiu ka dandaʼu ɨnka ñayiu,
dandaʼu ka‑i‑yɨ vaxi.
Nani kuu xa ka dandaʼu‑i ñayiu,
dani dandaʼu ñaʼa koio ñayiu.
14 Kajan anu‑n xa jandixa naʼi‑n xa jandixa‑n vaxi.
Chinuu naʼi xa n‑dakuaʼa‑n chi xa naʼa‑n jundu n‑dakuaʼa ñaʼa.
15 Ndena luchi‑n kaʼu‑n tnuʼu Ianyuux xyodotnuni,
te kutnuni ini‑n nax kuu xa yodotnuni.
Tnuʼu Ianyuux yodotnuni kachitnuʼu ñaʼa nax kada‑n xa nanitaʼu‑n.
Xa kada‑n xa nanitaʼu‑n kuu xa kukanu ini‑n Cristu Jesús.
16 N‑jaʼan Ianyuux nax chidotnuni dava se ñuñayiu,
te n‑ka xo chidotnuni‑s.
Ntdaa tnuʼu Ianyuux xyodotnuni n‑ka chidotnuni‑s.
Vaʼa xa kakuneʼe‑ro tnuʼu Ianyuux n‑ka chidotnuni‑s nuu ñayiu dakuaʼa‑ro.
Dɨuni vaʼa xa kakuneʼe‑ro xaʼa hora jan doʼo‑ro‑i.
Dani vaʼa xa kakuneʼe‑ro tnuʼu‑ia nuu ñayiu n‑kida ɨɨn kuechi chi natu ini‑i.
Xaxeʼe xijan ka jandixa‑ro‑ia,
17 te dɨuni xaxeʼe xijan ka kida roo xa ka kuu‑ro ñayiu kukanu ini Cristu Jesús xavaʼa.