2
Xaxeʼe xa chindee chituu ñaʼa Cristu Jesús,
kadayɨka mee‑n xa kada ka‑n tniu‑ia.
Kuenda kɨu daʼya‑r kuu ñaʼa,
Timoteo.
2 Xa n‑jaʼan‑r nuu‑n xiʼin nuu kueʼe ñayiu n‑ka nataka ɨɨn vuelta,
xijan juñaʼa‑n nuu se n‑dakuaʼa‑n kukanu ini‑n xa na dakuaʼa koio‑s ñayiu.
3 Ndaʼu yaʼa‑ro nduu‑ro,
ko kada nde ini.
Kada kuenda xa ɨɨn soldado ndaʼu yaʼa kuu‑n.
4 Ɨɨn se kuu soldado,
mee ni tniu n‑xiaʼan se taxtnuni nuu‑s,
kida‑s;
ñatu kida‑s tniu se xitu ñuʼu a ɨnka tniu.
Mee ni tniu n‑xiaʼan se ijan kida‑s xa na kuaʼa na tna ini ñaʼa‑s.
5 Dɨuni ka kuu‑ro ná ka kuu se ka dadɨkɨ.
Juini n‑ndaku ɨɨn se n‑dadɨkɨ,
ko ma niʼi‑s corona‑s nux ña n‑dadɨkɨ‑s xiʼin se n‑dadɨkɨ xiʼin‑s ná io ná juaʼan.
6 Dɨuni ka kuu‑ro ná kuu ɨɨn se n‑dadaʼu trɨu.
Mee‑s io xa nakueka‑s xa n‑dadaʼu‑s nuu ñuʼu‑s,
ñadu ɨnka ñayiu.
7 Xaʼa kuu xa jaʼan‑r te kani ini vaʼa nu nax kuu xa jaʼan‑r.
Na taxi Taa‑ro Ianyuux,
Ia kuu Xtoʼo‑ro xaxtnuni xa kutnuni ini‑n ntdaa xaʼa.
8 Maxku kande ini‑n Jesucristu,
Ia n‑xiʼí te n‑nandoto‑ia.
Daʼya dana David kuu‑ia.
Xaʼa kuu xa jaʼan‑r nuu ñayiu.
Tnuʼu vaʼa kuu.
9 Xaxeʼe xa jaʼan‑r xaʼa nuu ñayiu,
kida uʼu ñaʼa dava ka ñayiu te kueʼe vida yaʼa‑r,
diko cadena ndijun‑r.
Ná ndijun se n‑xaʼni ndɨyɨ ndijun‑r,
ko ñatu ndijun tnuʼu Ianyuux.
10 Juini ndaʼu yaʼa‑r,
ko kunde ini‑r xa na nanitaʼu ñayiu n‑kaxi Ianyuux xiʼin Cristu Jesús xa ku kuu‑i daʼya‑ia xiʼin xa na kutuu‑i andɨu nuu io mee ni xa vili xndaa te yaʼu nɨkava nɨkuita.
11 Nux ka xiʼí‑ro xaxeʼe Cristu Jesús kutuu‑ro xiʼin‑ia.
12 Nux ka kundee ini‑ro hora ndaʼu yaʼa‑ro xaxeʼe‑ia,
taxnuni‑ro xiʼin‑ia.
Nux na jaʼan‑ro xa ña xini‑ro‑ia,
jaʼan‑ia xa ñatu xini ñaʼa‑ia tuku.
13 Juini ma kukanu ini ka‑ro‑ia ná n‑jaʼan‑ro,
ko mee‑ia kada naʼi‑ia xa n‑jaʼan‑ia xa kada‑ia,
chi Ianyuux kuu‑ia,
te xaxeʼe xa kuu‑ia Ianyuux ma kuu xa tuku ku jaʼan‑ia te tuku ku kada‑ia.
Ɨɨn xandaa kuu xaʼa.
Ndaku Timoteo xa dakuaʼa‑s ñayiu ka kukanu ini Jesucristu
14 Nadajaʼan‑n se ka dakuaʼa ñayiu ka kukanu ini Cristu Jesús dian xaʼa.
Jan doʼo‑n‑sɨ,
te kunini Ianyuux.
Jaʼan‑n nuu‑s xa maxku jantnaʼa tnuʼu‑s hora ñatu ka kuu ɨnuu‑s chi ña tuu nax kineʼe‑ro nux daa kida‑ro.
Xaxeʼe tnuʼu ka kakuneʼe‑s hora ka jantnaʼa tnuʼu‑s nuu xyuku ñayiu daka niʼno‑s‑yɨ,
te ma jandixa ka‑i Cristu Jesús.
15 Vaʼa kada tniu Ianyuux na kuaʼa na jaʼan‑ia xa kendoo vaʼa tniu‑n,
te ma kune ini‑n.
Ndukundee kada‑n tniu‑ia.
Nux duʼa na kada‑n,
ndaku‑n dakuaʼa‑n ñayiu,
te mee ni xandaa jaʼan‑n.
16 Ñadu xa daa cuentu ña ndandɨʼɨ ka ndatnuʼu dava ñayiu ku jandixa‑n chi ñadu kuenda Ianyuux kuu xijan.
Ka dandoo ñayiu ijan Ianyuux xiʼin ley‑ia vaxi.
17 Xitendodo cuentu ka jaʼan‑i juaʼan ná xitendodo ndɨʼyɨ.
Nuu ñayiu yaʼa yɨtnaʼa Himeneo xiʼin Fileto.
18 Vaʼa n‑ka xo jandixa nduu se yaʼa xa tnuʼu Ianyuux kuu ɨɨn xandaa,
ko ñatuka daa ka jaʼan‑s vitna.
Ka jaʼan‑s xa xá n‑ka nandoto ndɨyɨ n‑ka xiʼí.
Duʼa kuu xa ka daka niʼno‑s dava ñayiu,
te ñatuka ka kukanu ini‑i Cristu Jesús.
19 Duʼa n‑chidotnuni ɨɨn se n‑xo kakuneʼe Ianyuux:
“Xini Ianyuux janda ka kuu ñayiu ndeka‑ia.”
Dɨuni yodotnuni:
“Na dandoo ntdaa ñayiu jaʼan xa kukanu ini‑i Jesucristu xaloko ka kida‑i.”
Ná kuu xa n‑xe kodotnuni nuu ɨɨn yuu nukoo kutu kuu xa n‑chidotnuni‑s chi ma naa xijan.
20 Na jaʼan ntuku‑r ɨnka tnuʼu yaʼa.
Ñadu mee ni kɨdɨ oro xiʼin kɨdɨ plata io ɨɨn veʼe kaʼnu se kuika chi dɨuni nevaʼa‑s koʼo yutnu xiʼin kɨdɨ ñuʼu.
Kɨdɨ oro xiʼin kɨdɨ plata tnaa‑s xa yaʼu xiʼin xa ñukax ini,
te koʼo yutnu xiʼin kɨdɨ ñuʼu tnaa‑s xa ña xiniñuʼu ka.
21 Nux ma kada ka‑ro kuechi ku kuu‑ro ná ka kuu kɨdɨ xñuʼu xa ñukax ini jan,
te kada Ianyuux xa nduu‑ro ñayiu ii.
Junukuechi‑ro nuu‑ia,
te idii ni vuelta kajan‑ro anu‑ro xa kada‑ro mee ni xavaʼa.
22 Jun ini‑n xa maxku kada‑n yɨka kuechi,
vitna kuu‑n solteru,
chi ɨɨn se kuu solteru,
yo kuu anu‑s xa kada‑s kuechi ñuñayiu.
Kadayɨka mee‑n xa kada‑n xavaʼa na ka kida ñayiu n‑ka ndundoo n‑ka ndunini te ka xijan taʼu‑i nuu Ianyuux.
Dɨuni kadayɨka xa kukanu ini naʼi‑n xiʼin‑i Cristu Jesús xiʼin xa juemani koio‑n ñayiu.
Na kutuu vii kutuu vaʼa koio‑n xiʼin‑i.
23 Maxku danuu‑n cuentu ñatu kuu cuentu ñukax ini ka kakuneʼe xa n‑ka yaʼa xixitna‑n ka ndatnuʼu dava ñayiu,
chi ñatu ndaa xijan.
Xa naʼa‑n xa diko ni ka jantnaʼa tnuʼu ñayiu xaxeʼe cuentu ijan.
24 Vivii na jaʼan ɨɨn se xinokuechi nuu Ianyuux nuu ñayiu,
te maxku jantnaʼa tnuʼu‑s xiʼin‑i.
Io xa ku kuu ɨɨn se xinokuechi nuu Ianyuux se vaʼa kuaʼa xa dakuaʼa‑s ñayiu.
Dɨuni io xa ku kuu‑s ɨɨn se ñatu yachi ini.
25 Na dakuaʼa‑s ñayiu ka jaʼan xa ñatu jaʼan ndaa‑s hora dakuaʼa‑s ɨnka ñayiu chi kudana kada Ianyuux xa natu ini ñayiu ijan xa daa n‑ka jaʼan‑i,
te jini koio‑i ndeda xa kuu xandaa.
26 Natu ini‑i xa n‑ka kida‑i xa n‑juini Kuiʼna xa kada‑i,
te ma kundeka ñaʼa ka‑i.
Duʼa na kada‑s na kuaʼa na kada‑i xa juini Ianyuux.