Carta n‑tundaʼa Spalu nuu Filemón
Ndajan tnuʼu Spalu Filemón
1
Daña Spalu,
se yɨndiʼu xaxeʼe Cristu Jesús,
tundaʼa‑da xiʼin ñani‑ro Timoteo carta yaʼa juan xee nuu ndixi,
Filemón.
Mani ka juini ñaʼa‑da.
Ntdaa‑ro ka kida tniu Ianyuux.
2 Dɨuni tundaʼa‑da carta yaʼa juan xee nuu ñayiu ka kukanu ini Cristu ka nataka kutu veʼe‑n xiʼin nuu Arquipo,
se xinokuechi nuu Cristu na xinokuechi ɨɨn soldado nuu se taxnuni nuu‑s xiʼin nuu kuʼa‑ro Apia,
ñá kukanu ini Cristu xiʼin‑ro tuku.
3 Xijan taʼu‑da xa na chindee chituu ñaʼa Taa‑ro Ianyuux xiʼin Jesucristu,
Ia taxnuni nuu‑ro.
Xijan taʼu‑da nuu‑ia xa na kada‑ia xa na ku kundaa ku kuvatu anu koio‑n chi n‑ka natu ini‑n xa n‑ka kida‑n kuechi.
Kukanu ini Filemón Jesús, te xemani‑s‑ia
4 Ntnaʼa najaʼan ñaʼa‑da hora xijan taʼu‑da nuu Ianyuux,
xiaʼan‑da xa n‑kutaʼu‑da nuu‑ia.
5 Xko xiaʼan‑da xa n‑kutaʼu‑da nuu‑ia chi xko teku‑da xa xemani‑n Jesús,
Ia taxnuni nuu‑ro xiʼin nuu ñayiu ka kukanu ini‑ia.
Dɨuni xko xiaʼan‑da xa n‑kutaʼu‑da nuu‑ia xaxeʼe xa dani kukanu ini‑n‑ia xiʼin xaxeʼe xa jandixa‑n xa xandaa xakuiti ka kukanu ini ñayiu dian Jesús.
6 Dɨuni xijan taʼu‑da xa hora na jaʼan‑n nuu ñayiu xa kukanu ini‑n Jesucristu xiʼin xa n‑jaʼan‑ia,
na jaʼan‑n nuu‑i xa yo kueʼe xa kineʼe koio‑ro xaxeʼe xa kunduu‑ro xiʼin‑ia.
7 Yo vichi kudɨ ini‑da te kukaʼnu anu‑da xaxeʼe xa xemani‑n ñayiu n‑kida Ianyuux xa n‑ka nduu‑i ñayiu ii,
te dɨuni kida‑n xa ka kukaʼnu anu‑i,
Ñani.
Kakuneʼe Spalu Onésimo
8 Xaxeʼe xijan xiʼin xaxeʼe xa n‑tundaʼa ñaʼa Cristu,
kuyɨɨ‑da xa kidajuexa ñaʼa‑da xa kada‑n ɨɨn xa io xa kada‑n,
ko ñatu kuu ini‑da xa kadajuexa‑da xa kada‑n xa io xa kada‑n
9-10 xaxeʼe xa xemani ñaʼa‑da.
Kakuneʼe‑da Onésimo,
se kuu kuenda kɨu daʼya‑da xaxeʼe xa ñatu ka kuu‑s ná n‑xo kuu‑s xaxeʼe xa n‑xian tnuʼu‑da‑s nax io xa kada‑s xa nanitaʼu‑s.
Nuu yɨndiʼu‑da ya n‑jaʼan‑da xaʼa nuu‑s.
Daña,
kuu‑da ndaʼa xeʼe Cristu Jesús,
te yɨndiʼu‑da xaxeʼe‑ia.
11 Ñatuka kidatniu Onésimo nuu‑n vitna,
ko kineʼe‑n ɨɨn xa kineʼe‑n xaxeʼe xa kada‑s ɨɨn xa kada‑s na naxee‑s dian.
Dani daña,
chindee ñaʼa‑s.
12 Kukoʼyo ini‑da xa juan naxee‑s nuu‑n chi yo xemani‑da‑s.
13 N‑juini‑da xa kutuu ka‑da xiʼin‑s,
xa junukuechi ka‑s nuu‑da nɨni kɨndiʼu ka‑da,
xaxeʼe xa ña yoo ndixi xa junukuechi‑n nuu‑da.
Yɨndiʼu‑da xaxeʼe xa n‑jaʼan‑da nuu ñayiu nax io xa kada‑i xa nanitaʼu‑i.
14 Xaxeʼe xa ñatu n‑jaʼan‑n xa nu kutuu ka‑da xiʼin‑s a ñaʼa,
xijan kuu xa natundaʼa‑da‑s juan naxee.
Nux na kachi‑n xa na kutuu ka‑da xiʼin‑s,
kutuu ka‑da xiʼin‑s,
te nux ñaʼa ma taxnuni‑da nuu‑n.
15 Vaa xa na kutuu‑n xiʼin‑s nɨkava nɨkuita andɨu,
n‑kee‑s veʼe‑n ɨɨn tiempo.
16 Nakueka‑n‑sɨ,
ko ñadu xa ku kadatniu duʼa ka‑s nuu‑n.
Ku kuvaʼa anu‑n nuu‑s chi ndandɨʼɨ‑s vitna xaxeʼe xa dɨuni kukanu ini‑s Cristu.
Yo xemani‑da‑s,
ko io xa juemani ka‑n‑sɨ xaxeʼe xa n‑kidatniu‑s nuu‑n xiʼin xaxeʼe xa ka kunduu‑n xiʼin‑s xiʼin Cristu.
17 Nani kuvaʼa anu‑n nuu‑da xaxeʼe xa kukanu ini‑ro Cristu,
dani io xa ku kuvaʼa anu‑n nuu‑s.
18 Nux nax n‑kida ñaʼa‑s a nux tau‑s nuu‑n,
ndajan yaʼu ñaʼa‑n mee‑da.
19 Xiʼin ndaʼa mee daña Spalu,
chidotnuni‑da nuu tutu yaʼa xa nachiyaʼu‑da xa tau‑s.
Tau‑n nuu‑da chi kutuu‑n andɨu xaxeʼe xa n‑kachitnuʼu ñaʼa‑da nax kada‑n xa nanitaʼu‑n,
ko naa xa jaʼan‑da xa chiyaʼu ñaʼa‑n,
duʼa kakuneʼe mee‑da xa nachiyaʼu‑da xa tau‑s nuu‑n.
20 Kada tnaʼa‑n xa juini‑da chi ka kunduu‑ro xiʼin Cristu,
Ia taxnuni nuu‑ro,
na kuaʼa na kukaʼnu anu‑da,
Ñani.
Ka ndajan tnuʼu se xyɨndiʼu kaʼnu xiʼin Spalu Filemón
21 Kukanu ini‑da xa jandixa ñaʼa‑n.
Kukanu ini‑da xa ñadu xijan ni kada‑n chi kueʼe ka xa kada‑n.
22 Ɨnka ntuku xa juini‑da.
Juini‑da xa kada tuʼa‑n ɨɨn nuu kutuu‑da chi ñu ini‑da xa xee‑da dian.
Ñu ini‑da xa xee‑da chi ka xijan taʼu‑n nuu Ianyuux xa na xee‑da.