Carta n‑kuaʼa nuu ñayiu Israel
Xiʼin Daʼya Yɨɨ‑ia, n‑jaʼan Ianyuux nuu‑ro
1
Xá n‑kuu kueʼe kuia n‑jaʼan Ianyuux nuu taxaʼnu tnetnu‑ro.
Kueʼe vuelta n‑tundaʼa‑ia se ka jaʼan tnuʼu‑ia nuu ñayiu jan,
te ɨɨn ɨɨn vuelta,
n‑ka teku ñayiu jan itaʼu itaʼu tnuʼu Ianyuux.
2 Ko vitna,
kɨu vax ndɨʼɨ ntdaa xa io,
n‑tundaʼa Ianyuux Daʼya Yɨɨ‑ia n‑kixee ñuñayiu,
xa jaʼan Ianyuux nuu‑ro.
Xiʼin Daʼya Yɨɨ‑ia n‑kidavaʼa Ianyuux ntdaa xa io.
Te n‑kida Ianyuux xa ntdaa xa io,
kuu kuenda Daʼya Yɨɨ‑ia.
3 Dandeʼa ñaʼa Daʼya Yɨɨ Ianyuux,
xa Ia kunxaʼnu ka,
Ia taxnuni nuu ntdaa xa io,
kuu Ianyuux.
Na jini‑ro Daʼya Yɨɨ Ianyuux,
jini‑ro Ianyuux,
chi nani kuu Ianyuux,
dani kuu Daʼya Yɨɨ‑ia.
Ndeka vaʼa Daʼya Yɨɨ Ianyuux ntdaa xa io,
xiʼin tnuʼu‑ia taxnuni‑ia nuu ntdaa xa io.
Na n‑xiʼí‑ia,
n‑chiyaʼu‑ia kuechi‑ro,
n‑kida‑ia xa n‑ndundoo‑ro.
Te dada n‑nukoo‑ia ndaʼa kuaʼa Ianyuux,
te ijan taxnuni‑ia nuu taxnuni Ianyuux andɨu.
Kunxaʼnu ka Daʼya Yɨɨ Ianyuux dada ángel
4 Kunxaʼnu ka Daʼya Yɨɨ Ianyuux dada davaʼa nga ángel.
Chi danani Ianyuux Daʼya Yɨɨ‑ia,
Daʼya Mani‑ia.
Ko danani Ianyuux ángel,
ia ka xinokuechi nuu‑ia.
5 Chi nuncas ña n‑jaʼan Ianyuux nuu ia ka xinokuechi nuu‑ia,
xa n‑jaʼan‑ia nuu Daʼya Yɨɨ‑ia:
Daʼya‑r kuu‑n;
vitna n‑kudaʼya ñaʼa‑r.
Te na n‑kakuneʼe Ianyuux ángel,
ia ka xinokuechi nuu‑ia,
nuncas ña n‑jaʼan‑ia:
Ku kuu‑r Taa‑ia,
te ku kuu mee‑ia Daʼya Yɨɨ‑r.
6 Na n‑kida Ianyuux xa n‑kixee Daʼya Yɨɨ‑ia ñuñayiu,
n‑jaʼan‑ia nuu‑ia:
Na ndadakaʼnu ñaʼa koio ntdaa ia ka xinokuechi nuu‑r.
7 Na n‑kakuneʼe Ianyuux ángel,
n‑jaʼan‑ia:
Kida‑ia xa ka kuu ia ka xinokuechi nuu‑ia ná kuu tachi kane,
kida‑ia xa ka kuu‑ia ná ka kuu yañuʼu.
8 Ko na n‑kakuneʼe Ianyuux Daʼya Yɨɨ‑ia,
n‑jaʼan‑ia:
Ianyuux kuu‑n.
Taxnuni‑n kuia ma jɨn ndɨʼɨ.
Taxnuni‑n,
te ndadandaa‑n ntdaa xa io.
9 Vaʼa xemani‑n ntdaa xa kuu xavaʼa,
uʼu juini‑n ntdaa xa kuu xa uʼu.
Xijan kuu xa xá n‑kida Ianyuux xa kunuu mee‑n nuu ntdaa se kutnaʼa xiʼin‑n.
Ná ka xodo ñayiu aciti dɨkɨ se kunxaʼnu ka,
da n‑xodo Ianyuux aciti dɨkɨ mee‑n,
xa kuvete‑n xa kuvete ka‑n.
Kuu Ianyuux xiaʼan‑ia nuu Daʼya Yɨɨ‑ia.
10 Dɨuni n‑jaʼan Ianyuux nuu Daʼya Yɨɨ‑ia:
Kiʼna nuu,
antecas xa kuaʼa ntdaa xa io,
n‑kidavaʼa mee‑n ñuñayiu yaʼa.
Te xiʼin ndaʼa mee‑n,
n‑kidavaʼa‑n andɨu.
11 Jɨn ndɨʼɨ ntdaa xa io andɨu,
ko kutuu naʼi ka mee‑n kuia ma jɨn ndɨʼɨ.
Ná kutuʼu ɨɨn daʼma,
da kutuʼu ntdaa xa io andɨu.
12 Ná xajan tnatnu ɨɨn seyɨɨ doo‑s,
duʼa ndajan tnatnu mee‑n ntdaa xa io.
Ná nadama ɨɨn ñayiu daʼma‑i,
da nadama mee‑n ñuñayiu xiʼin andɨu.
Ko mee‑n,
ku kuu‑n ná kuu‑n vitna,
te nuncas ma jɨn ndɨʼɨ kuia kutuu‑n.
13 Nuncas ña n‑jaʼan Ianyuux nuu ángel,
ia ka xinokuechi nuu‑ia,
ná n‑jaʼan‑ia nuu Daʼya Yɨɨ‑ia:
Nkoo‑n ndaʼa kuaʼa‑r,
nde kada‑r xa jueñi niʼna‑n ntdaa xa jantnaʼa xiʼin‑n.
14 Chi ángel,
ia ka xinokuechi nuu Ianyuux ka kuu‑ia.
Tundaʼa Ianyuux ia ka xinokuechi nuu‑ia kixi,
xa chindee koio‑ia ñayiu dakaku ñaʼa Ianyuux,
xa kutuu vaʼa koio‑i xiʼin Ianyuux andɨu.