Maxku kande ini‑ro tnuʼu‑ia
2
Xijan kuu xa,
io xa chinuu vaʼa‑ro tnuʼu n‑teku‑ro.
Io xa jandixa‑ro tnuʼu Ianyuux,
xa maxku kande ini‑ro tnuʼu‑ia.
2 Xá n‑kuu kuia,
ia ka xinokuechi nuu Ianyuux n‑ka xiaʼan tnuʼu Ianyuux nuu ñayiu.
Te tnuʼu ndaa kuu.
N‑ndadandaa Ianyuux ntdaa ñayiu ña n‑ka jandixa tnuʼu jan,
n‑kida uʼu‑ia ntdaa ñayiu n‑ka kida xa uʼu.
3 Ɨɨn xavaʼa xavaʼa kuu xa dakaku ñaʼa Ianyuux mee‑ro.
Ko nux ñatu chinuu‑ro tnuʼu‑ia,
te,
¿janda dakaku ñaʼa‑ia?
Kiʼna nuu,
Xtoʼo‑ro Jesucristu n‑jaʼan xa dakaku Ianyuux ñayiu ka jandixa‑ia.
Te dada,
se n‑ka teku tnuʼu‑ia n‑ka kachitnuñaʼa tnuʼu jan.
4 N‑jaʼan ndaa Ianyuux xaxeʼe tnuʼu jan,
na n‑kida‑ia milagru,
xa kaʼnu,
xa vaʼa xaxeʼe‑ro.
Te n‑jaʼan ndaa Ianyuux xaxeʼe tnuʼu jan,
na n‑tax nga Espíritu Ii ntdaa xa ndoñuʼu‑ro xa kada‑ro xa juini Ianyuux.
Ɨɨn ɨɨn‑ro,
n‑taxi‑ia xa juini Ianyuux xa tnɨɨ‑ro.
Ná kuu mee‑ro n‑nduu Jesucristu
5 Kakuneʼe‑ro ñuñayiu ta koo ka.
Ña n‑kida Ianyuux xa taxnuni koio ángel,
ia ka xinokuechi nuu‑ia,
nuu ñuñayiu jan.
6 N‑jaʼan ndaa ɨɨn seyɨɨ tnuʼu Ianyuux:
Taa‑ro Ianyuux,
¿jundu kuu seyɨɨ,
xa xani ini mee‑n xaxeʼe‑s?
¿Jundu kuu daʼya‑s,
xa ndu ini‑n xaxeʼe‑s?
7 Xaku ni kɨu n‑kida‑n xa kunxaʼnu ka ángel,
ia ka xinokuechi nuu‑n,
dada mee‑s.
Ko n‑kida‑n xa kuu‑s se kunxaʼnu ka,
n‑kida‑n xa tnɨɨ‑s ntdaa xañuʼu.
N‑kida‑n xa taxnuni‑s nuu ntdaa xa n‑kidavaʼa‑n.
8 N‑kida‑n xa jandixa ñaʼa ntdaa xa io mee‑s.
Na n‑kida‑n xa taxnuni‑s nuu ntdaa,
ña n‑kendoo ni ɨɨn xa ña n‑jandixa ñaʼa.
Ntdaa kuu kuenda mee‑s.
Ko vitna,
ta kundeʼa ka‑ro xa taxnuni‑s nuu ntdaa xa io.
9 Ko ndeʼa‑ro Jesús.
N‑kida Ianyuux xa xaku ni kɨu n‑ka kunxaʼnu ka ángel,
ia ka xinokuechi nuu Ianyuux,
dada Jesús.
Xaxeʼe xa xemani Ianyuux ñayiu ñuñayiu,
n‑xiʼí Jesús xaxeʼe ntdaa ñayiu.
Xaxeʼe xa n‑xiʼí Jesús,
te n‑kida Ianyuux xa taxnuni‑ia nuu ntdaa xa io.
Ia kunxaʼnu ka kuu‑ia,
io‑ro xañuʼu nuu‑ia.
10 Te vatuka xa duʼa n‑kida Ianyuux.
N‑kidavaʼa Ianyuux ntdaa xa io.
Ntdaa xa io kuu kuenda mee‑ia.
N‑juini‑ia xa kutuu koio kueʼe ñayiu xiʼin‑ia kuia ma jɨn ndɨʼɨ.
Xijan kuu xa n‑xio xa kueʼe vida yaʼa Jesucristu,
xa kada‑ia ntdaa ná io ná juaʼan xa dakaku‑ia ñayiu jan.
Te duʼa n‑kida‑ia.
11 N‑kida‑ia xa ku kuu koio ñayiu jan daʼya Ianyuux,
ná kuu mee‑ia daʼya Ianyuux.
N‑kida dɨɨn‑ia ñayiu jan,
xa kada koio‑i xa juini Ianyuux,
te xijan kuu xa ñatu kujanuu‑ia xa danani‑ia‑i ñani‑ia xiʼin kuʼa‑ia.
12 Jaʼan‑ia:
Jaʼan ndaa‑r xaxeʼe mee‑n nuu ñani‑r kuʼa‑r.
Na nataka koio‑i,
te meʼñu ntdaa‑i,
kata‑r alabanza nuu‑n.
13 Jaʼan‑ia:
Koo‑r confianza nuu Ianyuux.
Jaʼan‑ia:
Yaʼa tuu‑r,
xiʼin daʼya Ianyuux n‑taxi‑ia.
14 Ná kuu daʼya ñayiu ɨɨn keveʼe,
xa io kuñu‑i io nɨñɨ‑i,
da n‑xio kuñu nɨñɨ Jesús.
Ná kuu mee‑ro,
n‑nduu mee‑ia.
Na n‑xiʼí Jesús,
n‑danaa‑ia kuiʼna,
xiʼin xa taxnuni kuiʼna nuu ñayiu.
Chi,
xiʼin xa n‑kida kuiʼna xa kuú koio ntdaa ñayiu,
n‑taxnuni‑i nuu ntdaa ñayiu.
15 Ko n‑dakaku Jesús ñayiu,
xa maxku yuʼu koio ka‑i.
Ntdaa kuia ka xika ñayiu,
ka yuʼu‑i xa kuú‑i.
Te duʼa,
ná kuu se kidatniu duʼa nuu ɨnka ñayiu,
ka kuu‑i.
Ko vitna,
ña ndoñuʼu xa yuʼu koio ka‑i.
16 Xandaa kuu xa ña n‑kixee Jesús ñuñayiu xa dakaku Jesús ángel,
ia ka xinokuechi nuu Ianyuux.
N‑kixee Jesús xa dakaku‑ia ñayiu ka kuu daʼya dana taxaʼnu tnetnu‑ro Abraham.
17 Xijan kuu xa,
n‑ndoñuʼu‑ia xa nduu‑ia ná ka kuu daʼya Abraham,
xa ku kuu‑ia ñani‑s.
Ntdaa xa kuu mee‑ro,
n‑nduu mee‑ia,
xa ku kuu‑ia dutu vaʼa xaxeʼe‑ro nuu Ianyuux.
Dutu taxnuni ka kuu‑ia.
Kundau ini ñaʼa‑ia mee‑ro,
te kida‑ia ntdaa xa juini Ianyuux.
N‑xiʼí‑ia xaxeʼe ñayiu,
xa chiyaʼu‑ia kuechi‑i.
18 Kueʼe vida n‑yaʼa Jesús,
na n‑juini kuiʼna xa kadajuexa‑i‑ia xa kada‑ia kuechi.
Xijan kuu xa,
kuaʼa‑ia xa chindee‑ia ñayiu,
hora juini kuiʼna xa kadajuexa‑i ñayiu xa kada koio‑i kuechi.