Kunxaʼnu ka Jesús dada Moisés
3
Xijan kuu xa kani ini koio‑n Jesucristu.
Ñani‑da kuʼa‑da,
n‑kida dɨɨn ñaʼa Ianyuux mee‑ro,
n‑jaʼan ñaʼa‑ia xa ku kuu‑ro ñayiu ka kunduu xiʼin mee‑ia.
Ia n‑tundaʼa ñaʼa Ianyuux kuu Jesús.
Dutu taxnuni ka nuu Ianyuux jandixa‑ro kuu‑ia.
2 N‑tundaʼa Ianyuux Jesús,
te n‑daxinokava Jesús ntdaa tniu n‑xiaʼan Ianyuux.
Dani,
n‑daxinokava Moisés ntdaa tniu n‑kida‑s xaxeʼe ñayiu n‑ka jandixa Ianyuux.
3 Te kutnuni ini‑ro xa io xa koo‑ro kueʼe ka xañuʼu nuu Jesús dada Moisés,
nani io‑ro kueʼe ka xañuʼu nuu se n‑kidavaʼa veʼe dada veʼe n‑kuaʼa.
4 Chi davaʼa nga veʼe io,
n‑kidavaʼa ɨɨn ñayiu veʼe jan.
Ko Ianyuux n‑kidavaʼa ntdaa xa io.
5 Xandaa kuu xa n‑daxinokava Moisés ntdaa tniu n‑kida‑s xaxeʼe ñayiu n‑ka jandixa Ianyuux.
Se xinokuechi nuu Ianyuux n‑kuu Moisés.
N‑jaʼan ndaa‑s xaxeʼe ntdaa xa jaʼan Ianyuux nunuu ka.
6 Ko Cristu kuu Daʼya Yɨɨ Ianyuux,
te taxnuni‑ia nuu ñayiu ka jandixa Ianyuux.
Te mee‑ro kuu ñayiu ka kunduu xiʼin Ianyuux,
nux kundee ini‑ro xa maxku yuʼu‑ro,
te kuvete‑ro xaxeʼe xa naʼa‑ro xa ndixi‑ia.
Ndetatu‑ro xiʼin Ianyuux
7 Xijan kuu xa jaʼan Espíritu Ii:
Vitna,
nux ka teku‑n xa jaʼan Ianyuux,
8 maxku kuxee ini koio mee‑n,
ná n‑ka kuxee ini taxaʼnu tnetnu‑n.
Ña n‑ka jandixa‑i Ianyuux.
Na n‑ka xikonuu ñayiu jan nuu ñayo ñayiu io,
n‑ka kida‑i xa yo n‑kiti ini‑r nuu‑i.
9 N‑ka xitotnuni ñaʼa taxaʼnu tnetnu‑n.
N‑ka juini ñayiu jan kueʼe ka seña.
Uu diko kuia n‑ka xini‑i seña naʼnu n‑kida‑r xaxeʼe‑i,
te dani ta koo koio ka‑i confianza nuu‑r.
10 Xijan kuu xa n‑kiti ini‑r nuu ñayiu jan,
te n‑jaʼan‑r:
“Kɨu xiʼin kɨu ka dandoo ñaʼa‑i,
ñatu ka jandixa ñaʼa‑i.
Ña ka juini‑i xa kunduu koio‑i xiʼin‑r.”
11 Xijan kuu xa,
loko n‑kiti ini‑r nuu ñayiu jan,
te xiʼin tnuʼu kiti ini n‑jaʼan‑r:
“Maxkɨu maxñuu kɨu koio ñayiu jan nuu tuu mee‑r xa ndetatu koio‑i xiʼin‑r.”
Kuu Ianyuux xiaʼan‑ia nuu ñayiu jan.
12 Ñani‑da kuʼa‑da,
koo koio‑n cuedado,
xa maxku dandoo koio‑n,
ni ɨɨn‑n,
Ianyuux Ndito.
Maxku kada koio‑n xa uʼu,
jandixa naʼi koio ka‑n Ianyuux.
13 Kɨu xiʼin kɨu,
nɨni kuaʼa‑n xa kunini ka‑n xa jaʼan Ianyuux,
juña tnaʼa koio ka‑n tnuʼu kanu ini,
xa jandixa naʼi koio ka‑n Ianyuux.
Maxku kada xee ini koio‑n anu‑n,
maxku juejoon koio‑n xa dandaʼu ñaʼa kuechi.
14 Xtuu‑ro xiʼin Cristu.
Nde kiʼna nuu,
io‑ro confianza nuu‑ia.
Dani,
na kundee ini‑ro,
xa jandixa naʼi ka‑ro mee‑ia,
nde na xee kɨu xa kutuu‑ro xiʼin‑ia andɨu.
15 Ná yodotnuni:
Vitna,
nux ka teku‑n xa jaʼan Ianyuux,
maxku kada xee ini koio‑n anu‑n,
ná n‑ka kuxee ini taxaʼnu tnetnu‑n.
16 ¿Te jundu kuu ñayiu n‑ka teku xa n‑jaʼan Ianyuux,
te n‑ka kuxee ini‑i nuu‑ia?
Xandaa kuu,
xa ñayiu jan n‑ka kuu ntdaa ñayiu n‑kineʼe Moisés Egipto.
17 ¿Te jundu nuu n‑kiti ini Ianyuux uu diko kuia?
Xandaa kuu,
xa ñayiu jan n‑ka kuu ñayiu n‑ka kida xa uʼu,
ñayiu n‑ka xiʼí ijan nuu ñayo ñayiu io.
18 ¿Te jundu nuu n‑jaʼan Ianyuux xiʼin tnuʼu kiti ini,
xa maxkɨu maxñuu kɨu koio‑i nuu tuu‑ia xa ndetatu koio‑i xiʼin‑ia?
Xandaa kuu,
xa ñayiu jan n‑ka kuu ñayiu ña n‑ka kida‑i xa n‑jaʼan‑ia.
19 Xini‑ro xa ña n‑ka kuaʼa‑i xa kɨu koio‑i ijan,
chi ña n‑ka jandixa‑i Ianyuux.