Carta n‑kidavaʼa Santiago
Xtuu‑n nituʼu ñuñayiu
1
Mee‑da,
Santiago,
se xinokuechi nuu Ianyuux xiʼin nuu Xtoʼo‑ro Jesucristu,
kidavaʼa‑da nuu mee‑n.
Ka kuu‑n daʼya dana n‑uxi uu sexaʼnu n‑ka xio ñuu Israel xá n‑kuu kueʼe kuia.
Te vitna xtuu‑n nituʼu ñuñayiu.
Kida Ianyuux xa vaʼa kutnuni ini koio‑n
2 Ñani‑da kuʼa‑da,
hora kueʼe vida yaʼa koio‑n,
io xa kuvete‑n xa kuvete‑n.
3 Ka jandixa‑n Ianyuux,
xini‑n xa nux duʼa na kada koio‑n,
te kuaʼa‑n xa kundee ini‑n ntdaa xa ka yaʼa‑n.
4 Te nux kundee ini koio‑n,
xee‑n kuu koio‑n ñayiu kanu ini,
ñayiu ndaa,
ñayiu ka kida xa juini Ianyuux.
5 Nux ndeda ɨɨn‑n ndoñuʼu ka xa kutnuni ini vaʼa‑n,
kajan‑n nuu Ianyuux,
te taxi‑ia.
Chi taxi‑ia ntdaa xa ndoñuʼu‑ro,
te taxi‑ia xiʼin ntdaa anu‑ia.
6 Ko io xa jandixa‑n‑ia.
Hora xijan‑n,
ni itaʼu maxku ñaʼa kɨ ini‑n.
Chi ɨɨn ñayiu yɨ ini,
ná kuu ndute mar xa neʼe tachi juaʼan vaxi kuu‑i.
7 Ñayiu jan,
maxku kani ini‑i xa juñaʼa Ianyuux xa n‑xijan‑i,
chi ni ɨɨn ma tnɨɨ‑i.
8 Ñayiu juini ɨɨn xa juini‑i vitna,
ɨnka xa juini‑i tnee,
te ntdaa xa kida‑i ñatu xiniñuʼu.
9 Ɨɨn ñani‑ro,
juini se kundaʼu kuu‑s,
ko na kuvete‑s xaxeʼe xa kunduu‑s xiʼin Ianyuux.
10 Te ɨɨn ñani‑ro,
ɨɨn se kuika,
juini na kuita ntdaa xa nevaʼa‑s,
ko na kuvete‑s xaxeʼe xa kunduu‑s xiʼin Ianyuux.
Chi ná kuu ita kuʼu,
ita ñatu naʼa xee,
da kuu se kuika.
11 Hora xino ngandii te yo iʼni,
te yichi kuʼu jan te jungava ita,
te xe ndɨʼɨ xa vili kaa‑ta.
Duʼa kuu se kuika.
Nɨni kidatniu‑s xa niʼi ka‑s xa juini‑s,
te n‑xiʼí‑s.
Na kundee ini koio‑n
12 Na kuvete koio ñayiu kundee ini ntdaa xa yaʼa‑i,
chi nux kundee ini‑i,
te tnɨɨ‑i premiu‑i.
Premiu‑i kuu xa kutuu vaʼa‑i xiʼin Ianyuux andɨu kuia ma jɨn ndɨʼɨ.
Ná kuu corona kuu.
Xá n‑taxi Ianyuux tnuʼu‑ia xa duʼa koo,
nuxa xemani‑ro‑ia.
13 Te hora juini‑n xa kada‑n xa uʼu,
maxku jaʼan‑n xa Ianyuux kidajuexa ñaʼa xa duʼa kada‑n.
Nuncas ña n‑kida Ianyuux xa uʼu,
te nuncas ma kada‑ia xa kada ñayiu xa uʼu.
14 Chi xa kukajan ini ñayiu kida xa kada‑i xa uʼu.
Kuu ná kuu xa mee‑i kidajuexa mee‑i xa kida‑i xa uʼu.
15 Kukajan ini‑i te kida‑i kuechi.
Te dani kida‑i xa kida ka‑i kuechi,
nde xee‑i xa kuú‑i xiʼin kuechi‑i.
16 Ñani mani‑da,
kuʼa mani‑da,
maxku dandaʼu‑n mee‑n.
17 Ntdaa xavaʼa ntdaa xandaa xa niʼi‑ro vaxi nde andɨu.
Xa taxi Ianyuux kuu.
N‑kidavaʼa mee‑ia ntdaa xa io andɨu.
Ianyuux,
ma dama‑ia,
kɨu xiʼin kɨu ɨɨn ni‑ia kuu‑ia.
18 N‑taxi‑ia tnuʼu ndaa.
Xaxeʼe xa n‑jandixa‑ro tnuʼu jan,
te n‑kida‑ia xa n‑nduu‑ro daʼya‑ia.
N‑juini‑ia xa ku kuu‑ro xa kiʼna nuu nuu ntdaa xa ndadavaʼa‑ia.
Io xa dandeʼa koio‑n Ianyuux xa ndaa xa ka jandixa‑n‑ia
19 Ñani mani‑da,
kuʼa mani‑da,
ntdaa‑n,
ndoñuʼu xa koo tuʼa‑n xa kunini vaʼa‑n.
Ko maxku yachi jaʼan koio‑n,
ni maxku yachi kiti ini koio‑n.
20 Chi xa kiti ini‑ro ma kada xa kada‑ro xa juini Ianyuux.
21 Kuiʼa xa kuiʼa ka xa ka kida ñayiu.
Kida‑i xa kida ka‑i xa uʼu.
Dandoo koio mee‑n ntdaa xijan,
te maxku kuxee ini koio‑n.
Xá n‑ka xeka vaʼa‑n tnuʼu Ianyuux,
te tnuʼu jan kada xa kutuu vaʼa‑n xiʼin Ianyuux.
22 Ko io xa kada‑n ná jaʼan tnuʼu jan.
Nux diko ni nini‑n,
te ñatu jandixa‑n,
duʼa dandaʼu‑n mee‑n.
23 Ɨɨn seyɨɨ,
nux nini‑s,
ko ñatu kida‑s ná io,
kuu‑s ná kuu ɨɨn seyɨɨ ndeʼa nuu‑s nuu spejo.
24 Ndeʼa‑s,
ko hora juaʼan‑s,
ndunaa‑s janda kaa‑s.
25 Ko ɨnka seyɨɨ,
ñatu ndunaa‑s xa n‑teku‑s.
Vaʼa kutuni ini‑s xa tnuʼu taʼu tniu Ianyuux kuu,
tnuʼu ndaa,
tnuʼu kida xa kutuu vaʼa‑s.
Ñatu daxio‑s tnuʼu jan.
Kundee ini‑s xa jandixa‑s,
te kida‑s ntdaa ná io.
Se yaʼa,
jaʼan Ianyuux xa vaʼa kida‑s.