Na kada‑ro xa juini Ianyuux
13
Juemani tnaʼa koio ka‑n.
2 Maxku ndunaa koio‑n xa kueka vaʼa‑n ñayiu veʼe‑n.
Duʼa n‑kuu xa n‑ka xeka vaʼa ñayiu ángel,
ia ka xinokuechi nuu Ianyuux,
juini ña n‑ka xini‑i xa duʼa ka kida‑i.
3 Najaʼan koio‑n ñani‑ro kuʼa‑ro ka xini uʼu ñaʼa ñayiu,
kuenda kuu kueʼe vida ka yaʼa mee‑n xiʼin‑s.
4 Xa tnundaʼa ñayiu,
kuu xa maxku kada ɨnka ñayiu xa dandoo tnaʼa‑i.
Maxku dandoo koio‑n ñadɨʼɨ‑n yɨɨ‑n,
xa kidi‑n xiʼin ɨnka ñayiu.
Ndadandaa Ianyuux ñayiu kidi xiʼin ñayiu ñatu n‑tnundaʼa xiʼin‑i,
te ndadandaa‑ia ñayiu kidi xiʼin ñadɨʼɨ ɨnka seyɨɨ,
yɨɨ ɨnka ñadɨʼɨ.
5 Maxku juemani koio‑n tvini.
Kuvete koio‑n xiʼin xa io.
Chi xá n‑jaʼan Ianyuux:
“Nuncas ma dandoo ñaʼa‑r,
nuncas ma kande ini ñaʼa‑r.”
6 Xijan kuu xa,
xaxeʼe xa io‑ro confianza nuu‑ia,
jaʼan‑ro:
Xtoʼo‑da kuu Ia chindee ñaʼa mee‑da;
ma yuʼu‑da nuu davaʼa nga xa kuaʼa ñayiu xa kada ñaʼa‑i.
7 Najaʼan koio‑n seyɨɨ,
ñadɨʼɨ n‑ka dakuaʼa ñaʼa.
N‑ka kachitnuʼu‑s tnuʼu Ianyuux.
Kani ini koio‑n nanda n‑ka xo tuu‑s ñuñayiu yaʼa.
Te jandixa naʼi koio ka mee‑n Jesucristu,
ná n‑ka jandixa mee‑s Jesucristu.
8 Ná n‑kuu Cristu,
dani kuu‑ia vitna,
te dani ku kuu‑ia kuia ma jɨn ndɨʼɨ.
9 Maxku juejoon koio‑n xa dakuaʼa ñaʼa koio ñayiu ɨnka xa dakuaʼa‑i.
Tnɨɨ koio ka‑n xamani taxi Ianyuux,
te duʼa ndaku anu‑n.
Ka jaʼan ñayiu:
“Io xa kaa‑n xaʼa,
maxku kaa‑n xijan.”
Loko ndu ini‑i xa duʼa neʼe ii‑i,
ko ñatu xiniñuʼu.
Dani dakuido datau anu‑i.
10 Tuku n‑kuu xa doko n‑xiaʼan Cristu nuu Ianyuux,
dada xa n‑ka xiaʼan dutu ñayiu Israel.
Idini vuelta n‑xiʼí Jesús,
xa dita‑ia kuechi‑ro.
Dutu nujuiin veñuʼu tabernáculo,
ña kuaʼa xa kax koio‑s xa n‑doko Jesús.
11 Chi veñuʼu tabernáculo,
neʼe dutu taxnuni ka nɨñɨ kɨtɨ juaʼan Cuartu Yo Ii,
chi xa doko xaxeʼe kuechi kuu.
Ko yɨkɨ kuñu‑tɨ,
teñuʼu‑s yuʼu ñuu.
12 Dɨuni Jesús.
N‑xiʼí‑ia yuñuu Jerusalén,
xa ndundoo ñayiu ka jandixa‑ia,
xiʼin nɨñɨ‑ia.
13 Xijan kuu xa,
na dandoo‑ro ntdaa xa n‑kuu,
xa kunduu‑ro xiʼin Jesús.
Na kada‑ro kuenda xa jɨʼɨn‑ro nuu tuu‑ia yuñuu jan.
Ná n‑kuyɨɨ anu Jesús,
xa kundee ini‑ia xa januu jan,
da na kuyɨɨ anu mee‑ro tuku,
xa kundee ini‑ro xa januu xaxeʼe‑ia.
14 Chi ñuñayiu yaʼa,
ña tuu na ñuu ma jɨn ndɨʼɨ.
Nduku‑ro ñuu ijan,
nuu kutuu vaʼa‑ro kuia ma jɨn ndɨʼɨ.
15 Xijan kuu xa,
kɨu xiʼin kɨu,
na juñaʼa‑ro xa n‑kutaʼu‑ro nuu Ianyuux.
Xaxeʼe Jesús,
na juñaʼa‑ro xa doko‑ro nuu Ianyuux.
Xiʼin yuʼu‑ro na juñaʼa‑ro xa n‑kutaʼu‑ro nuu‑ia.
16 Maxku ndunaa koio‑n xa kada‑n xa kuu xavaʼa,
maxku ndunaa koio‑n xa chindee tnaʼa‑n.
Xaʼa tuku kuu ɨɨn xa doko‑ro nuu Ianyuux,
te tna ini‑ia.
17 Jandixa koio‑n sexaʼnu,
koo koio‑n xañuʼu nuu‑s.
Se ñunuu ñaʼa ka kuu‑s,
te io xa najuñaʼa koio‑s cuenta nuu Ianyuux xaxeʼe‑n.
Jandixa koio‑n‑sɨ,
xa kada koio‑s tniu n‑xiaʼan Ianyuux,
xiʼin xa kuvete‑s.
Maxku kada koio‑n xa kukoʼyo ini koio‑s xaxeʼe‑n.
Chi xaʼa,
ñatu xiniñuʼu xaxeʼe mee‑n.
18 Kajan taʼu koio‑n xaxeʼe‑da.
Xndaxio‑da confianza xa ña tuu nax io xa dakuido datau anu‑da.
Ka juini‑da xa kada koio‑da meni xavaʼa.
19 Kueʼe xijan‑da xa kajan taʼu koio‑n,
xa yachi ka naxee‑da xa kutuu‑da xiʼin‑n.
Na kada Ianyuux xa kutuu vaʼa koio‑n
20 Na kada Ianyuux xa kutuu vaʼa koio‑n.
N‑nadandoto‑ia Xtoʼo‑ro Jesucristu nuu ndɨyɨ.
Ná kuu se ñunuu tkachi kuu Xtoʼo‑ro,
te mee‑ro kuu tkachi‑ia.
Na n‑xiʼí‑ia,
xiʼin nɨñɨ mee‑ia n‑kida‑ia ntdaa ná io ná juaʼan tratu xee.
Te nuncas ma jɨn ndɨʼɨ tratu jan.
21 Na taxi Ianyuux xamani‑ia,
xa kunxaʼnu koio‑n te kada koio‑n xavaʼa,
xa kada koio mee‑n ntdaa xa juini mee‑ia.
Xiʼin Jesucristu na kada ñaʼa‑ia mee‑ro,
ntdaa‑ro,
ntdaa xa juini mee‑ia.
Na ndadakaʼnu‑ro Cristu kuia ma jɨn ndɨʼɨ.
Duʼa na koo.
22 Ñani‑da kuʼa‑da,
xijan‑da xa kueka vaʼa koio‑n tnuʼu kanu ini yaʼa.
Chi carta luchi ni kuu xa n‑kidavaʼa‑da.
23 Io xa jini koio‑n xa tuu libre ñani‑ro,
Timoteo.
Nux yachi na kixi‑s,
te jɨʼɨn‑da,
nduu‑da xiʼin‑s,
xa kotoniʼni ñaʼa‑da.
24 Xanyuux nuu ntdaa sexaʼnu ka taxnuni nuu‑n.
Xanyuux nuu ntdaa ñayiu ka jandixa Cristu ijan.
Ñayiu ka jandixa Cristu do Italia ka tundaʼa xanyuux nuu mee‑n.
25 Na taxi Ianyuux xamani‑ia nuu‑n.
Duʼa na koo.