Maxku dananuu‑ro Jesús
12
Xijan kuu xa,
na kundee ini‑ro xa jandixa‑ro Ianyuux.
Se ijan,
ñá ijan,
n‑ka jandixa‑s Ianyuux,
te n‑ka kida‑s xa juini‑ia.
Kuu ná kuu xa xnii‑s nituʼu lado,
xa tax koio‑s tnuʼu kanu ini.
Kueʼe‑s xa kueʼe‑s io.
Kuu ná kuu xa xino‑ro,
ɨɨn ɨɨn‑ro,
ɨɨn carrera.
Na daxio‑ro ntdaa xa datnañaʼa,
xa na kunu vaʼa‑ro.
Na daxio‑ro ntdaa kuechi kada xa ndua‑ro.
Na kundee ini‑ro,
xa kunu vaʼa‑ro.
2 Na kundeʼa vaʼa‑ro Jesús.
N‑jandixa Jesús Ianyuux,
te kada‑ia xa jandixa mee‑ro Ianyuux.
N‑kundee ini‑ia curuxi.
Ñatu n‑chinuu‑ia xa n‑ka juini‑s xa kada‑s xa kujanuu‑ia,
chi n‑xo naʼa‑ia xa kuvete‑ia xa kuvete‑ia,
na yaʼa‑ia ntdaa xaʼa.
Te nukoo‑ia ndaʼa kuaʼa Ianyuux,
nuu taxnuni‑ia.
3 Kani ini koio‑n Jesús.
Se ka kida kuechi,
n‑ka kida‑s xa kueʼe xa kueʼe vida n‑yaʼa‑ia,
ko n‑kundee ini‑ia.
Kani ini koio‑n mee‑ia,
xa maxku ku xiau‑n,
te maxku kuita anu‑n.
4 Kuu ná kuu xa ka jantnaʼa‑n xiʼin kuechi.
Kundee ini koio ka‑n,
jantnaʼa koio ka‑n.
Chi ta katu ka nɨñɨ‑n.
5 Xá n‑ka ndunaa‑n tnuʼu kanu ini n‑taxi Ianyuux.
Ka kuu‑n daʼya‑ia,
te duʼa n‑jaʼan‑ia:
Daʼya yɨɨ‑r,
chinuu‑n hora kida uʼu ñaʼa‑r,
chi Xtoʼo‑n kuu‑r,
te jaʼan doʼo ñaʼa‑r.
Maxku kuita anu‑n hora kudeen ñaʼa‑r.
6 Chi jaʼan doʼo Xtoʼo‑n ñayiu xemani‑ia.
Xá n‑xeka vaʼa ñaʼa‑ia,
daʼya‑ia ka kuu‑n,
te xijan kuu xa kida uʼu ñaʼa‑ia.
7 Xijan kuu xa kundee ini koio‑n hora kida uʼu ñaʼa Ianyuux,
chi kida ñaʼa Ianyuux xaxeʼe mee‑n,
ná kida ɨɨn seyɨɨ xaxeʼe daʼya‑s.
¿Chi na daʼya io,
xa ma jaʼan doʼo ñaʼa taa‑s?
8 Jaʼan doʼo Ianyuux ntdaa daʼya‑ia,
xa dakuaʼa ñaʼa‑ia.
Nux ñatu jaʼan doʼo ñaʼa‑ia mee‑n,
te ñatu kuu‑n daʼya‑ia,
te ñatu kuu Ianyuux Taa‑n.
9 Ñuñayiu yaʼa n‑ka jaʼan doʼo ñaʼa taa‑ro,
te n‑xio‑ro xañuʼu nuu‑s.
Kueʼe ka io xa jandixa‑ro Taa‑ro Ianyuux,
te kada‑ro xa juini mee‑ia,
xa kutuu vaʼa‑ro xiʼin‑ia kuia ma jɨn ndɨʼɨ.
10 Itaʼu ni kuia n‑ka jaʼan doʼo ñaʼa tadɨʼɨ‑ro,
nani n‑ka xani ini‑s.
Ko jaʼan doʼo ñaʼa Ianyuux,
xa kada‑ia xavaʼa xaxeʼe‑ro,
xa kada mee‑ro xa kuu xavaʼa,
ná n‑kida mee‑ia xa kuu xavaʼa.
11 Hora kida uʼu ñaʼa Ianyuux mee‑ro,
ñatu tna ini‑ro,
chi xaxiaʼan.
Ko dada,
nux kuaʼa vaʼa‑ro,
te kada xa kada‑ro xa kuu xavaʼa,
te kutuu vaʼa‑ro.
Ndaʼu mee‑ro, nux na dandoo‑ro tnuʼu‑ia
12 Kundee ini koio ka‑n.
Kada koio‑n xa ndundaku ndaʼa‑n yo n‑xiau,
te ndundaku xeʼe‑n yo n‑kuita.
13 Nduku koio‑n ichi ndaa,
xa maxku ngokodo ka xeʼe kuʼu‑n,
chi duʼa na ndaʼa vaʼa.
14 Kada koio‑n ntdaa xa kuaʼa‑n xa kutuu mani koio‑n xiʼin ntdaa ñayiu.
Te kada koio ka‑n xa juini Ianyuux.
Chi nux ma kada‑n xa juini Ianyuux,
ma jini‑n‑ia.
15 Chindee tnaʼa koio‑n xa tnɨɨ koio ka‑n,
ntdaa‑n,
xamani taxi Ianyuux.
Maxku juejoon koio‑n xa ni ɨɨn‑n ku kuu ná kuu ɨɨn yuku ua kada dañu ñaʼa ntdaa‑n,
ɨɨn yuku ua kada xa kueʼe mee‑n ma kada koio ka xa kuu xavaʼa.
16 Koo koio‑n cuedado,
xa ni ɨɨn‑n maxku daxio xa jaʼan Ianyuux.
Duʼa n‑kida Esaú.
Xaxeʼe xa n‑juini‑s xa kaxi‑s idini ndeyu,
n‑diko‑s ntdaa xa juñaʼa taa‑s nuu daʼya kiʼna nuu‑s.
17 Ka xini‑n xa dada n‑juini‑s xa tnɨɨ‑s xa juñaʼa taa‑s,
ko ña n‑niʼi‑s.
Juini yo ndaʼi Esaú,
ko ña n‑kuaʼa‑s xa dama‑s xa n‑kuu.
18 Chi ña n‑ka kuyatni mee‑n Yuku Sinaí,
ná n‑ka kida taxaʼnu tnetnu‑n.
N‑ka kuyatni mee‑s yuku jan,
nuu koko ñuʼu,
nuu nee,
nuu vikó tnuu,
nuu tachi ndeʼe.
19 Ijan n‑xo ndaʼi trompeta,
te n‑jaʼan ɨɨn tnuʼu andɨu.
Na n‑ka teku ñayiu jan tnuʼu jan,
n‑ka xijan taʼu‑i xa maxku jaʼan ka‑ia ni ɨnka tnuʼu nuu‑i.
20 Chi ña n‑kuaʼa xa kundee ini koio‑i xa n‑taʼu tniu tnuʼu jan:
“Nux nde ɨɨn kɨtɨ na kɨu yuku yaʼa,
te io xa kaʼni‑n‑tɨ yuú,
o tee‑n‑tɨ xiʼin kuxi.”
21 Naka io kuu xa n‑ka xini ñayiu jan.
N‑ka yuʼu‑i,
loko n‑ka yuʼu‑i.
Ña n‑kuaʼa xa kundee ini‑i.
Nde Moisés n‑jaʼan:
“Yuʼu‑r,
menga xa nɨʼɨ‑r.”
22 Ko mee‑n,
xá n‑ka kuyatni‑n Yuku Sión.
Xá n‑ka kuyatni‑n Jerusalén katuu andɨu,
nuu tuu Ianyuux Ndito.
Xá n‑ka xee‑n nuu nataka kueʼe xa kueʼe mil ángel,
ia ka xinokuechi nuu Ianyuux.
Ijan ka ndadakaʼnu‑ia Ianyuux.
23 Xá n‑ka xee‑n nuu nataka ntdaa ñayiu kiʼna nuu veʼe Ianyuux.
Andɨu xá n‑chidotnuni nax nani ñayiu jan.
Xá n‑ka xee‑n nuu Ianyuux ndadandaa ñayiu.
Xá n‑ka xee‑n nuu xtuu anu ñayiu n‑ka kida xavaʼa,
ñayiu n‑kida Ianyuux xa kutuu koio‑i xiʼin mee‑ia.
24 Xá n‑ka xee mee‑n nuu Jesús.
N‑kida‑ia ná io ná juaʼan tratu xee,
te nujuiin‑ia nuu Ianyuux xaxeʼe‑n.
Yo vaʼa ka xa n‑kida nɨñɨ Jesús dada nɨñɨ Abel.
25 Kundeʼa vaʼa koio‑n,
xa kueka vaʼa koio‑n Ia jaʼan nuu‑n.
Na n‑jaʼan Ianyuux ñuñayiu,
n‑ka daxio ñayiu tnuʼu‑ia,
ña n‑ka jandixa‑i‑ia,
te ña n‑dakaku‑ia ñayiu jan.
Te dani mee‑ro,
nux ma jandixa‑ro Ianyuux jaʼan andɨu,
nux kada yata‑ro mee‑ia,
¿janda kaku‑ro?
26 Kɨu ijan,
na n‑jaʼan‑ia,
te n‑nɨʼɨ ntdaa xa io ñuñayiu.
Vitna,
xá n‑taxi‑ia tnuʼu‑ia jaʼan‑ia:
“Idinga vuelta kada‑r xa nanɨʼɨ ntdaa xa io ñuñayiu,
te kada‑r xa nɨʼɨ ntdaa xa io andɨu tuku.”
27 Xa jaʼan‑ia “idinga vuelta” juini kachi xa jɨn ndɨʼɨ ntdaa xa kanda n‑kidavaʼa Ianyuux.
Te ndoo ntdaa xa ñatu kanda.
28 Ko tnɨɨ mee‑ro ɨɨn xa nuncas ma jɨn ndɨʼɨ.
Taxnuni‑ro xiʼin Ianyuux.
Xijan kuu xa na juñaʼa‑ro xa n‑kutaʼu‑ro nuu Ianyuux.
Na ku kuu‑ro ñayiu xinokuechi nuu‑ia,
xa kada‑ro xa tna ini mee‑ia.
Na ndadakaʼnu‑ro‑ia te yuʼu‑ro nuu‑ia.
29 Chi Ianyuux jandixa‑ro,
ná kuu ñuʼu danaa ntdaa xa io,
da kuu‑ia.