3 Xaxeʼe xa jandixa‑ro Ianyuux,

kutnuni ini‑ro xa xiʼin tnuʼu mee‑ia,

n‑kidavaʼa Ianyuux ntdaa xa io.

Xa io xa ndeʼa‑ro,

ña n‑kuaʼa xiʼin xa n‑xio.

4 Xaxeʼe xa n‑jandixa Abel Ianyuux,

n‑doko‑s ɨɨn xa vaʼa ka nuu Ianyuux dada xa n‑doko Caín.

Xaxeʼe xa n‑jandixa Abel Ianyuux,

te n‑jaʼan‑ia xa n‑kida‑s xavaʼa,

te n‑xeka vaʼa‑ia xa n‑doko‑s.

Xaxeʼe xa n‑jandixa Abel Ianyuux,

juini xá n‑xiʼí‑s,

ko dani kuu‑s ɨɨn ichi kaneʼe katnɨɨ mee‑ro.

5 Xaxeʼe xa n‑jandixa Enoc Ianyuux,

ña n‑xiʼí‑s.

Nuncas ña n‑ka naniʼi ñayiu yɨkɨ kuñu‑s,

chi ndeka ñaʼa ndito Ianyuux juaʼan andɨu.

Te jaʼan tnuʼu Ianyuux xa antecas xa kandeka‑ia‑s jɨʼɨn,

te n‑jaʼan Ianyuux xa n‑tna ini ñaʼa‑ia.

6 Ɨɨn ñayiu,

nux ñatu jandixa‑i Ianyuux,

ña kuaʼa‑i xa kada‑i xa tna ini Ianyuux.

Ɨɨn ñayiu,

nux na kuyatni‑i nuu Ianyuux,

io xa jandixa‑i xa tuu‑ia,

te io xa koo‑i confianza xa kueka vaʼa‑ia‑i.

7 Xaxeʼe xa n‑jandixa Noé Ianyuux,

n‑kidavaʼa‑s ɨɨn barcu,

xa dakaku‑s ñadɨʼɨ‑s xiʼin daʼya‑s.

Antecas xa kixee xa koo,

te n‑jaʼan Ianyuux xa duʼa koo.

N‑yuʼu Noé nuu Ianyuux,

te n‑kida‑s ná n‑jaʼan‑ia.

Xaxeʼe xa n‑jandixa Noé Ianyuux,

n‑kida uʼu‑s ñayiu ñuñayiu,

te n‑xee xa n‑jaʼan Ianyuux xa ña tuu na kuechi‑s n‑xio,

chi n‑jandixa‑s‑ia.

8 Xaxeʼe xa n‑jandixa Abraham Ianyuux,

n‑kida‑s ná n‑jaʼan‑ia.

N‑jaʼan ñaʼa Ianyuux xa kee‑s ñuu‑s,

xa jɨʼɨn‑s nde ɨɨn nuu tnɨɨ‑s xa ku kuu xaxii‑s.

Juini ña xini‑s ndexu jɨʼɨn‑s,

ko n‑kee‑s,

te juaʼan‑s.

9 Xaxeʼe xa n‑jandixa‑s Ianyuux,

n‑xo tuu‑s nuu ijan,

chi n‑xiaʼan Ianyuux tnuʼu‑ia xa juñaʼa‑ia‑s nuu ijan.

N‑xo tuu‑s ijan,

ná tuu ɨɨn setoʼo ña tuu na ñuu‑s io.

Veʼe todo n‑xo tuu‑s ijan.

Te dɨuni,

duʼa n‑ka kida daʼya‑s Isaac,

te dada daiñani‑s Jacob tuku.

Chi nuu mee‑s tuku,

n‑xiaʼan Ianyuux tnuʼu‑ia xa juñaʼa‑ia‑s nuu ijan.

10 Chi n‑xo ndetu‑s,

xa kutuu vaʼa‑s ñuu vaʼa n‑kuaʼa,

ñuu n‑xani ini Ianyuux,

ñuu n‑kidavaʼa Ianyuux.

11 Xaxeʼe xa n‑jandixa Sara Ianyuux,

n‑tnɨɨ‑ña fuerza xa ñuʼu daʼya‑ña.

Juini xá n‑yɨɨ‑ña,

te ñatuka n‑kuaʼa‑ña,

ko n‑xio‑ña confianza nuu Ianyuux,

xa kada‑ia ná n‑jaʼan‑ia.

Te n‑kaku ɨɨn daʼya yɨɨ‑ña.

12 Xijan kuu xa idini seyɨɨ,

Abraham,

juini yo n‑kunxaʼnu‑s,

ko n‑xio kueʼe xa kueʼe xa kueʼe daʼya dana‑s,

ná io chudini andɨu.

Nani ña kuaʼa xa kaʼu‑ro ñuʼu kuchi kaa yuʼu ndute mar,

dani ña kuaʼa xa kaʼu‑ro daʼya dana Abraham.

13 Ntdaa ñayiu jan,

n‑ka jandixa‑i Ianyuux,

te n‑ka xiʼí‑i.

Ña n‑ka tnɨɨ‑i xa n‑xiaʼan Ianyuux tnuʼu‑ia xa juñaʼa‑ia.

Ko xika,

n‑ka xini‑i ntdaa xa juñaʼa Ianyuux,

te n‑ka jandixa‑i xa tnɨɨ koio‑i,

te n‑ka kuvete‑i.

Te duʼa,

n‑ka jaʼan ndaa‑i xa ñayiu toʼo ka kuu‑i,

diko ni ka yaʼa‑i ñuñayiu yaʼa.

14 Ñayiu duʼa ka jaʼan,

kaxi kaxi ka dandeʼa ñaʼa‑i xa dani ka nduku‑i ñuu kutuu vaʼa koio‑i.

15 Nux n‑ñu ini koio‑i ñuu n‑kee‑i,

te n‑kuaʼa‑i xa nuʼu koio‑i ijan n‑kuu.

16 Ko n‑ka xo nduku‑i ɨɨn ñuu yo vaʼa ka,

ñuu io andɨu.

Xijan kuu xa,

ñatu kujanuu Ianyuux xa ka jaʼan‑i xa Ia ka jandixa‑i kuu‑ia.

Chi xá n‑kida tuʼa‑ia ɨɨn ñuu yo vaʼa ka xaxeʼe‑i.

17 Xaxeʼe xa n‑jandixa Abraham Ianyuux,

n‑xiaʼan‑s daʼya‑s Isaac xa ku kuu‑s xa doko‑s nuu Ianyuux,

na n‑xitotnuni Ianyuux Abraham.

Juini xá n‑xiaʼan Ianyuux tnuʼu‑ia nuu‑s xaxeʼe Isaac,

ko n‑xio tuʼa Abraham xa kaʼni‑s idini daʼya‑s.

18 Xá n‑jaʼan Ianyuux:

“Xiʼin Isaac,

koo koio daʼya dana‑n.”

19 N‑xio Abraham confianza nuu Ianyuux,

xa kuaʼa‑ia xa nadandoto‑ia ndɨyɨ.

Te kuu ná kuu xa n‑nakueka Abraham Isaac nuu ndɨyɨ.

20 Xaxeʼe xa n‑jandixa Isaac Ianyuux,

n‑xijan taʼu‑s nuu‑ia,

xa kutuu vaʼa koio Jacob xiʼin Esaú.

21 Xaxeʼe xa n‑jandixa Jacob Ianyuux,

te antecas xa kuú‑s,

n‑xijan taʼu‑s nuu‑ia,

xa kutuu vaʼa koio ɨɨn ɨɨn daʼya yɨɨ José.

N‑xo nukoo‑s ndedi ndodo‑s vara‑s,

te n‑xiaʼan‑s xa n‑kutaʼu‑s nuu Ianyuux.

22 Xaxeʼe xa n‑jandixa José Ianyuux,

n‑jaʼan‑s nuu ñayiu Israel xa kee koio‑i Egipto.

Na n‑xee xa kuú‑s,

n‑taʼu tniu‑s xa kaneʼe ñayiu Israel yɨkɨ‑s jɨʼɨn,

hora na kee koio‑i Egipto.

23 Xaxeʼe xa n‑ka jandixa tadɨʼɨ Moisés Ianyuux,

n‑ka chivaʼa‑s Moisés uni yoo na n‑kaku‑s.

N‑ka xini‑s xa seluchi vaʼa kuu‑s,

te ña n‑ka yuʼu‑s xa n‑taʼu tniu se kunxaʼnu ka xa io xa kaʼni koio ñayiu ntdaa sekuechi hora ka kaku‑s.

24 Xaxeʼe xa n‑jandixa Moisés Ianyuux,

na n‑xaʼnu‑s,

ña n‑xejoon‑s xa jaʼan ka ñayiu xa kuu‑s daʼya yɨɨ daidɨʼɨ se kunxaʼnu ka Egipto.

25 N‑kaxí‑s xa kueʼe vida yaʼa‑s xiʼin ñayiu ka jandixa Ianyuux.

N‑xini‑s xa nux ndoo ka‑s veʼe se kunxaʼnu ka,

te kada‑s kuechi,

xa kudɨ ini mee‑s ná kudɨ ini ñayiu jan.

26 N‑xini‑s xa yaʼu ka xa kueʼe vida yaʼa‑s xiʼin Cristu,

Ia tundaʼa Ianyuux,

dada xa tnɨɨ‑s ntdaa xa io Egipto.

Chi n‑xo nduku‑s xa juñaʼa Ianyuux.

27 Xaxeʼe xa n‑jandixa Moisés Ianyuux,

n‑kee‑s Egipto.

Ña n‑yuʼu‑s.

Juini n‑xo kiti ini se kunxaʼnu ka nuu‑s,

ko n‑kundee ini‑s,

chi n‑xini‑s ɨɨn xa ña kuaʼa xa kundeʼa‑ro.

28 Xaxeʼe xa n‑jandixa Moisés Ianyuux,

n‑ndadakaʼnu‑s viko Paxcua.

N‑taʼu tniu‑s ñayiu Israel xa kodo koio‑i nɨñɨ yeʼe,

xa maxku kaʼni ángel,

ia xinokuechi nuu Ianyuux,

daʼya yɨɨ kiʼna nuu veʼe ñayiu Israel.

29 Xaxeʼe xa n‑ka jandixa ñayiu Israel Ianyuux,

n‑ka yaʼa‑i Mar Kueʼe,

ná yaʼa‑ro ñuʼu yichi.

Ko na n‑kixeʼe ñayiu Egipto xa duʼa kada‑i,

te n‑ka tnene‑i,

ntdaa‑i,

nuu ndute jan.

30 Xaxeʼe xa n‑ka jandixa ñayiu Israel Ianyuux,

te nungoio ntdaa xeveʼe ñuu Jericó.

Uxa kɨu n‑ka xikonduu ñayiu Israel yuʼu ñuu Jericó,

te duʼa n‑kuu.

31 Xaxeʼe xa n‑jandixa Rahab Ianyuux,

ña n‑xiʼí‑ña xiʼin ñayiu n‑ka xo kuxee ini ñuu‑ña,

chi n‑xeka vaʼa‑ña se n‑ka xitoyuʼu ñuu‑ña.

Te Rahab kuu ñadɨʼɨ diko mee‑ña.

32 Io kueʼe ka xa kuaʼa‑da xa kakuneʼe‑da.

Ko ña tuu na tiempo io.

Gedeón,

Barac,

Sansón.

Jefté,

David,

Samuel.

Te se n‑ka xian tnuʼu tnuʼu Ianyuux nuu taxaʼnu tnetnu‑ro du.

33 Xaxeʼe xa n‑ka jandixa‑s Ianyuux,

n‑ka niʼi‑s kueʼe ñuu xiʼin se kunxaʼnu ka ñuu jan,

n‑ka kida‑s xavaʼa xaxeʼe ñayiu,

te n‑ka tnɨɨ‑s xa n‑xiaʼan Ianyuux tnuʼu‑ia xa juñaʼa‑ia.

Xaxeʼe xa n‑ka jandixa‑s Ianyuux,

n‑kaku‑s xa kaxi aʼan ngaʼa.

34 Ña n‑ka xiʼí‑s,

na n‑yaʼa‑s nuu ñuʼu koko.

Ña n‑kuaʼa ñayiu xa kaʼni‑i‑sɨ yuchi.

Xaxeʼe xa n‑ka jandixa‑s Ianyuux,

juini ña ndaku‑s,

ko n‑ka ndundaku‑s.

N‑ka kunuu‑s,

na n‑ka jantnaʼa ñayiu xiʼin‑s,

te n‑ka kida‑s xa junu koio soldado se xini uʼu tnaʼa xiʼin‑s.

35 Xaxeʼe xa n‑ka jandixa ñadɨʼɨ Ianyuux,

n‑kida‑ia xa juini xá n‑xiʼí ñayiu keveʼe‑ña,

ko n‑ka nandoto ñayiu jan.

Ko dɨuni,

xaxeʼe xa n‑ka jandixa‑s Ianyuux,

dava‑s n‑ka xiʼí‑s.

N‑xini uʼu ñaʼa ñayiu,

nde n‑ka xaʼni‑i‑sɨ.

Nux n‑ka dandoo‑s Ianyuux n‑kuu,

te kaku koio‑s.

Ko ñaʼa.

Chi n‑ka juini‑s xa niʼi‑s xa kutuu vaʼa‑s xiʼin Ianyuux kuia ma jɨn ndɨʼɨ.

36 Dava ka‑s,

xaxeʼe xa n‑ka jandixa‑s Ianyuux,

n‑ka kida bula ñaʼa ñayiu,

xiʼin chirrión n‑ka janñaʼa‑i.

N‑ka tetnɨɨ ñaʼa‑i cadena,

te n‑ka chindiʼu ñaʼa‑i vekaa.

37 Xaxeʼe xa n‑ka jandixa‑s Ianyuux,

n‑ka xaʼni ñaʼa ñayiu xiʼin yuú,

te n‑ka xaʼnde dava ñaʼa‑i.

N‑ka tnɨɨ ñaʼa‑i juaʼan nuu juxtixia,

te n‑ka xaʼni ñaʼa‑i xiʼin yuchi.

Xaxeʼe xa n‑ka jandixa‑s Ianyuux,

ña tuu na daʼma‑s n‑xio,

diko ni ñɨɨ tkachi ñɨɨ nchiva n‑ka xo xiʼna‑s.

Ña tuu na tvini‑s,

ña tuu nax kaxi‑s,

ña tuu na veʼe‑s.

Xaxeʼe xa n‑ka jandixa‑s Ianyuux,

kueʼe vida n‑ka yaʼa‑s,

te n‑ka xini uʼu ñaʼa ñayiu.

38 N‑dandɨʼɨ ka mee‑s dada davaʼa nga ñayiu.

Ko n‑ka xo xikonuu‑s nuu ñayo ñayiu io.

N‑ka xo xikonuu‑s yuku.

N‑ka xo xio‑s yau kava,

n‑ka xo xio‑s nua.

39 Ntdaa ñayiu jan,

n‑jaʼan Ianyuux xa vaʼa n‑ka kida‑i,

xandaa kuu xa n‑ka jandixa‑i Ianyuux.

Ko ta tnɨɨ ka‑i xa n‑xiaʼan Ianyuux tnuʼu‑ia xa juñaʼa‑ia.

40 Chi n‑xani ini Ianyuux ɨɨn xa vaʼa ka xaxeʼe mee‑ro.

N‑xani ini‑ia xa idini vuelta ɨɨn nuu kada‑ia,

ná io ná juaʼan xa n‑jaʼan‑ia,

xaxeʼe ñayiu jan xiʼin xaxeʼe mee‑ro.