10
Chi ná kuu juendaʼu kuu tnuʼu taʼu tniu Moisés.
Vaxi xa yo vaʼa ka,
xa kuu xandaa kuu.
Xijan kuu xa,
juini kuia xiʼin kuia,
ka doko dutu xa ka xiaʼan ñayiu nuu Ianyuux,
ko ña kuaʼa tnuʼu taʼu tniu xa kada xa nuncas ma dakuido datau ka anu ñayiu.
2 Nux n‑kuaʼa n‑kuu,
te ma ndoñuʼu xa doko koio ka dutu xa ka xiaʼan ñayiu nuu Ianyuux.
Chi nux idinga vuelta n‑ka ndundoo‑i n‑kuu,
te mayo ka dakuido datau anu‑i.
3 Ko xa ka doko ñayiu,
ka kida xa ka najaʼan‑i kuechi‑i kuia xiʼin kuia.
4 Chi ña kuaʼa nɨñɨ ngutu xiʼin nɨñɨ nchiva xa dita‑i kuechi ñayiu.
5 Xijan kuu xa,
na n‑kixee Cristu ñuñayiu,
n‑jaʼan‑ia nuu Ianyuux:
Ñatu juini‑n xa kaʼni koio ka‑i kɨtɨ xaxeʼe‑n,
ñatu juini‑n xa dani juñaʼa koio ka‑i xa ka doko‑i nuu‑n.
Ko n‑kidavaʼa‑n yɨkɨ kuñu mee‑da.
6 Ñatu tna ini‑n xa teñuʼu ñayiu kɨtɨ nuu‑n.
Ñatu tna ini‑n xa taxi ñayiu xa ka doko‑i nuu‑n xaxeʼe kuechi‑i.
7 Te dada n‑jaʼan‑ia:
“Ianyuux,
yaʼa tuu‑da,
xa kada‑da xa juini mee‑n.
Chi duʼa yodotnuni libru.”
8 Ditna ka,
n‑jaʼan‑ia xa ñatu juini Ianyuux xa kaʼni ka ñayiu kɨtɨ xaxeʼe‑ia,
ni ñatu juini‑ia xa juñaʼa ka‑i xa doko‑i nuu‑ia.
Dani n‑jaʼan‑ia xa ñatu juini Ianyuux xa teñuʼu ka‑i kɨtɨ nuu‑ia,
ni ñatu juini‑ia xa juñaʼa ka‑i xa doko‑i xaxeʼe kuechi‑i.
Dɨuni,
n‑jaʼan‑ia xa ña tna ini Ianyuux ntdaa xaʼa.
Juini jaʼan tnuʼu taʼu tniu Moisés xa io xa doko ñayiu ntdaa xaʼa,
ko duʼa ñatu juini Ianyuux,
te duʼa ña tna ini Ianyuux.
9 Te dada n‑jaʼan‑ia:
“Ianyuux,
yaʼa tuu‑da,
xa kada‑da xa juini mee‑n.”
Duʼa,
n‑daxio‑ia xa kiʼna nuu,
xa kada‑ia xa kuu uu.
10 N‑kida Cristu xa n‑juini Ianyuux.
Xaxeʼe xa idini vuelta n‑xiʼí Jesucristu,
duʼa n‑kida dɨɨn ñaʼa Ianyuux mee‑ro,
xa ku kuu‑ro ñayiu mee‑ia.
11 Kɨu xiʼin kɨu,
ɨɨn ɨɨn dutu ñayiu Israel xiaʼan ka xa ka doko ñayiu nuu Ianyuux.
Kueʼe xa kueʼe vuelta,
dani nujuiin dutu jan te duʼa kida dutu jan,
ko nuncas ña kida xa doko jan xa dita kuechi ñayiu.
12 Ko Cristu,
idini vuelta n‑doko‑ia xa doko‑ia xa dita‑ia kuechi ñayiu,
te vitna nukoo‑ia ndaʼa kuaʼa Ianyuux.
13 Ijan ndetu‑ia,
nde jueñi niʼna‑ia ntdaa xa xini uʼu tnaʼa xiʼin‑ia.
14 Idini vuelta,
n‑xiaʼan Jesús xa doko‑ia nuu Ianyuux.
Na n‑xiʼí‑ia xaxeʼe‑i,
n‑kida‑ia xa ntdaa ñayiu kida dɨɨn Ianyuux,
kutuu vaʼa koio‑i xiʼin Ianyuux kuia ma jɨn ndɨʼɨ.
15 Te jaʼan ndaa Espíritu Ii nuu‑ro xa duʼa kuu.
Ditna ka jaʼan‑ia:
16 Te dada,
kada‑r ɨɨn tratu xee xiʼin‑i,
kuu Xtoʼo‑ro xiaʼan‑ia.
Kada‑r xa kunevaʼa koio‑i tnuʼu taʼu tniu‑r anu‑i,
te kuu ná kuu xa kadavaʼa‑r tnuʼu taʼu tniu‑r nuu xaxtnuni‑i.
17 Te dada jaʼan‑ia:
Ma najaʼan ka‑r ni kuechi‑i ni xa uʼu n‑ka kida‑i.
18 Te xaxeʼe xa xá n‑taxkanu ini Ianyuux kuechi‑i,
ña ndoñuʼu ka xa juñaʼa koio ka dutu xa doko ñayiu xaxeʼe kuechi‑i.
Na kuyatni‑ro Ianyuux
19 Xijan kuu xa,
xaxeʼe nɨñɨ Jesucristu,
maxku yuʼu‑ro xa kɨu‑ro nde nuu yo ii ka andɨu.
20 N‑kidavaʼa Jesús ɨɨn ichi xee,
ɨɨn ichi ndito,
xaxeʼe‑ro.
Ná kuu cortina veñuʼu tabernáculo,
n‑kuu yɨkɨ kuñu Jesús.
Na n‑xiʼí‑ia,
n‑ndata cortina jan,
te vitna kuaʼa xa yaʼa mee‑ro nde nuu tuu Ianyuux.
21 Jesús kuu dutu taxnuni ka nuu ñayiu ka jandixa Ianyuux.
22 Xijan kuu xa,
na kuyatni‑ro Ianyuux.
Xiʼin ntdaa anu‑ro,
na jandixa‑ro‑ia,
te maxku yuʼu‑ro.
Na n‑xiʼí Jesucristu,
n‑xatu nɨñɨ‑ia xa ndada ndoo ñaʼa‑ia,
xa mayo ka dakuido datau anu‑ro.
Te yɨkɨ kuñu‑ro,
xá n‑dajuendute‑ia ndute yo vaʼa ka.
23 Xá n‑ka jaʼan‑ro xa ndetu‑ro,
xa kada Ianyuux ntdaa ná io ná juaʼan tnuʼu n‑taxi‑ia.
Na kundee ini‑ro,
xa kundetu ka‑ro.
Na koo‑ro confianza nuu‑ia.
Chi xandaa kuu xa kada‑ia ntdaa xa jaʼan‑ia.
24 Na kani ini‑ro nanda kuaʼa‑ro xa chindee tnaʼa‑ro,
xa juemani‑ro Ianyuux xiʼin ñayiu,
te na kada‑ro xa kuu xavaʼa.
25 Na nataka‑ro,
maxku kada‑ro ná ka kida ñani‑ro kuʼa‑ro ñatuka nataka koio‑i xiʼin‑ro.
Na juña tnaʼa‑ro tnuʼu kanu ini,
xa kundee ini‑ro.
Te duʼa na kada ka‑ro,
chi vax kuyatni kɨu ndixi Xtoʼo‑ro.
26 Xijan kuu xa,
xá n‑tnɨɨ‑ro xandaa,
te kutnuni ini‑ro xa xandaa kuu.
Xá n‑ka jandixa‑ro Cristu.
Nux dandoo‑ro Cristu,
te ña tuu nax io xa doko‑ro xaxeʼe kuechi‑ro.
27 Diko ni,
yo loko yuʼu‑ro,
chi xini‑ro xa ndadandaa Ianyuux ñayiu xini uʼu tnaʼa xiʼin‑ia.
Te xiʼin ñuʼu yo ndeʼe koko,
danaa‑ia ñayiu jan.
28 Xá n‑kuu kueʼe kuia,
nux ɨɨn ñayiu n‑daxio tnuʼu taʼu tniu Moisés,
te uni ñayiu n‑ka jaʼan ndaa xa duʼa n‑kuu,
te ña n‑kundau ini ñaʼa ni ɨɨn ñayiu.
N‑xio xa kuú ñayiu jan.
29 Kani ini koio ka‑n.
Naka uʼu ka kada uʼu Ianyuux ɨɨn ñayiu daxio Cristu.
Kuu ná kuu xa chixeʼe ñayiu jan Daʼya Yɨɨ Ianyuux.
Kuu ná kuu xa jaʼan‑i xa ɨɨn xa kuiʼa kaa,
ɨɨn xa ñatu xiniñuʼu,
kuu nɨñɨ Cristu.
Xaxeʼe nɨñɨ Cristu,
n‑kida dɨɨn Ianyuux ñayiu jan,
xa ku kuu‑i ñayiu mee‑ia.
Xiʼin nɨñɨ Cristu,
n‑kida‑ia ntdaa ná io ná juaʼan tnuʼu‑ia xaxeʼe‑i.
Kuu ná kuu xa kuiʼa jaʼan ñayiu jan Espíritu Ii,
na n‑xiaʼan‑ia xamani Ianyuux.
30 Chi xini‑ro Ia n‑jaʼan:
“Kada uʼu mee‑r mee‑i.
Nachiyaʼu mee‑r xa n‑kida‑i.”
Te dani n‑jaʼan‑ia:
“Ndadandaa Ianyuux ñayiu jan.”
31 Naka uʼu xa xino ñayiu jan nuu ndaʼa Ianyuux.
32 Najaʼan koio‑n nanda n‑kuu kiʼna nuu,
na n‑ka kutnuni ini‑n xa kuu xandaa.
Kueʼe vida n‑ka yaʼa‑n.
Kuu ná kuu xa n‑ka jantnaʼa‑n xa kundee ini koio‑n.
33 Nuu ntdaa ñayiu,
kuiʼa n‑ka jaʼan‑s nuu‑n,
te n‑ka xini uʼu ñaʼa‑s.
Dɨuni,
n‑ka xo nujuiin‑n nuu se ijan,
xa chindee koio‑n ɨnka ñayiu duʼa kueʼe vida ka yaʼa.
34 N‑ka chindee‑n ñani‑ro kuʼa‑ro xyɨndiʼu vekaa.
N‑ka tnɨɨ ñayiu xaxii‑n,
ko n‑ka xejoon‑n xa duʼa koo,
te n‑ka kuvete‑n,
chi n‑ka xini‑n xa tnɨɨ koio mee‑n ɨɨn xa vaʼa ka,
nuncas ma jɨn ndɨʼɨ,
io andɨu.
35 Xijan kuu xa,
koo naʼi koio ka‑n confianza nuu Ianyuux.
Chi tnɨɨ koio mee‑n ntdaa xa taxi‑ia.
Kuu ná kuu xa nachiyaʼu ñaʼa‑ia,
xaxeʼe xa xndaxio‑n confianza nuu‑ia.
36 Io xa kundee ini koio ka‑n,
xa kada koio‑n ntdaa xa juini Ianyuux,
te tnɨɨ koio‑n ntdaa ná io ná juaʼan tnuʼu n‑taxi‑ia.
37 Chi jaʼan tnuʼu Ianyuux:
Chi xaku nga,
te ndixi Ia ndixi.
Ma kukuee ka‑ia.
38 Se jaʼan mee‑r xa ña tuu na kuechi‑s io,
kutuu vaʼa‑s,
xaxeʼe xa jandixa ñaʼa‑s mee‑r.
Ko nux ñatuka kundee ini‑s xa jandixa ñaʼa‑s,
te ma kuvete‑r xaxeʼe‑s.
Kuu Ianyuux xiaʼan‑ia.
39 Ko mee‑ro,
ñatu kuu‑ro ñayiu ñatu kundee ini,
xa danaa ñaʼa Ianyuux mee‑ro.
Kuu‑ro ñayiu ka jandixa Jesucristu,
xa kutuu vaʼa‑ro xiʼin Ianyuux kuia ma jɨn ndɨʼɨ.