Xa io ñuñayiu xiʼin xa io andɨu
9
Na n‑kida Ianyuux tratu kiʼna nuu,
n‑jaʼan‑ia nanda nakuetu ñayiu nuu‑ia.
Dɨuni n‑xio ɨɨn veñuʼu ñuñayiu yaʼa.
2 Veñuʼu tabernáculo n‑kuu.
Xiti cuartu kiʼna nuu,
n‑xio ɨɨn candeleru,
xiʼin ɨɨn mexa nuu kandodo tila ii.
Cuartu jan n‑danani Ianyuux Cuartu Ii.
3 Yata daʼma cortina kuu uu,
n‑xio ɨnka cuartu n‑danani Ianyuux Cuartu Yo Ii ka.
4 Ijan n‑xio altar nuu kayu duxa.
Kaa oro kuu altar jan.
Dɨuni ijan n‑xio xatnu ñuʼu tratu kiʼna nuu.
Ntdaa xatnu jan yodo kaa oro.
Xiti xatnu jan,
n‑xio kɨdɨ kaa oro ñuʼu maná,
vara n‑nandɨdɨ́ taxaʼnu tnetnu‑ro Aarón,
te uu yuú nuu n‑kidavaʼa Ianyuux tnuʼu tratu.
5 Nuu xatnu jan,
n‑xio uu ángel n‑kuaʼa kaa oro,
ángel nani querubines.
Xiʼin ndixi ángel jan daʼu nuu katuu xa doko dutu taxnuni ka xaxeʼe kuechi ñayiu.
Ko ma kakuneʼe‑da xaʼa vitna.
6 Na n‑xio tuʼa ntdaa xaʼa,
kɨu xiʼin kɨu,
n‑ka xo kɨu dutu cuartu kiʼna nuu,
xa nakuetu koio‑s.
7 Ko cuartu kuu uu,
meni dutu taxnuni ka n‑xo kɨu ijan,
idini kɨu ntnaʼa kuia.
Xiʼin nɨñɨ kɨtɨ,
n‑xo kɨu dutu taxnuni ka ijan,
xa juñaʼa‑s xa doko‑s xaxeʼe mee‑s,
xiʼin xaxeʼe kuechi ñayiu.
8 Xiʼin xaʼa,
dandeʼa ñaʼa Espíritu Ii xa ta kuaʼa ka kɨu koio ñayiu nuu tuu Ianyuux,
nɨni dani io naʼi veñuʼu tabernáculo kiʼna nuu.
9 Ntdaa xaʼa kuu ɨɨn xa dandeʼa ñaʼa mee‑ro vitna.
Dani ka xiaʼan dutu ñayiu Israel xa xiaʼan nga ñayiu xiʼin xa doko ñayiu nuu Ianyuux,
ko ña kuaʼa xaʼa xa kada xa ma dakuido datau anu ñayiu.
10 Meni tnuʼu taʼu tniu xa ka jandixa ñayiu kuu.
Xa xaxi‑ro,
xa xiʼi‑ro,
xa nandaʼa‑ro,
xa kunee ii‑ro.
Hora kida Ianyuux ɨɨn xaxee,
te ñatu xiniñuʼu ntdaa xaʼa.
11 Ko vitna xá n‑kixee Cristu.
Kuu‑ia dutu taxnuni ka kida ɨɨn xa yo vaʼa ka.
Ñatu tuu‑ia ɨɨn veñuʼu tabernáculo n‑ka kidavaʼa ñayiu,
ɨɨn xa io ñuñayiu yaʼa.
Nujuiin‑ia nuu Ianyuux ɨɨn nuu yo kaʼnu ka,
ɨɨn nuu yo vaʼa ka.
12 Ña n‑kɨu‑ia ijan xiʼin nɨñɨ nchiva,
xiʼin nɨñɨ ngutu kuechi.
Xaxeʼe nɨñɨ mee‑ia,
n‑kɨu‑ia idini vuelta,
nde nuu ii ka,
nuu tuu Ianyuux.
Te duʼa n‑chiyaʼu‑ia kuechi ñayiu,
kuia ma jɨn ndɨʼɨ.
13 Nɨñɨ nchiva,
xiʼin nɨñɨ ngutu,
xiʼin yaa vaca n‑kayu,
ntdaa xaʼa,
n‑ka xodo dutu nuu ñayiu Israel.
Ntdaa xaʼa n‑ka kida‑s,
xa ndundoo yɨkɨ kuñu ñayiu,
xa kunee ii‑i.
14 Ko yo vaʼa ka nɨñɨ Cristu.
Na n‑xiʼí Cristu,
n‑xiaʼan‑ia mee‑ia nuu Ianyuux.
Nuncas ña n‑kida Cristu kuechi,
ɨɨn xa io ndoo kuu‑ia.
Xiʼin Espíritu Ianyuux kutuu kuia ma jɨn ndɨʼɨ,
n‑xiaʼan Cristu xa doko‑ia nuu Ianyuux.
Te duʼa n‑kida Cristu xa ma dakuido datau anu‑ro.
Ntdaa xa kida mee‑ro,
xa dakaku‑ro mee‑ro,
kuu ná kuu ɨɨn xa ñatu xiniñuʼu,
ɨɨn xa n‑xiʼí.
Ko xaxeʼe Cristu,
kuu‑ro ñayiu ka xinokuechi nuu Ianyuux Ndito.
15 Numeʼñu Jesucristu nuu‑ro xiʼin Ianyuux,
xa kada‑ia ntdaa ná io ná juaʼan tratu xee.
N‑xiʼí‑ia xa chiyaʼu‑ia kuechi n‑ka kida ñayiu,
na n‑xio tratu kiʼna nuu.
Te vitna,
ñayiu jaʼan ñaʼa Ianyuux,
tnɨɨ koio‑i xa kutuu vaʼa koio‑i,
xiʼin Ianyuux kuia ma jɨn ndɨʼɨ.
Chi n‑taxi Ianyuux tnuʼu‑ia xa duʼa koo.
16 Chi nux io ɨɨn tratu,
nuu dɨɨn tnɨɨ koio ñayiu xaxii‑i,
te io xa jini‑ro nux xandaa kuu xa n‑xiʼí se n‑kidavaʼa tratu jan.
17 Chi ña kuaʼa xa kada‑ro ná io ná juaʼan ɨɨn tratu,
nɨni tuu naʼi ka se n‑kida tratu jan.
Na n‑yaʼa xa n‑xiʼí‑s,
dada tnɨɨ koio daʼya‑s xa n‑xiaʼan‑s.
18 Dɨuni tratu kiʼna nuu.
N‑xio xa n‑ka xiʼí kɨtɨ,
xa koo ná io ná juaʼan tratu jan.
19 Ditna ka,
n‑jaʼan Moisés ntdaa tnuʼu taʼu tniu nuu ntdaa ñayiu ijan.
Dada,
n‑tnɨɨ‑s nɨñɨ ngutu kuechi,
xiʼin nɨñɨ nchiva.
N‑daka‑s nɨñɨ jan xiʼin ndute.
N‑tnɨɨ‑s ɨɨn ndaʼa yutnu nani hisopo,
duku niʼna idi tkachi n‑kaʼi color kueʼe,
te xiʼin ndaʼa yutnu jan,
n‑xodo‑s nɨñɨ jan nuu libru tnuʼu taʼu tniu.
Te dada n‑xodo‑s nɨñɨ jan nuu ntdaa ñayiu ijan.
20 N‑jaʼan‑s:
“Nɨñɨ yaʼa,
daxino tratu n‑kida Ianyuux xaxeʼe‑n.”
21 Dada,
n‑xodo‑s nɨñɨ nuu veñuʼu tabernáculo,
xiʼin nuu ntdaa xa juetniu koio dutu.
22 Jaʼan tnuʼu taʼu tniu xa vaa ntdaa xa io,
io xa ndada ndoo‑ro xiʼin nɨñɨ.
Nux na taxkanu ini Ianyuux kuechi ñayiu,
io xa katu nɨñɨ.
Dita Cristu kuechi‑ro
23 Xijan kuu xa,
n‑ndoñuʼu xa duʼa n‑ndundoo ntdaa xa ñuʼu xiti veñuʼu tabernáculo,
chi meni xa io ñuñayiu kuu.
Kuu ná kuu juendaʼu ntdaa xa io andɨu.
Ko ntdaa xa io andɨu,
ndoñuʼu xa doko ɨɨn xa yo vaʼa ka.
24 Chi ña n‑kɨu Cristu ɨɨn veñuʼu n‑ka kidavaʼa ñayiu.
Chi diko ni juendaʼu kuu veñuʼu ka kidavaʼa ñayiu.
Ko n‑kɨu Cristu andɨu,
nuu nujuiin‑ia nuu Ianyuux xaxeʼe‑ro vitna.
25 Dutu taxnuni ka ñuñayiu,
xko kɨu‑s Cuartu Yo Ii ka,
kuia xiʼin kuia.
Te nɨñɨ ka doko‑s,
ñatu kuu nɨñɨ mee‑s.
Ko Cristu,
ña n‑xiaʼan‑ia mee‑ia kueʼe vuelta.
26 Nux duʼa n‑kuu,
te n‑xio xa kuú Cristu kueʼe vuelta,
nde na n‑kidavaʼa Ianyuux ñuñayiu xiʼin nde vitna.
Ko vitna,
hora vax ndɨʼɨ ntdaa xa io,
n‑kixee‑ia idini vuelta,
xa juñaʼa nga‑ia mee‑ia,
xa dita‑ia kuechi.
27 Idini vuelta kuú‑ro,
ɨɨn ɨɨn‑ro,
te dada,
ndadandaa ñaʼa Ianyuux.
28 Dɨuni,
idini vuelta n‑xiʼí Cristu,
xa dita‑ia kuechi kueʼe ñayiu.
Vuelta kuu uu kixee‑ia.
Ñadu xa dita‑ia kuechi.
Kixee‑ia xa dakaku‑ia ñayiu xndetu ñaʼa,
xa kutuu koio‑i xiʼin‑ia kuia ma jɨn ndɨʼɨ.