Xá n‑kida Ianyuux tratu xee
8
Xaʼa kuu xa jaʼan‑da.
Duʼa kuu dutu taxnuni ka n‑taxi Ianyuux.
Taxnuni‑ia andɨu,
nuu nukoo‑ia ndaʼa kuaʼa Ianyuux,
Ia taxnuni nuu ntdaa xa io.
2 Kuu‑ia dutu taxnuni ka,
nuu tuu Ianyuux veñuʼu tabernáculo ndaa ña n‑ka kidavaʼa ñayiu.
Andɨu,
kuu‑ia dutu taxnuni ka nuu Ianyuux xaxeʼe‑ro.
3 N‑nduku Ianyuux ɨɨn ɨɨn dutu taxnuni ka nuu ñayiu Israel,
xa juñaʼa‑s xa ka xiaʼan nga ñayiu xiʼin xa ka doko ñayiu.
Xijan kuu xa,
n‑xio xa koo ɨɨn xa doko dutu taxnuni ka tuu andɨu tuku.
4 Nux dani n‑xo tuu‑ia ñuñayiu n‑kuu,
te ma ku kuu‑ia dutu,
chi xndaxio dutu ka xiaʼan xa ka doko ñayiu ná io ná juaʼan tnuʼu taʼu tniu Moisés.
5 Ntdaa xa ka kida dutu ñayiu Israel kuu ná kuu ɨɨn juendaʼu ntdaa xa io andɨu.
Na n‑kixeʼe Moisés xa kadavaʼa‑s veñuʼu nani tabernáculo,
n‑jaʼan Ianyuux:
“Koo‑n cuedado,
xa kadavaʼa‑n ntdaa,
ná io ná juaʼan xa n‑dandeʼa ñaʼa‑r dɨkɨ yuku.”
6 Ko yo vaʼa ka xa kida Jesús,
dada xa ka kida dutu ñayiu Israel.
Dɨuni yo vaʼa ka tratu xee,
dada tratu kiʼna nuu.
Nujuiin Jesús nuu Ianyuux xaxeʼe‑ro,
kida‑ia ná io ná juaʼan tnuʼu yo vaʼa ka n‑taxi Ianyuux.
7 Chi nux ndaku xa kada‑ro ná io ná juaʼan tratu kiʼna nuu n‑kuu,
te ma ndoñuʼu xa koo ɨnka.
8 Ko n‑tekuechi Ianyuux ñayiu jan,
chi jaʼan tnuʼu Ianyuux:
Jaʼan Xtoʼo‑ro:
“Vaxi kɨu xa kada‑r tratu xee xiʼin ñayiu Israel,
xiʼin ñayiu Judá.
9 Tratu xee,
ñatu kuu ná kuu tratu n‑kida‑r xiʼin taxaʼnu tnetnu ñayiu jan.
N‑daneʼe‑r ñayiu jan,
te ndeka‑r ñayiu jan juaʼan,
xa kee koio‑i ñuu nani Egipto.
Ko ña n‑ka jandixa‑i tratu n‑kida‑r,
te xijan kuu xa n‑dandoo‑r‑yɨ”,
kuu Xtoʼo‑ro xiaʼan‑ia.
10 Jaʼan Xtoʼo‑ro:
“Duʼa kuu tratu xee kada‑r xiʼin ñayiu Israel,
na yaʼa kɨu ijan.
Kada‑r xa kani ini koio‑i tnuʼu taʼu tniu‑r,
te kuu ná kuu xa kadavaʼa‑r tnuʼu taʼu tniu‑r anu‑i.
Te ku kuu‑r Ianyuux jandixa koio‑i.
Te ku kuu koio mee‑i,
ñayiu mee‑r.
11 Te ma ndoñuʼu xa dakuaʼa ɨɨn seyɨɨ ñayiu xtuu xiʼin‑s,
xiʼin ñani‑s,
xiʼin kuʼa‑s,
xa kunduu koio‑s xiʼin Xtoʼo‑ro.
Chi kunduu koio ntdaa ñayiu xiʼin‑r,
nde sekuechi xiʼin nde sexaʼnu.
12 Chi taxkanu ini‑r xa uʼu n‑ka kida‑i,
te ma najaʼan ka‑r kuechi‑i.”
Kuu Ianyuux xiaʼan‑ia.
13 Hora jaʼan Ianyuux xa tratu xee kuu,
jaʼan‑ia xa ñatuka xiniñuʼu tratu kiʼna nuu.
Te nux ñatuka xiniñuʼu,
nux xa nyɨɨ kuu,
io xa jɨn ndɨʼɨ.