Ná n‑kuu Melquisedec kuu Jesús
7
Te Melquisedec n‑kuu se kunxaʼnu ka ñuu nani Salem.
N‑kuu‑s dutu nuu Ianyuux Kunxaʼnu ka.
N‑xe tnaʼa‑s taxaʼnu tnetnu‑ro Abraham,
na juan ndixi‑s,
na n‑xaʼni Abraham koon se kunxaʼnu ka.
Te n‑jaʼan Melquisedec xa na kada Ianyuux xa kutuu vaʼa Abraham.
2 Uxi uxi ɨɨn ɨɨn cientu ntdaa xaxii n‑tnɨɨ Abraham,
n‑xiaʼan‑s nuu Melquisedec.
Melquisedec juini kachi “se kunxaʼnu ka kida meni xavaʼa”.
Dani se kunxaʼnu ka ñuu nani Salem juini kachi “se kunxaʼnu ka kida xa kutuu mani ñayiu”.
3 Ña xini‑ro jundu n‑kuu taa‑s,
dɨʼɨ‑s,
taxaʼnu tnetnu‑s.
Ña xini‑ro nakɨu n‑kaku‑s,
ni nanda n‑xiʼí‑s.
Ná kuu Daʼya Yɨɨ Ianyuux,
da n‑kuu Melquisedec,
ɨɨn dutu nɨkava nɨkuita.
4 Na kani ini‑ro.
Xandaa kuu,
xa se kunxaʼnu n‑kuu Melquisedec,
chi juini Abraham n‑kuu se kuu taa ntdaa ñayiu Israel,
ko n‑xiaʼan‑s nuu Melquisedec uxi uxi ɨɨn ɨɨn cientu ntdaa xa n‑niʼi‑s.
¿Nakuenda duʼa n‑kuu?
5 Xnaʼa‑n xa tnuʼu taʼu tniu Moisés jaʼan xa se ka kuu dutu,
se ka kuu daʼya dana Leví,
io xa tnɨɨ koio‑s uxi uxi ɨɨn ɨɨn cientu xaxii ñayiu Israel.
Duʼa kuu,
juini ñani tnaʼa‑s ka kuu‑s xiʼin‑s.
Nduu‑s ka kuu‑s daʼya dana Abraham.
6 Ko Melquisedec,
juini ña n‑kuu‑s daʼya dana Leví,
ko n‑tnɨɨ‑s uxi uxi ɨɨn ɨɨn cientu xa n‑niʼi Abraham.
Dani,
juini Abraham n‑kuu se nuu n‑xiaʼan Ianyuux tnuʼu‑ia xa vaʼa kada‑ia xaxeʼe‑s,
ko n‑jaʼan Melquisedec xa na kada Ianyuux xa kutuu vaʼa Abraham.
¿Nakuenda duʼa n‑kuu?
7 Naʼa‑ro xa kunxaʼnu ka se jaʼan:
“Dios te” dada se jaʼan:
“La mano,
dito.”
Xijan kuu xa,
xini‑ro xa kunxaʼnu ka Melquisedec dada taxaʼnu tnetnu‑ro Abraham.
8 Te dɨuni,
se ka tnɨɨ uxi uxi ɨɨn ɨɨn cientu xaxii ñayiu,
ka kuu‑s ñayiu kuú koio.
Ko jaʼan tnuʼu Ianyuux xa Melquisedec n‑kuu dutu n‑xo tuu nɨkava nɨkuita.
9 Kuu ná kuu xa Leví,
se tnɨɨ uxi uxi ɨɨn ɨɨn cientu xaxii ñayiu,
n‑chiyaʼu mee‑s uxi uxi ɨɨn ɨɨn cientu,
na n‑tnɨɨ Melquisedec xa n‑xiaʼan Abraham.
10 Chi na n‑xe tnaʼa Melquisedec Abraham,
juini ta kaku ka Leví,
ko daʼya dana Abraham ku kuu‑s.
11 Nux n‑kuaʼa xa kada koio dutu ka kuu daʼya dana Leví,
xa kutuu vaʼa ñayiu xiʼin Ianyuux n‑kuu,
te,
¿nakuenda ndoñuʼu xa kixee ɨnka dutu?
Xaxeʼe xa n‑ka xio dutu jan,
n‑ka tnɨɨ ñayiu Israel tnuʼu taʼu tniu Moisés.
Ná kuu taxaʼnu tnetnu‑ro Aarón,
ka kuu dutu jan.
Ko n‑xio xa kixee ɨnka dutu,
ɨɨn dutu kuu ná n‑kuu Melquisedec.
12 Chi nux dama dutu,
io xa dama tnuʼu taʼu tniu tuku.
13 Kakuneʼe‑da Jesús.
Dɨʼɨ Jesús kuu daʼya dana taxaʼnu tnetnu‑ro Judá,
te ni ɨɨn ñayiu Judá nuncas ña n‑kuu dutu nuu Ianyuux.
14 Naʼa‑ro xa Xtoʼo‑ro kuu daʼya dana Judá,
te ña n‑kakuneʼe Moisés ñayiu Judá,
na n‑kakuneʼe‑s dutu.
15 Te kaxi ka koo ntdaa xaʼa,
nux kixee ɨnka dutu kuu ná n‑kuu Melquisedec.
16 Te ñatu kuu‑ia dutu xaxeʼe xa kuu‑ia daʼya dana Leví,
ná jaʼan tnuʼu taʼu tniu.
Ñaʼa.
Kuu‑ia dutu,
xaxeʼe xa taxnuni‑ia,
xaxeʼe xa juini n‑ka xaʼni‑s‑ia,
ko ña n‑ka kuaʼa‑s xa danaa‑s‑ia,
chi n‑nandoto‑ia xa kutuu‑ia kuia ma jɨn ndɨʼɨ.
17 Chi jaʼan ndaa Ianyuux xaxeʼe dutu jan:
Dutu kuu‑n nɨkava nɨkuita.
Nani n‑kuu Melquisedec,
dani kuu mee‑n.
18 Xijan kuu xa io xa dandoo‑ro tnuʼu taʼu tniu kiʼna nuu.
Chi ɨɨn xa ña ndaku,
ɨɨn xa ñatu xiniñuʼu,
kuu.
19 Chi tnuʼu taʼu tniu Moisés,
ña kuaʼa xa kada xa kutuu vaʼa‑ro xiʼin Ianyuux.
Xá n‑tnɨɨ‑ro tnuʼu n‑taxi Ianyuux,
te xndetu‑ro ntdaa xa vaʼa ka taxi‑ia.
Te duʼa kuyatni‑ro nuu Ianyuux.
20 N‑xiaʼan Ianyuux tnuʼu‑ia xa duʼa kuu.
21 Ña n‑xiaʼan Ianyuux tnuʼu‑ia,
na n‑ka kuu ɨnka seyɨɨ dutu.
Ko n‑xiaʼan Ianyuux tnuʼu‑ia,
na n‑nduu Jesús dutu,
chi jaʼan tnuʼu Ianyuux:
N‑xiaʼan Ianyuux tnuʼu‑ia,
te ma dama‑ia tnuʼu‑ia:
“Dutu kuu‑n nɨkava nɨkuita.
Nani n‑kuu Melquisedec,
dani kuu mee‑n.”
22 Yo vaʼa ka tnuʼu yaʼa.
Naʼa‑ro xa xá n‑kida Jesús ntdaa ná io ná juaʼan tnuʼu yaʼa.
23 N‑ka xio kueʼe dutu,
xaxeʼe xa n‑ka xo xiʼí‑s te ña n‑kuaʼa‑s xa ku kuu ka‑s dutu.
24 Ko Jesús,
kutuu‑ia kuia ma jɨn ndɨʼɨ.
25 Xijan kuu xa,
ñayiu ka kunduu xiʼin Ianyuux,
xaxeʼe xa ka jandixa‑i Jesús,
kuaʼa‑ia xa dakaku‑ia ñayiu jan,
xa kutuu vaʼa koio mee‑i tuku,
xiʼin Ianyuux,
kuia ma jɨn ndɨʼɨ.
Chi kutuu Jesús kuia ma jɨn ndɨʼɨ,
xa kajan taʼu‑ia nuu Ianyuux xaxeʼe‑i.
26 Te dutu taxnuni ka kuu Jesús,
kida‑ia ná io ná juaʼan ntdaa xa ndoñuʼu‑ro.
Kida‑ia ntdaa xa juini Ianyuux.
Meni xavaʼa kida‑ia.
Nuncas ña kida‑ia xa uʼu.
Ñatu kuu‑ia ná ka kuu ñayiu ka kida kuechi.
Xá n‑kida Ianyuux xa taxnuni‑ia nuu ntdaa xa io nuu dujun ka dada andɨu.
27 Ñatu kuu‑ia ná kuu ɨnka dutu n‑ka taxnuni ka.
Mee‑s,
ɨɨn kɨu ɨɨn kɨu,
ditna ka n‑ka xo xiaʼan‑s xa doko mee‑s xaxeʼe kuechi mee‑s,
te dada n‑ka xo xiaʼan‑s xa doko ñayiu xaxeʼe kuechi mee‑i.
Ko Jesús,
idini vuelta,
n‑xiaʼan‑ia mee‑ia,
xa chiyaʼu‑ia kuechi‑ro nɨkava nɨkuita.
28 Xiʼin tnuʼu taʼu tniu Moisés,
se ña ndaku ka kuu dutu taxnuni ka.
Ko na n‑yaʼa xa n‑ka tnɨɨ ñayiu tnuʼu taʼu tniu,
n‑xiaʼan Ianyuux tnuʼu‑ia xa kixee ɨnka dutu taxnuni ka.
Daʼya Yɨɨ‑ia kuu‑ia,
te kida‑ia ntdaa ná io ná juaʼan tnuʼu jan,
kuia ma jɨn ndɨʼɨ.