6
Xijan kuu xa,
na xee xa kunxaʼnu‑ro.
Xá n‑ka tnɨɨ‑n tnuʼu vaʼa Cristu.
Na dandoo‑ro tnuʼu n‑ka dakuaʼa ñaʼa‑s kiʼna nuu.
Ná kuu cimientu veʼe kuu xaʼa.
Ma kadavaʼa‑ro cimientu jan ɨnka vuelta.
N‑ka dakuaʼa ñaʼa‑s,
xa io xa natu ini‑n kuechi‑n,
chi kida kuechi xa ma kutuu koio‑n xiʼin Ianyuux.
N‑ka dakuaʼa ñaʼa‑s,
xa io xa jandixa‑n Ianyuux.
2 N‑ka dakuaʼa ñaʼa‑s,
xa io xa nandaʼa koio‑n te juendute koio‑n.
N‑ka dakuaʼa ñaʼa‑s,
xa io xa kajan ndodo ñaʼa‑s ndaʼa‑s,
xa tnɨɨ‑n Espíritu Ianyuux.
N‑ka dakuaʼa ñaʼa‑s,
xa nandoto koio ndɨyɨ te ndadandaa Ianyuux ntdaa xa io.
Na dandoo‑ro ntdaa xaʼa.
3 Na xee xa kunxaʼnu‑ro,
nux juejoon Ianyuux.
4 Io ɨɨn xa ña kuaʼa.
Kani ini koio‑n ɨɨn ñayiu.
N‑kutnuni ini‑i tnuʼu Ianyuux,
n‑tnɨɨ‑i xa n‑xiaʼan Ianyuux,
te n‑kidatniu Espíritu Ii anu‑i.
5 N‑xini‑i xa vaʼa xa vaʼa tnuʼu Ianyuux,
te n‑xini‑i xa taxnuni Ianyuux nuu ñuñayiu vaxi.
6 Nux dandoo ñayiu jan Cristu,
te ma kuaʼa xa natu ini‑i ɨnka vuelta,
chi kuu ná kuu xa xatakaa ñayiu jan Daʼya Yɨɨ Ianyuux ɨnka vuelta,
te kida bula ñayiu jan Cristu nuu ntdaa ñayiu.
7 Kuu ná kuu,
hora kidatniu‑ro ñuʼu.
Ñuʼu vaʼa,
na koʼo vaʼa ndute ntnaʼa juun dau,
te kane xa kax koʼo ñayiu kidatniu ijan,
te kada Ianyuux xa vaʼa xa vaʼa ka ñuʼu jan.
8 Ko nux meni iñu taʼa xiʼin iñu kɨun kane,
te ña xiniñuʼu ñuʼu jan,
te tnuʼu kiti ini jaʼan Ianyuux nuu ñuʼu jan,
te teñuʼu‑ia.
Ndetu‑ro xa tnɨɨ‑ro ntdaa xa taxi Ianyuux
9 Ko,
ñani mani‑da kuʼa mani‑da,
juini duʼa jaʼan‑da,
ko io‑da confianza xa ña ka kuu mee‑n ñayiu ka dandoo Cristu.
Io‑da confianza xa kada Ianyuux xa kutuu vaʼa koio‑n xiʼin‑ia.
10 Meni xavaʼa kida Ianyuux.
Ma ndunaa‑ia nanda ka kidatniu‑n,
ma ndunaa‑ia xa dandeʼa‑n xa xemani‑n mee‑ia,
hora chindee‑n ñayiu ka jandixa‑ia.
Duʼa n‑ka kida‑n,
te duʼa ka kida‑n vitna.
11 Juini‑da xa duʼa kada koio ka‑n,
ɨɨn ɨɨn‑n,
nde ndixi Cristu.
Te duʼa kutuu vaʼa koio‑n xiʼin Ianyuux.
12 Maxku kukudi koio‑n.
Na kada koio mee‑n,
ná ka kida ñayiu ka jandixa Ianyuux,
ñayiu kundee ini xa tnɨɨ koio‑i xa juñaʼa Ianyuux.
13 N‑xiaʼan Ianyuux tnuʼu mee‑ia nuu taxaʼnu tnetnu‑ro Abraham.
Ña tuu nax kunxaʼnu ka dada Ianyuux.
Xijan kuu xa,
n‑jaʼan‑ia nuu Abraham xa xaxeʼe mee‑ia kada‑ia ná n‑jaʼan‑ia.
14 N‑jaʼan‑ia:
“Xandaa kuu xa vaʼa xa vaʼa ka kutuu‑n xiʼin‑r,
te kada‑r xa koo koio kueʼe xa kueʼe xa kueʼe daʼya dana‑n.”
15 Kuee kuee n‑xo ndetu Abraham,
te n‑tnɨɨ‑s ntdaa xa n‑jaʼan Ianyuux.
16 Hora juini ɨɨn seyɨɨ xa kutnuni ini koio ñayiu xa jaʼan‑s xa kuu xandaa,
te chinaa‑s Ianyuux,
chi kunxaʼnu ka Ianyuux dada mee‑s.
Te ka kutnuni ini ñayiu xa xandaa jaʼan‑s,
te ma kuaʼa xa jantnatnuʼu koio ka‑i xiʼin‑s.
17 Ianyuux du.
N‑juini‑ia xa kutnuni ini koio ñayiu xa nani jaʼan‑ia dani kida‑ia,
ñatu dama‑ia ni ɨɨn tnuʼu jaʼan‑ia.
Nuu ñayiu tnɨɨ koio xa juñaʼa‑ia n‑jaʼan‑ia:
“Taxi‑r tnuʼu‑r xa duʼa koo,
te naʼa mee‑r xa duʼa kada‑r.”
18 Xijan kuu xa,
io uu xa io xa ma kuaʼa xa dama.
Ma dama Ianyuux,
te ma dama tnuʼu‑ia.
Ñatu kuaʼa Ianyuux xa jaʼan‑ia tnuʼu vete.
Xijan kuu xa,
na koo kaʼnu anu‑ro.
Xá n‑xee‑ro nuu Ianyuux,
xa tnɨɨ‑ro xa taxi‑ia.
Na kundee ini‑ro,
na kundetu kuee‑ro,
nde na tnɨɨ‑ro ntdaa xa taxi‑ia.
19 Xa ndetu‑ro xa tnɨɨ‑ro ntdaa xa taxi Ianyuux,
kida xa kundee ini‑ro,
ná kida kaa nani ancla,
xa ña xejoon‑i xa kanda barcu.
Xa ndetu‑ro nuu Ianyuux,
kuu ná kuu xa xá n‑kɨu‑ro nuu tuu‑ia andɨu.
20 Ijan juan nuʼu Jesús,
ndodo nuu‑ia nuu mee‑ro.
Ijan xá n‑kɨu‑ia xaxeʼe‑ro.
Dutu taxnuni ka kuu‑ia nɨkava nɨkuita.
Ná n‑kuu Melquisedec kuu‑ia.