5
Ɨɨn ɨɨn dutu taxnuni ka kuu se n‑kaxí Ianyuux tnaʼa nuu ñayiu.
N‑nduku Ianyuux mee‑s,
xa kunujuiin‑s nuu mee‑ia,
xaxeʼe ñayiu jan.
Najuñaʼa‑s nuu Ianyuux xa ka doko ñayiu,
xiʼin xa ka xiaʼan nga‑i nuu Ianyuux xaxeʼe kuechi‑i.
2 Kuaʼa‑s xa koo‑s pacencia nuu ñayiu ña xini,
ñayiu ka kida kuechi,
chi ná ka kuu mee‑i,
dani kuu mee‑s.
3 Xijan kuu xa,
io xa juñaʼa‑s xa doko mee‑s xaxeʼe kuechi mee‑s,
antecas xa najuñaʼa‑s xa ka doko ñayiu xaxeʼe kuechi mee‑i.
4 Ni ɨɨn seyɨɨ kuaʼa xa kaxí‑s mee‑s,
xa ku kuu‑s dutu taxnuni ka.
Nduku Ianyuux mee‑s,
nani n‑nduku‑ia taxaʼnu tnetnu‑ro Aarón.
5 Cristu,
Ia n‑tundaʼa ñaʼa Ianyuux,
du.
Ñadu mee‑ia ndadakaʼnu‑ia,
xa ku kuu‑ia dutu taxnuni ka xaxeʼe‑ro.
Chi Ianyuux n‑nduku ñaʼa.
N‑jaʼan Ianyuux:
Daʼya‑r kuu‑n;
vitna n‑kudaʼya ñaʼa‑r.
6 Ɨnka vuelta n‑jaʼan Ianyuux:
Dutu kuu‑n nɨkava nɨkuita.
Nani n‑kuu Melquisedec,
dani kuu mee‑n.
7 Na n‑xo tuu Cristu ñuñayiu yaʼa,
n‑xijan taʼu‑ia nuu Taa‑ia Ianyuux,
xa dakaku ñaʼa‑ia,
xa ma kuú‑ia xiʼin kuechi‑ro.
N‑kana xee‑ia,
te n‑ndaʼi‑ia.
Te n‑teku Ianyuux,
na n‑xijan taʼu Daʼya Yɨɨ‑ia,
xaxeʼe xa kida Daʼya Yɨɨ‑ia ntdaa xa juini Ianyuux.
8 Juini kuu‑ia Daʼya Yɨɨ Ianyuux,
ko n‑dakuaʼa‑ia xa kada naʼi ka‑ia xa juini Ianyuux,
na kueʼe vida n‑yaʼa‑ia.
9 N‑daxinokava‑ia tniu n‑xiaʼan Ianyuux,
te duʼa n‑kida‑ia xa kutuu vaʼa koio ntdaa ñayiu ka kida xa juini mee‑ia,
xiʼin Ianyuux kuia ma jɨn ndɨʼɨ.
10 N‑jaʼan Ianyuux xa kuu‑ia dutu taxnuni ka,
ná n‑kuu Melquisedec.
Na jandixa naʼi ka‑ro
11 Kueʼe ka io xa juini‑da xa kakuneʼe‑da,
ko uʼu kuu,
chi ña ka juini‑n xa kutnuni ini koio ka‑n.
12 Xá n‑yaʼa kuia xa n‑ka tnɨɨ‑n tnuʼu vaʼa Jesucristu.
Io xa dakuaʼa koio mee‑n ɨnka ñayiu,
ko dani ka ndoñuʼu‑n xa nadakuaʼa xee ñaʼa ɨɨn ñayiu tnuʼu jan.
Ta kunxaʼnu koio ka‑n.
Ná kuu seyɨjɨn xiʼi dɨku,
ta kuaʼa ka‑s xa kaxi‑s,
ka kuu‑n.
13 Te nux dani ka xiʼi‑n dɨku,
seyɨjɨn ka kuu‑n,
te ta kada koio ka‑n xa kuu xavaʼa.
14 Ñayiu xaʼnu,
ka kuaʼa‑i xa kax koio‑i.
Xá n‑ka dakuaʼa‑i xa kutnuni ini koio‑i xa kuu xavaʼa xiʼin xa kuu xa uʼu.