4
Xá n‑taxi Ianyuux tnuʼu‑ia,
xa kuaʼa‑ro xa kɨu‑ro nuu tuu‑ia,
xa ndetatu‑ro xiʼin‑ia.
Xijan kuu xa na koo‑ro cuedado,
xa nada ñaʼa ma kɨu koio‑n ijan.
2 Chi se xian tnuʼu tnuʼu vaʼa Ianyuux nuu ñayiu xá n‑ka kachitnuʼu tnuʼu jan mee‑ro tuku,
nani n‑ka xian tnuʼu ɨnka seyɨɨ nuu ñayiu jan.
Ko nuu ñayiu ijan,
ñatu n‑xiniñuʼu tnuʼu jan,
chi ña n‑ka jandixa‑i tnuʼu n‑ka teku‑i.
3 Ko mee‑ro,
xá n‑jandixa‑ro tnuʼu‑ia,
te kɨu‑ro nuu tuu‑ia,
xa ndetatu‑ro xiʼin‑ia.
Nani n‑jaʼan‑ia,
dani kuu:
Xijan kuu xa,
loko n‑kiti ini‑r nuu ñayiu jan,
te xiʼin tnuʼu kiti ini n‑jaʼan‑r:
“Maxkɨu maxñuu kɨu koio ñayiu jan nuu tuu‑r xa ndetatu koio‑i xiʼin‑r.”
Xá daa n‑daxinokava Ianyuux tniu n‑kida‑ia,
na n‑kidavaʼa‑ia ntdaa xa io.
4 Chi io tnuʼu nuu n‑kakuneʼe‑ia kɨu kuu uxa.
N‑jaʼan‑ia:
Kɨu kuu uxa n‑ndetatu Ianyuux,
chi n‑daxinokava‑ia ntdaa tniu n‑kida‑ia.
5 Te ɨnka vuelta:
Maxkɨu maxñuu kɨu koio ñayiu jan nuu tuu‑r xa ndetatu koio‑i xiʼin‑r.
6 Ko ta kɨu koio ka ni ɨɨn ñayiu ijan.
Chi ñayiu nuu n‑ka xian tnuʼu‑s tnuʼu Ianyuux kiʼna nuu,
ña n‑ka kɨu‑i,
chi ña n‑ka kida‑i xa n‑jaʼan Ianyuux.
7 Xijan kuu xa,
ɨnka vuelta n‑jaʼan Ianyuux:
“vitna.”
Na n‑yaʼa kueʼe kuia,
n‑jaʼan‑ia ɨnka vuelta,
na n‑jaʼan David tnuʼu xá n‑kakuneʼe‑ro:
Vitna,
nux ka teku‑n xa jaʼan Ianyuux,
maxku kada xee ini koio‑n anu‑n.
8 Nux n‑kida taxaʼnu tnetnu‑ro Josué xa n‑ndetatu ñayiu jan,
te ma jaʼan Ianyuux xa io ɨnka kɨu n‑kuu.
9 Xijan kuu xa,
io naʼi ka ɨɨn nuu nuu ndetatu koio ñayiu ka jandixa Ianyuux.
10 Chi davaʼa nga ñayiu kɨu nuu tuu Ianyuux,
xa ndetatu‑i xiʼin‑ia,
ndetatu‑i xa ma kada ka‑i tniu mee‑i,
ná n‑ndetatu Ianyuux nu n‑kida‑ia.
11 Xijan kuu xa,
na kundee ini‑ro xa kɨu‑ro nuu tuu Ianyuux,
xa ndetatu‑ro xiʼin‑ia,
xa maxku kada ni ɨɨn‑ro ná n‑ka kida ñayiu jan,
xa ña n‑ka kɨu‑i nuu tuu‑ia xa ndetatu‑i xiʼin‑ia.
12 Yo ndaku tnuʼu Ianyuux.
Tnuʼu ndito kuu.
Deen ka tnuʼu Ianyuux dada espada uu nuu.
Kuu ná kuu xa kɨu ñaʼa tnuʼu Ianyuux nde anu‑ro,
xa kototnuni tnuʼu jan ntdaa xa kuu‑ro,
ntdaa xa xani ini‑ro,
ntdaa xa juini‑ro xa kada‑ro.
13 N‑kidavaʼa Ianyuux ntdaa xa io.
Ña tuu ni ɨɨn xa yɨvaʼa,
xa ña kuaʼa Ianyuux xa jini‑ia.
Ña tuu ni ɨɨn xa daʼu,
ntdaa io kanda nuu Ia ndeʼa ntdaa xa io.
Te io xa na kuʼa‑ro cuenta nuu‑ia.
Dutu taxnuni ka kuu Jesús
14 Nujuiin Jesús nuu Ianyuux xaxeʼe‑ro.
Daʼya Yɨɨ Ianyuux kuu‑ia,
te dutu taxnuni ka kuu‑ia.
Ia kunxaʼnu ka kuu‑ia.
Xá n‑ndɨu‑ia andɨu.
Xá n‑jaʼan‑ro xa jandixa‑ro‑ia.
Na kundee ini‑ro xa jandixa naʼi ka‑ro mee‑ia.
15 Dutu taxnuni ka kuu‑ia.
Kutnuni ini‑ia xa ña ndaku‑ro.
Ná kidajuexa ñaʼa kuiʼna mee‑ro xa kada‑ro kuechi,
da n‑kidajuexa‑i mee‑ia xa kada‑ia kuechi.
Ko nuncas ña n‑kida‑ia ni ɨɨn kuechi.
16 Xijan kuu xa,
na koo‑ro confianza nuu‑ia.
Xiʼin xamani‑ia,
taxnuni‑ia nuu ntdaa xa io.
Na kuyatni‑ro nuu tuu‑ia,
chi kundau ini ñaʼa‑ia mee‑ro,
te taxi‑ia xamani‑ia,
xa chindee ñaʼa‑ia xa kundee ini naʼi ka‑ro.