Maxku kaxí niʼna tnaʼa‑n
2
Ñani‑da kuʼa‑da,
xá ka jandixa‑n Xtoʼo‑ro Jesucristu.
Ia taxnuni nuu ntdaa xa io kuu‑ia.
Xijan kuu xa maxku kaxí niʼna koio mee‑n ñayiu.
2 Na kani ini‑ro xa n‑ka nataka‑n.
Te xee ɨɨn se kuika ñuʼu deʼe oro ndaʼa‑s te niʼna‑s daʼma yo vaʼa.
Dɨuni xee ɨɨn se kundaʼu niʼna daʼma ndaʼu.
3 Te kueka vaʼa‑n se niʼna daʼma yo vaʼa,
te jaʼan‑n:
“Nkoo‑n yaʼa silla vaʼa ka”,
ko jaʼan‑n nuu se kundaʼu:
“Kunujuiin ijan o nkoo yaʼa nuu ñuʼu.”
4 Nux duʼa kada tnaʼa‑n,
duʼa ka kaxí niʼna tnaʼa‑n.
Kuiʼa ka xani ini‑n,
xaxeʼe xa xani ini‑n xa kunuu ka se kuika dada se kundaʼu.
5 Ñani mani‑da,
kuʼa mani‑da,
kunini koio‑n.
N‑kaxí Ianyuux ñayiu kundaʼu xa kunduu‑i xiʼin‑ia.
Kuu ná kuu xa n‑ka nduu‑i ñayiu kuika,
xaxeʼe xa ka jandixa‑i Jesucristu.
Ñuñayiu yaʼa ka kundaʼu‑i,
ko andɨu ku kuu‑i daʼya Ianyuux taxnuni,
te taxnuni koio mee‑i xiʼin‑ia.
Xá n‑xiaʼan Ianyuux tnuʼu‑ia nuu ñayiu ka xemani‑ia xa duʼa koo.
6 Ko mee‑n,
n‑ka kida xa kujanuu ñayiu kundaʼu.
¿Ña ndaa xa ka kida uʼu ñaʼa se kuika u?
¿Ña ndaa xa xkandeka ñaʼa‑s xeʼen nuu juxtixia u?
7 Ka kunduu‑n xiʼin Cristu.
¿Ñadu se kuika kuiʼa ka jan tnuʼu Xtoʼo‑ro Jesucristu a?
8 Taxnuni Ianyuux nuu ntdaa xa io.
Tnuʼu taʼu tniu‑ia jaʼan:
“Io xa juemani‑n ɨnka ñayiu ná xemani‑n mee‑n.”
Nux duʼa ka kida‑n,
vaʼa ka kida‑n.
9 Ko nux ka kaxí niʼna tnaʼa‑n,
duʼa ka kida‑n kuechi.
Te tekuechi ñaʼa tnuʼu taʼu tniu Ianyuux.
10 Ɨɨn seyɨɨ,
nux xani ini‑s xa kida‑s ná io ná juaʼan tnuʼu taʼu tniu Ianyuux,
ko io ɨɨn xa ñatu kida‑s,
kuu ná kuu xa ña n‑kida‑s ni ɨɨn.
11 N‑jaʼan Ianyuux:
“Maxku dandoo‑n ñadɨʼɨ‑n,
yɨɨ‑n,
xa kidi‑n xiʼin ɨnka seyɨɨ,
ɨnka ñadɨʼɨ.”
Dɨuni n‑jaʼan‑ia:
“Maxku kaʼni‑n ndɨyɨ.”
Xijan kuu xa juini ñatu kidi‑n xiʼin ñayiu ñatu n‑tnundaʼa xiʼin‑n,
ko xaʼni‑n ndɨyɨ,
duʼa kuu xa ñatu jandixa‑n tnuʼu taʼu tniu Ianyuux.
12 Ñayiu ka kida ná jaʼan tnuʼu taʼu tniu Ianyuux,
xandaa kuu xa ñayiu libre ka kuu‑i.
Xijan kuu xa io xa vaʼa jaʼan koio‑n te vaʼa kada koio‑n.
Chi xini‑n xa ndadandaa ñaʼa Ianyuux,
nux n‑ka xemani tnaʼa‑n,
a ñaʼa.
13 Vaxi kɨu xa ndadandaa Ianyuux ntdaa ñayiu.
Kɨu ijan ma kundau ini‑ia ñayiu ña n‑kundau ini ɨnka ñayiu.
Ko nux n‑kundau ini ɨɨn ñayiu ɨnka ñayiu,
ma yuʼu‑i kɨu ijan,
chi kundau ini Ianyuux mee‑i ná n‑kundau ini mee‑i ɨnka ñayiu.
Nux jandixa‑n Ianyuux, io xa kada‑n xa juini‑ia
14 Ñani‑da kuʼa‑da,
¿nax xiniñuʼu nux jaʼan ɨɨn ñayiu xa jandixa‑i Xtoʼo‑ro Jesucristu,
ko ñatu kida‑i xavaʼa?
¿Ña ndaa xa kada uʼu Ianyuux ñayiu jan,
hora ndadandaa‑ia ntdaa xa io?
15 Kani ini koio‑n:
Kixi ɨɨn ñani‑ro kuʼa‑ro kundaʼu,
ña tuu na daʼma‑i io,
ña tuu na xa kaxi‑i io.
16 Te jaʼan mee‑n:
“Juaʼan xavii xavaʼa,
juaʼan,
tnɨɨ‑n daʼma‑n te tnɨɨ‑n xa kaxi‑n”,
ko nux mee‑n ñatu xiaʼan xa ndoñuʼu‑i,
ñatu xiniñuʼu xa kida‑n.
17 Nux jaʼan‑ro xa jandixa‑ro Xtoʼo‑ro Jesucristu,
ko ñatu kida‑ro xavaʼa,
kuu ná kuu xa ñatu jandixa‑ro.
18 Kudana jaʼan ɨɨn ñayiu:
“Ndoʼo,
jandixa‑n Xtoʼo‑ro Jesucristu,
te mee‑r,
kida‑r xavaʼa.”
¿Janda dandeʼa ñaʼa‑n xa jandixa‑n,
nux ma kada‑n ni ɨɨn?
Ko mee‑da,
kada‑da xavaʼa te duʼa dandeʼa ñaʼa‑da xa jandixa‑da.
19 Jandixa‑n xa idini Ianyuux io.
Vatuka.
Ko duʼa ka jandixa kuiʼna tuku,
te ka nɨʼɨ‑i xa yuʼu‑i.
20 Ñatu ka xani ini vaʼa‑n.
Ña juini‑n xa kutnuni ini‑n.
Nux jandixa ɨɨn ñayiu Ianyuux,
te io xa kada‑i xavaʼa.
Nux ñaʼa,
te xini‑ro xa ñatu jandixa‑i.
21 Na kani ini‑ro xa n‑kida taxaʼnu tnetnu‑ro Abraham.
N‑xiaʼan‑s daʼya‑s nani Isaac nuu Ianyuux.
N‑xio tuʼa‑s xa kaʼni‑s daʼya‑s nuu altar,
te n‑jaʼan Ianyuux xa n‑kida‑s xavaʼa.
22 Kuaʼa‑n xa jini‑n xa n‑dandeʼa Abraham Ianyuux xa jandixa‑s‑ia,
hora n‑kida‑s xa n‑taʼu tniu‑ia.
Xaxeʼe xa duʼa n‑kida‑s,
te n‑xini Ianyuux xa jandixa‑s‑ia xiʼin ntdaa anu‑s.
23 Te duʼa n‑xetnaʼa ná yodotnuni tnuʼu Ianyuux.
Xaxeʼe xa n‑jandixa Abraham Ianyuux,
te n‑jaʼan Ianyuux xa kuu ná kuu xa ña tuu na kuechi‑s.
Te n‑ka danani ñayiu Abraham:
“Se kumani xiʼin Ianyuux.”
24 Xijan kuu xa ka xini‑n xa ɨɨn seyɨɨ,
nux jandixa‑s Ianyuux te kida‑s xavaʼa,
te jaʼan Ianyuux xa ña tuu na kuechi‑s.
25 Dɨuni Rahab.
Ñadɨʼɨ n‑xo kidi xiʼin kueʼe seyɨɨ n‑xo kuu‑ña.
N‑xian nuu‑ña nuu n‑ka ndoo se n‑tundaʼa Josué,
te dada n‑chindee‑ña‑s xa kee koio‑s ñuu jan jɨʼɨn‑s ɨnka ichi.
Xaxeʼe xa duʼa n‑kida‑ña ɨɨn xavaʼa,
te n‑jaʼan Ianyuux xa kuu ná kuu xa ña tuu na kuechi‑ña.
26 Xijan kuu xa,
nani ñatu xiniñuʼu yɨkɨ kuñu ɨɨn ñayiu,
nux n‑kane anu‑i,
dani ñatu xiniñuʼu xa jandixa ɨɨn ñayiu Ianyuux,
nux ñatu kida‑i xavaʼa.