Yaa‑ro
3
Ñani‑da,
vaʼa ka xa maxku yo kueʼe‑n ku kuu se ka dakuaʼa tnuʼu Ianyuux nuu ñayiu.
Chi naʼa‑n xa ndichi ka ndadandaa ñaʼa Ianyuux mee‑ro dada ɨnka ñayiu.
2 Chi ntdaa‑ro kida kueʼe kuechi.
Xa jaʼan‑ro,
kida‑ro kuechi.
Ɨɨn seyɨɨ,
nuxa dajɨn tnɨɨ‑s tnuʼu jaʼan‑s,
se kida xavaʼa kuu‑s.
Te kuaʼa‑s xa taxnuni‑s nuu ntdaa xa kida‑s.
3 Kani ini koio‑n:
nux na chiʼi‑ro yoʼo yuʼu caballu,
xa na jandixa ñaʼa‑tɨ,
te duʼa kada‑tɨ xa juini‑ro.
4 Barcu du.
Yo naʼnu barcu,
te tundaʼa ñaʼa tachi ndeʼe.
Ko se dakaka barcu,
xetniu‑s timu luchi xa dakuiko‑s barcu,
xa jɨʼɨn ni‑s davaʼa nga nuu juini‑s.
5 Dani kuu yaa‑ro.
Luchi ni‑i nuu yɨkɨ kuñu‑ro,
ko,
¡naka kueʼe xa dajuen tnuʼu‑i!
Idini yañuʼu luchi kada xa teñuʼu‑i ɨɨn yuku kaʼnu.
6 Te ná kuu yañuʼu kuu yaa‑ro.
Ná kuu ɨɨn ñuu n‑chitu xa uʼu kuu.
Luchi ni yaa‑ro nuu yɨkɨ kuñu‑ro,
ko ná kida mee‑i,
da kida ntdaa yɨkɨ kuñu‑ro.
Ntdaa tnuʼu kuiʼa kaa jaʼan‑ro vaxi nde andea.
7 Kuaʼa ñayiu xa kada maxu‑i ntdaa nuu kɨtɨ io.
Ntdaa chilidaa xiʼin ntdaa kɨtlavichi xiʼin ntdaa kɨtɨ io nuu ndute mar.
8 Ko ni ɨɨn ñayiu,
ma kuaʼa xa kada maxu‑i yaa‑i.
Nuncas ña iin naʼi yaa‑ro,
ɨɨn xa io kuu.
Ná kuu venenu koo da kuu tnuʼu yaa‑ro.
9 Xiʼin yaa‑ro ndadakaʼnu‑ro Ianyuux.
Taa‑ro kuu‑ia.
Te xiʼin yaa‑ro kuiʼa jaʼan‑ro ñayiu n‑kidavaʼa‑ia.
Te n‑kidavaʼa Ianyuux ñayiu xa ku kuu mee‑i ná kuu mee‑ia.
10 Idini yuʼu‑ro,
jaʼan‑ro xavaʼa te jaʼa‑ro xa uʼu.
Ñani‑da kuʼa‑da,
maxku duʼa koo.
11 Ɨɨn nuu kane ndute,
ma kuaʼa xa kane ndute vidi xiʼin ndute ua idini vuelta.
12 Ñani‑da kuʼa‑da,
nani ña kuaʼa xa juun mangorki nuu tnutɨchɨ,
te ña kuaʼa xa juun tɨchɨ nuu tnundeʼa,
dani ña kuaʼa xa kane ndute vidi nuu kane ndute ede.
Xa taxi Ianyuux
13 ¿Nuu tnaʼa mee‑n io ɨɨn se tuʼa vaʼa,
se kutnuni ini a?
Maxku najuen tnuʼu‑s mee‑s.
Na ku kuu‑sɨ se vii se vaʼa kida xavaʼa,
te duʼa dandeʼa‑s ñayiu xa ndaa xa se kutnuni ini kuu‑s.
14 Nux ka kukuedi ini‑n,
te ka kuu ua anu‑n,
te ka kida‑n xavaʼa mee‑n,
maxku jaʼan koio‑n xa vaʼa kutnuni ini‑n,
chi ña ndaa.
Tnuʼu vete ka jaʼan‑n.
15 Nux duʼa ka xani ini‑n,
ta kueka ka‑n xa taxi Ianyuux.
Meni xa dakuaʼa ñaʼa ñayiu ñuñayiu n‑ka xeka‑n,
meni xa taxi kuiʼna.
16 Chi nux ka kukuedi ini nuu tnaʼa‑n,
te ka kida‑n xavaʼa mee‑n,
xijan kida xa ka jantnaʼa‑n te ka kida‑n xa uʼu.
17 Ko xa taxi Ianyuux kada xa kiʼna ka dandoo‑ro xa ña kuu xavaʼa.
Kada xa kutuu mani‑ro xiʼin ntdaa ñayiu,
kada xa ku kuu‑ro ñayiu vaʼa te maxku kuxee ini‑ro.
Kada xa kundau ini‑ro ñayiu te ma kani ini‑ro xa vaʼa ka ɨɨn ñayiu dada ɨnka‑i.
Kada xa ndaa anu‑ro te kada‑ro xavaʼa.
18 Nux nduku ini‑ro xa kutuu mani‑ro xiʼin ñayiu,
te duʼa kuaʼa‑ro xa kada‑ro ntdaa ɨnka xavaʼa tuku.
Kuu ná kuu xa dakeé‑ro tata vaʼa te nakueka‑ro cosecha vaʼa.