Ñayiu xemani xa io ñuñayiu
4
¿Nakuenda ka jantnaʼa mee‑n,
ɨɨn‑n xiʼin ɨnka‑n?
¿Nakuenda ka jantnatnuʼu‑n?
¿Ña ndaa xa kuu xaxeʼe xa kukajan ini‑n xa uʼu a?
Te duʼa jantnaʼa mee‑n xiʼin xa kukajan ini‑n.
2 Ka kukajan ini‑n xaxii ɨnka ñayiu,
ko ñatu niʼi‑n xa ka juini‑n,
te ka xaʼni‑n ndɨyɨ.
Ka kukuedi ini‑n xaxii ɨnka ñayiu,
te xaxeʼe xa ñatu ka niʼi‑n xa ka juini‑n,
te ka jantnaʼa‑n xa ka jantnaʼa‑n.
Ñatu niʼi‑n xa juini‑n,
xaxeʼe xa ñatu xijan‑n nuu Ianyuux.
3 Te juini xijan‑n,
ko ña tnɨɨ‑n,
chi ña xijan‑n ɨɨn xavaʼa.
Diko ni xijan‑n xa juetniu‑n nuu xa uʼu kukajan ini‑n.
4 Xá n‑ka dandoo‑n Ianyuux.
Ná kida ñadɨʼɨ dandoo yɨɨ‑ña,
da ka kida mee‑n.
¿Ñatu ka xini‑n xa ka kuu‑n ñayiu xemani xa io ñuñayiu,
te duʼa ka kuu‑n ñayiu xini uʼu tnaʼa‑i xiʼin Ianyuux a?
Davaʼa nga ñayiu juini‑i xa tnɨɨ‑i xa io ñuñayiu,
kida‑i xa xini uʼu tnaʼa‑i xiʼin Ianyuux.
5 ¿Ka xani ini‑n xa ña ndaa jaʼan tnuʼu Ianyuux a?
Jaʼan tnuʼu Ianyuux xa n‑kida‑ia xa tuu Espíritu Ii anu‑ro,
te juini‑ia xa juemani‑ro meni mee‑ia,
ná xemani ñaʼa mee‑ia mee‑ro.
6 Ko Ianyuux,
chindee ñaʼa‑ia xiʼin xamani‑ia.
Jaʼan tnuʼu Ianyuux:
“Ma chindee‑r ñayiu kuxee ini,
ko chindee‑r xiʼin xamani‑r ñayiu ka xijan xa chindee‑r‑yɨ.”
7 Xijan kuu xa jandixa koio‑n Ianyuux.
Io xa kada koio‑n ntdaa xa juini mee‑ia.
Te maxku juejoon‑n nuu kuiʼna xa kadatniu‑i anu‑n.
Io xa jantnaʼa‑n xiʼin‑i,
te kunu‑i jɨʼɨn‑i.
8 Kuyatni koio‑n nuu Ianyuux,
te kuyatni mee‑ia nuu mee‑n.
¡Ñayiu ka kida kuechi ka kuu‑n!
¡Nandaʼa koio‑n!
¡Maxku kada koio ka‑n kuechi!
Nux ka juini‑n xa juemani‑n Ianyuux xiʼin ntdaa anu‑n,
ña kuaʼa‑n xa juemani‑n xa io ñuñayiu.
Io xa ndada ndoo‑n anu‑n.
9 Io xa kukoʼyo ini koio‑n,
io xa ndaʼi koio‑n,
io xa kutnau ini koio‑n,
xaxeʼe xa ñayiu ka kida kuechi ka kuu‑n.
Maxku kueku ka‑n,
io xa ndaʼi‑n.
Maxku kudɨ ini ka‑n,
io xa kutnau ini‑n.
10 Maxku kuxee ini ka‑n.
Kajan koio‑n nuu Ianyuux,
xa na chindee ñaʼa‑ia,
te kada‑ia xa kutuu vaʼa koio‑n xiʼin‑ia,
vitna xiʼin nde kuia ma jɨn ndɨʼɨ.
Maxku jan tnuʼu tnaʼa‑n
11 Ñani‑da kuʼa‑da,
maxku kuiʼa jaʼan‑n,
ɨɨn‑n nuu ɨnka‑n.
Nux kuiʼa jaʼan‑n nuu ñani‑n nuu kuʼa‑n,
te jan tnuʼu tnaʼa‑n,
dani kuu xa kuiʼa jaʼan te jan tnuʼu‑n tnuʼu taʼu tniu Ianyuux.
¿Jundu kuu‑n xa jan tnuʼu‑n tnuʼu taʼu tniu Ianyuux?
Io xa jandixa‑n tnuʼu taʼu tniu‑ia.
12 Idini Ianyuux io xa taxi‑ia tnuʼu taʼu tniu,
te idini Ianyuux io xa ndadandaa‑ia ñayiu.
Meni mee‑ia kuaʼa xa dakaku‑ia ñayiu,
te meni mee‑ia kuaʼa xa danaa‑ia ñayiu.
¿Te jundu kuu mee‑n xa xani ini‑n xa kuaʼa‑n xa ndadandaa‑n ɨnka ñayiu?
Ña ka xini‑n nax koo tnee
13 Vitna kunini koio‑n xaʼa.
Mee‑n ka jaʼan‑n:
“Vitna,
tnee jɨʼɨn‑ro ñuu ijan,
te ijan kutuu‑ro ɨɨn kuia.
Na diko‑ro,
jueen‑ro,
te niʼi‑ro tvini.”
14 Te mee‑n,
ni ña ka xini‑n nax koo tnee.
Xaku ni kutuu‑ro.
Ná kuu vikó nuʼu kuu‑ro,
iin vikó te nanaʼa ni te n‑tɨʼu.
Te duʼa kuu mee‑ro tuku.
15 Io xa jaʼan koio‑n:
“Na kachi mee Ianyuux nux kutuu‑ro te kada‑ro xaʼa,
xijan.”
16 Ko duʼa ñatu jaʼan mee‑n,
chi jaʼan‑n:
“Kuaʼa‑r xa kada‑r xa juini‑r,
ñatu ndoñuʼu‑r xa chindee ñaʼa Ianyuux.”
Te duʼa ka kida‑n xa uʼu.
17 Xijan kuu xa ñayiu xini xa kada‑i xavaʼa,
ko ñatu kida‑i,
te duʼa kida‑i xa uʼu.