Na kunini koio ñayiu kuika xaʼa
5
Kunini koio‑n,
ñayiu kuika.
Io xa ndaʼi koio‑n,
io xa kana koio‑n,
chi vaxi hora xa kueʼe xa kueʼe vida yaʼa koio‑n.
2 Vax teʼyu xaxii‑n,
te juan kɨu tkidi daʼma vaʼa‑n.
3 Vax nane dɨʼu tvini‑n.
Ná kuu se tekuechi ñaʼa nuu se ndadandaa ñaʼa,
da kuu tvini‑n,
te kada xa kayu‑n nuu yañuʼu ma ndaʼva.
Ka niʼi‑n xa ka niʼi‑n xa xnevaʼa‑n,
te xá n‑xee kɨu xa xinokava ntdaa.
4 Dɨuni ñayiu n‑ka kidatniu nuu xaxii‑n.
N‑ka dakee‑i nɨñɨ‑n,
ko ña n‑chiyaʼu‑n‑yɨ.
Ka najan kuechi‑i xa n‑dandaʼu‑n‑yɨ,
te teku Ianyuux ntdaa xa jan kuechi‑i.
Te mee‑ia kuu Xtoʼo ntdaa ángel andɨu.
5 Ñuñayiu yaʼa yo vaʼa n‑ka xo tuu‑n,
te n‑ka niʼi‑n ntdaa xa ka kukajan ini‑n.
Ná ka ndada ndee ñayiu kuchi,
da n‑ka ndada ndee‑n mee‑n,
te vitna xa vax kuyatni xa kuú‑n.
6 N‑ka xini uʼu‑n te n‑ka xaʼni‑n ñayiu ña tuu na kuechi ña tuu nax tau,
te ña n‑ka jaʼan‑i ni ɨɨn.
Kundetu kuee koio‑n, te kajan taʼu koio‑n
7 Ñani‑da kuʼa‑da,
xijan kuu xa io xa kundetu kuee koio‑n,
nde na ndixi Xtoʼo‑ro Jesucristu.
Ka xini‑n xa hora kidatniu ɨɨn seyɨɨ nuu ñuʼu,
te io xa kundetu‑s nde na kee xa kaxi xa koʼo‑s.
Kundetu‑s,
nde na kixi dau kiʼna nuu,
te dada xee vikó dau.
8 Mee‑n tuku,
kuee kuee kundetu koio‑n.
Kundee ini koio‑n,
chi vax kuyatni xa ndixi Xtoʼo‑ro.
9 Ñani‑da kuʼa‑da,
maxku kuyɨka koio‑n,
ɨɨn‑n nuu ɨnka‑n,
xa maxku ndadandaa ñaʼa Ianyuux.
Chi Ia ndadandaa ntdaa xa io,
xá vax kuyatni xa ndixi‑ia.
10 Ñani‑da kuʼa‑da,
najaʼan koio‑n se n‑ka xian tnuʼu tnuʼu Ianyuux nuu ñayiu.
N‑ka kuu‑s ɨɨn ichi kaneʼe katnɨɨ mee‑n jɨʼɨn.
Najaʼan koio‑n xa ndaʼu n‑ka yaʼa‑s te n‑ka kundee ini‑s.
11 Xijan kuu xa jaʼan‑ro xa kuvete ñayiu kundee ini hora kueʼe vida yaʼa‑i.
Xá n‑ka teku‑n nanda n‑kundee ini taxaʼnu tnetnu‑ro n‑xo nani Job ntdaa vida n‑yaʼa‑s.
Te xá n‑ka xini‑n nax n‑kida Ianyuux xaxeʼe‑s.
Yo n‑kundau ini Ianyuux Job,
te duʼa kundau ini ñaʼa‑ia mee‑ro.
12 Ñani‑da kuʼa‑da,
maxku chinaa koio‑n,
ni xaxeʼe andɨu,
ni xaxeʼe nuu ñuʼu.
Maxku chinaa‑n ni ɨɨn.
Hora na jaʼan‑n “Joon”,
te joon kuu.
Te hora na jaʼan‑n “Ñaʼa”,
te ñaʼa kuu.
Nux duʼa kada‑n,
te ña tuu na xa tekuechi ñaʼa Ianyuux.
13 Nux ɨɨn ñayiu kueʼe vida yaʼa,
na kajan taʼu‑i Ianyuux.
14 Te ɨɨn ñayiu kuʼu,
na kana‑i sexaʼnu veñuʼu,
te na kajan taʼu koio‑s xaxeʼe‑i,
te xiʼin xa taxnuni Xtoʼo‑ro Jesucristu na kajan‑s‑yɨ itaʼu aciti.
15 Te hora ka xijan taʼu‑n nuu Ianyuux xaxeʼe ñayiu kuʼu,
te koo koio‑n confianza nuu Ianyuux xa na ndvaʼa‑i,
te kada‑ia xa ndokoo‑i.
Te nux n‑kida‑i kuechi,
te taxkanu ini‑ia kuechi‑i tuku.
16 Xijan kuu xa juña tnuʼu tnaʼa‑n,
ɨɨn‑n nuu ɨnka‑n,
xa io kuechi‑n,
te kajan taʼu koio‑n,
ɨɨn‑n xaxeʼe ɨnka‑n,
xa chindee tnaʼa‑n xa kada koio‑n xavaʼa.
Chi ɨɨn ñayiu vaʼa xijan taʼu nuu Ianyuux xiʼin ntdaa anu‑i,
kueʼe xa kueʼe xa kuaʼa‑i xa kada‑i.
17 Najaʼan koio‑n taxaʼnu tnetnu‑ro n‑xo nani Elías.
Nani kuu mee‑ro,
dani n‑kuu mee‑s,
ko n‑jandixa‑s Ianyuux.
Xiʼin ntdaa anu‑s n‑xijan taʼu‑s nuu Ianyuux xa maxku juun dau,
te duʼa n‑kuu.
Uni yodo kuia ñatu n‑juun dau nuu ñuʼu ijan.
18 Te dada n‑ndajan taʼu‑s nuu Ianyuux ɨnka vuelta xa na juun dau,
te n‑xio kueʼe xa kaxi xa koʼo ñayiu ijan.