Carta kiʼna nuu n‑kidavaʼa Spedru
Kidavaʼa Spedru nuu mee‑n ka kuu ñayiu toʼo ñuñayiu yaʼa
1
Mee‑da kuu Spedru,
ɨɨn se n‑tundaʼa Jesucristu kuu‑da.
Kidavaʼa‑da carta yaʼa nuu mee‑n ka kuu ñayiu n‑kaxí ñaʼa Ianyuux.
Ná kuu setoʼo,
ñátoʼo ka kuu‑n,
xtuu dɨɨ‑n distrito Ponto,
distrito Galacia,
distrito Capadocia,
distrito Asia,
distrito Bitinia.
2 Nde kiʼna nuu xá n‑xo naʼa Taa‑ro Ianyuux xa jandixa koio‑n Jesucristu.
N‑kaxí ñaʼa‑ia xa kunduu koio‑n xiʼin‑ia.
N‑kidatniu Espíritu Ianyuux anu‑n,
te vitna kida Espíritu Ianyuux xa ka kuu‑n ñayiu kida xa juini Ianyuux.
N‑xiʼí Jesucristu xaxeʼe‑n,
te xiʼin nɨñɨ‑ia n‑ka ndundoo‑n.
Na taxi ka Ianyuux xamani‑ia nuu‑n,
na kada‑ia xa yo vaʼa kutuu koio mee‑n xiʼin mee‑ia.
Xndetu‑ro vitna, xa kutuu vaʼa‑ro xiʼin Ianyuux kuia ma jɨn ndɨʼɨ
3 Na kutaʼu‑ro Ianyuux.
Xaxeʼe ntdaa xa n‑kida‑ia xaxeʼe‑ro,
na juñaʼa‑ro xa n‑kutaʼu‑ro nuu‑ia.
Taa Xtoʼo‑ro Jesucristu kuu‑ia.
Yo kueʼe n‑kundau ini ñaʼa‑ia mee‑ro.
N‑kida‑ia xa n‑nduu‑ro daʼya‑ia.
Kuu ná kuu xa n‑nakaku‑ro vuelta kuu uu.
Kada‑ia xa kutuu vaʼa‑ro xiʼin‑ia kuia ma jɨn ndɨʼɨ.
Nani n‑nandoto Jesucristu nuu n‑kuu‑ia ndɨyɨ,
dani kuu xa nandoto mee‑ro tuku.
Vitna xndetu‑ro kɨu ijan.
4 Ná kuu ɨɨn xaxii xiaʼan seyɨɨ daʼya‑s,
da kuu xa kutuu vaʼa‑ro xiʼin Ianyuux andɨu.
Nuncas ma jɨn ndɨʼɨ xaxii‑ro,
nuncas ma nadama,
meni xavaʼa kuu.
Andɨu nevaʼa Ianyuux xaxii‑n,
te taxi‑ia,
hora na xee‑n nde ijan.
5 Jandixa naʼi koio ka‑n Ianyuux.
Taxnuni‑ia nuu ntdaa xa io,
te vaʼa nevaʼa ñaʼa‑ia mee‑n.
Na ndixi Jesucristu,
dandeʼa ñaʼa‑ia ntdaa xa n‑kida tuʼa‑ia xaxeʼe‑ro,
te kutuu vaʼa‑ro xiʼin‑ia kuia ma jɨn ndɨʼɨ.
6 Xijan kuu xa kueʼe xa kueʼe kuvete koio‑n.
Vitna,
nux ndoñuʼu xa kueʼe vida yaʼa koio‑n,
te duʼa tnau ini koio‑n.
Ko xaku nga kuia,
te kɨu ijan ma tnau ini ka‑n.
7 Ndoñuʼu xa kototnuni ñaʼa Ianyuux mee‑n.
Io xa jini‑ia nuxa ndaa xa jandixa‑n‑ia,
a ñaʼa.
Kuu ná kuu xa xitotnuni ñayiu oro nuu ñuʼu koko.
Ko vax ndɨʼɨ oro.
Yo yaʼu ka xa jandixa ɨɨn ñayiu Ianyuux,
dada xa yaʼu oro.
Nux jandixa naʼi ka‑n Ianyuux,
te jaʼan‑ia:
“¡Vaʼa n‑ka kida‑n!”
Na ndixi Jesucristu,
vaʼa jaʼan‑ia xaxeʼe‑n,
te taxi‑ia ntdaa xa nevaʼa‑ia xaxeʼe‑n,
te kada‑ia xa taxnuni koio‑n xiʼin‑ia.
8 Juini nuncas ña n‑ka xini‑n Jesucristu,
ko ka xemani‑n‑ia.
Juini nde vitna ñatu xndeʼa‑n‑ia,
ko ka jandixa‑n‑ia.
Te kueʼe xa kueʼe ka kuvete‑n xaxeʼe‑ia.
Diko ni xiaʼan‑ro xa xiaʼan‑ro xa n‑kutaʼu‑ro nuu‑ia.
9 Xaxeʼe xa jandixa‑ro Jesucristu,
naʼa‑ro xa kutuu vaʼa‑ro xiʼin‑ia kuia ma jɨn ndɨʼɨ.
10 Xá n‑kuu kueʼe kuia,
n‑kida Ianyuux xa se xian tnuʼu tnuʼu Ianyuux nuu ñayiu n‑ka jaʼan‑s xa tnɨɨ koio mee‑n xamani Ianyuux.
N‑ka jaʼan‑sɨ xa kutuu vaʼa koio mee‑n xiʼin Ianyuux kuia ma jɨn ndɨʼɨ.
Te se ijan,
n‑ka juini‑s xa kutnuni ini‑s nax n‑jaʼan‑ia.
Kueʼe xa kueʼe n‑ka kaʼu‑s tnuʼu Ianyuux,
te kueʼe xa kueʼe n‑ka xani ini‑s xa kutnuni ini‑s.
11 N‑ka juini‑sɨ xa kutnuni ini‑s ntdaa xa n‑dandeʼa Espíritu Cristu mee‑s.
N‑ka juini‑sɨ xa kutnuni ini‑s jundu kixi te nakɨu da kuu.
Kueʼe kuia antecas xa kixee Cristu ñuñayiu,
te xá daa n‑jaʼan Espíritu Ianyuux xa kixi‑ia.
N‑jaʼan Espíritu Ianyuux xa kueʼe vida yaʼa Cristu te kuú‑ia,
te dada jini koio ñayiu xa Cristu kuu Ia kunxaʼnu ka,
Ia taxnuni nuu ntdaa xa io andɨu xiʼin ñuñayiu.
12 N‑dandeʼa Espíritu Ianyuux se ijan xa ña n‑ka tnɨɨ‑s tnuʼu Ianyuux xaxeʼe mee‑s,
n‑dandeʼa‑ia‑s xa n‑ka tnɨɨ‑s tnuʼu‑ia xaxeʼe mee‑n.
Xaxeʼe mee‑ro,
n‑ka jaʼan se ijan tnuʼu yaʼa.
Te vitna,
se n‑tundaʼa Cristu,
xá n‑ka kachitnuʼu‑s tnuʼu vaʼa Cristu nuu mee‑n.
Duʼa n‑kida Espíritu Ii n‑tundaʼa Ianyuux n‑kixi nde andɨu.
Te ángel,
ia ka xinokuechi nuu Ianyuux,
nde mee‑ia ka juini xa jini koio‑ia ntdaa xa koo.
Meni xavaʼa kida Ianyuux. Juini‑ia xa kada‑ro ná kida mee‑ia
13 Xijan kuu xa vaʼa kani ini koio‑n,
te koo tuʼa koio‑n,
xa kada‑n xa juini Ianyuux.
Te kundetu koio‑n,
xa taxi Ianyuux xamani‑ia,
hora na ndixi Jesucristu.
Koo koio‑n confianza nuu‑ia xa duʼa koo.
14 Daʼya Ianyuux ka kuu‑n.
Jandixa‑n‑ia,
maxku kuxee ini koio‑n.
Antecas xa jini koio‑n Ianyuux,
n‑ka xo kida‑n davaʼa nga xa n‑ka kukajan ini‑n.
15 Ko vitna,
xa n‑jaʼan ñaʼa Ianyuux,
xa kunduu koio‑n xiʼin mee‑ia.
Meni xavaʼa kida Ianyuux.
Io xa kada koio mee‑n ná kida mee‑ia.
Ntdaa xa kada koio‑n,
io xa kada‑n xa juini Ianyuux.
16 Chi jaʼan tnuʼu Ianyuux:
“Kada koio mee‑n xavaʼa,
chi kida mee‑r xavaʼa.”
17 Ka jaʼan‑n xa Ianyuux kuu Taa‑n,
te vatuka xa duʼa ka jaʼan‑n.
Ko dɨuni Juexi kuu‑ia.
Naʼa‑ia xa ɨɨn nuu ka kuu ntdaa ñayiu,
naʼa‑ia xa ñatu vaʼa ka ɨɨn ñayiu dada ɨnka ñayiu.
Ndadandaa‑ia tniu ɨɨn ɨɨn ñayiu,
ndadandaa‑ia ntdaa xa kida‑ro.
Xijan kuu xa na yuʼu‑ro‑ia,
na kada‑ro xa juini mee‑ia ntdaa kɨu kutuu ka‑ro ñuñayiu yaʼa.
18 Xnaʼa‑n xa n‑xeen ñaʼa Ianyuux mee‑n,
xa ma kada koio ka‑n ná n‑ka kida taxaʼnu tnetnu‑n.
Chi ñatu xiniñuʼu xa n‑ka kida mee‑s.
Ñatu n‑xeen ñaʼa Ianyuux xiʼin oro,
xiʼin plata,
chi vax ndɨʼɨ oro,
plata.
19 Ko n‑xeen ñaʼa‑ia xiʼin nɨñɨ Cristu.
Te yo yaʼu ka nɨñɨ Cristu dada ntdaa xa io.
Xá n‑kuu kueʼe kuia,
n‑taʼu tniu Ianyuux nuu ñayiu Israel xa juñaʼa koio‑i xa doko‑i nuu‑ia.
Xa doko‑i kuu ɨɨn tkolelu vaʼa kaa,
ɨɨn tkolelu vili kaa.
Ná kuu tkolelu jan kuu Cristu.
20 Antecas xa kadavaʼa Ianyuux ñuñayiu,
xá daa n‑xo naʼa‑ia xa tundaʼa‑ia Cristu xa kuú‑ia xaxeʼe‑ro.
Vitna,
hora vax ndɨʼɨ ntdaa xa io,
xá n‑kixi Cristu xaxeʼe‑n.
21 Xaxeʼe mee‑ia,
ka jandixa‑n Ianyuux.
N‑kida Ianyuux xa n‑nandoto Cristu nuu n‑kuu‑ia ndɨyɨ,
te n‑kida‑ia xa taxnuni Cristu nuu ntdaa xa io.
Xaxeʼe Cristu,
jandixa‑n Ianyuux,
te io‑n confianza nuu‑ia.
22 Xá n‑kida Espíritu Ii xa ka jandixa‑n xa kuu xandaa,
te duʼa n‑kida‑ia xa n‑ka ndundoo anu‑n.
Vitna kuaʼa‑n xa kutuu mani koio‑n ɨɨn‑n xiʼin ɨnka‑n.
Ntdaa ñayiu ka jandixa Cristu kuu ñani‑ro kuʼa‑ro.
Io xa juemani tnaʼa‑n xa juemani tnaʼa‑n xiʼin ntdaa anu‑n.
23 Kuu ná kuu xa n‑ka nakaku‑n ɨnka vuelta.
Vuelta kiʼna nuu,
n‑ka kaku‑n nuu tadɨʼɨ‑n,
ko vitna n‑ka nakaku‑n xaxeʼe xa ka jandixa‑n tnuʼu Ianyuux.
Ná kuu ɨɨn xa ndito kuu tnuʼu Ianyuux.
Kuú koio tadɨʼɨ‑ro,
ko nuncas ma jɨn ndɨʼɨ tnuʼu Ianyuux.
24 Chi jaʼan tnuʼu Ianyuux:
Ná kuu tnutnuʼu kuu ñayiu,
te ná kuu ita tnutnuʼu,
da kuu ntdaa xa kida‑i.
Yichi tnutnuʼu,
te jungava ita‑tnu.
25 Ko nuncas ma jɨn ndɨʼɨ tnuʼu Ianyuux.
Te tnuʼu Ianyuux kuu tnuʼu n‑ka kachitnuʼu‑s nuu‑n.