Carta kuu uu n‑kidavaʼa Spedru
Kidavaʼa Spedru nuu ñayiu ka jandixa Cristu
1
Mee‑da kuu Simón Spedru,
ɨɨn se xinokuechi nuu Jesucristu,
ɨɨn se n‑tundaʼa‑ia kuu‑da.
Kidavaʼa‑da carta yaʼa nuu mee‑n,
chi ñayiu n‑ka xee ka jandixa Jesucristu ka kuu‑n.
Ná jandixa mee‑da Jesucristu,
da ka jandixa mee‑n tuku.
¡Te naka vaʼa xa jandixa‑ro‑ia!
Meni xavaʼa kida Jesucristu.
Xijan kuu xa n‑kida‑ia xa jandixa‑ro‑ia.
Ianyuux kuu‑ia,
Ia dakaku ñaʼa mee‑ro kuu‑ia.
2 Ka xini‑n Taa‑ro Ianyuux xiʼin Xtoʼo‑ro Jesús.
Na kada‑ia xa vaʼa ka xa vaʼa ka jini koio‑n‑ia.
Na taxi‑ia ntdaa xamani‑ia.
Na kada‑ia xa vaʼa xa vaʼa kutuu koio‑n xiʼin‑ia.
Xá n‑taxi Ianyuux ntdaa xa ndoñuʼu‑ro xa kada‑ro xa juini mee‑ia
3 Xaxeʼe xa taxnuni Ianyuux nuu ntdaa xa io,
xá n‑taxi‑ia ntdaa xa ndoñuʼu‑ro xa kutuu vaʼa‑ro xiʼin mee‑ia te kada‑ro xa juini mee‑ia.
N‑kida‑ia xa jini‑ro Jesucristu.
N‑jaʼan ñaʼa Jesucristu mee‑ro,
xa kunduu‑ro xiʼin Ianyuux.
Ia kunxaʼnu ka kuu‑ia,
te kida‑ia meni xavaʼa.
4 Duʼa n‑taxi‑ia tnuʼu mee‑ia.
Vaʼa xa vaʼa tnuʼu‑ia,
te yo vaʼa xiniñuʼu tnuʼu‑ia.
Xiʼin tnuʼu mee‑ia,
kida‑ia xa kunduu koio mee‑n xiʼin mee‑ia,
xa ku kuu koio mee‑n ná kuu mee‑ia.
Xiʼin tnuʼu‑ia,
kida‑ia xa dandoo koio‑n kuechi ñuñayiu,
nuu ka kida ñayiu meni xa ka juini mee‑i xiʼin ntdaa xa kukajan ini‑i.
5 Xijan kuu xa kunduu naʼi koio ka‑n xiʼin Cristu.
Ka jandixa‑n Jesucristu.
Vitna io xa kada koio‑n xavaʼa.
Hora ka kida‑n xavaʼa,
te io xa kutnuni ini vaʼa ka‑n xa juini Ianyuux.
6 Hora kutnuni ini vaʼa‑n,
te io xa kada maxu koio‑n mee‑n,
xa maxku kada koio ka‑n ntdaa xa kukajan ini‑n.
Hora kida maxu‑n mee‑n,
te io xa kundee ini koio ka‑n.
Hora ka kundee ini‑n,
te io xa kada koio ka‑n xa juini Ianyuux.
7 Hora ka kida‑n xa juini Ianyuux,
te io xa juemani koio‑n ñani‑ro kuʼa‑ro.
Hora xemani‑n ñani‑ro kuʼa‑ro,
te io xa juemani‑n ntdaa ñayiu.
8 Nux vaʼa xa vaʼa na kada koio‑n ntdaa xaʼa,
te ndaa xa xini koio‑n Xtoʼo‑ro Jesucristu,
te vaʼa xiniñuʼu xa ka kida‑n.
9 Nux duʼa ma kada ɨɨn ñayiu,
kuu‑i ná kuu ɨɨn ñayiu kuaa,
ɨɨn ñayiu nene xa ma kundeʼa ka‑i.
Xá n‑ndunaa‑i nax n‑kida Ianyuux xaxeʼe‑i.
Xá n‑ndunaa‑i xa n‑ndada ndoo Ianyuux mee‑i,
xa maxku kada ka‑i kuechi n‑kida‑i antecas xa kunduu‑i xiʼin Cristu.
10 Ñani‑da kuʼa‑da,
xá n‑jaʼan ñaʼa Ianyuux mee‑n,
xá n‑kaxí ñaʼa‑ia,
xa kunduu koio‑n xiʼin mee‑ia.
Xijan kuu xa kunduu koio naʼi ka‑n xiʼin Ianyuux.
Kada‑n xa juini mee‑ia,
te duʼa nuncas ma kakunuu‑n nuu kuechi.
11 Te duʼa,
vaʼa xa vaʼa kueka ñaʼa Jesucristu mee‑n,
xa kɨu koio‑n nuu taxnuni mee‑ia.
Xtoʼo‑ro kuu‑ia,
te kuu‑ia Ia dakaku ñaʼa mee‑ro,
xa ma kuú‑ro xiʼin kuechi‑ro.
Taxnuni mee‑ia kuia ma jɨn ndɨʼɨ.
12 Xijan kuu xa dani ku nadajaʼan ñaʼa‑da xaʼa.
Juini ka xini‑n xa kuu xandaa,
te xá n‑ka xeka vaʼa‑n xa kuu xandaa,
ko dani nadajaʼan ñaʼa‑da.
13 Te vatuka xa duʼa kuu.
Nɨni tuu naʼi‑da,
dani nadajaʼan ñaʼa‑da,
xa koo tuʼa koio‑n.
14 Xini‑da xa yachi kuú‑da.
Ná n‑jaʼan Xtoʼo‑ro Jesucristu,
duʼa koo.
15 Kida‑da ntdaa xa kuaʼa‑da xa najaʼan koio mee‑n ntdaa xa kida Jesucristu xaxeʼe‑n.
Na yaʼa xa kuú‑da,
juini‑da xa kɨu xiʼin kɨu najaʼan naʼi koio‑n xaʼa.
Xiʼin nuu mee‑da n‑ka xini‑da xa Ia kunxaʼnu ka kuu Cristu
16 N‑ka kachitnuʼu‑da xa taxnuni Xtoʼo‑ro Jesucristu nuu ntdaa ñayiu.
N‑ka kachitnuʼu‑da xa ndixi‑ia.
Ña n‑ka najani‑da cuentu xa dandaʼu ñaʼa‑da.
N‑ka jaʼan‑da nax n‑xini mee‑da.
Xiʼin nuu mee‑da,
n‑ka xini‑da xa Ia kunxaʼnu ka kuu‑ia.
17 Taa‑ro Ianyuux,
Taa Jesucristu,
n‑xio‑ia xañuʼu nuu Jesucristu.
N‑dandeʼa ñaʼa Ianyuux mee‑da xa taxnuni Jesucristu nuu ntdaa xa io.
Nde andɨu,
nuu taxnuni Ia kunxaʼnu ka,
n‑kixi ɨɨn tnuʼu jaʼan:
“Se yaʼa kuu Daʼya mee‑r.
Daʼya Yɨɨ‑r kuu‑s.
Yo kuvete‑r xaxeʼe‑s.”
18 Te mee‑da,
n‑ka teku‑da tnuʼu yaʼa vax juun nde andɨu,
na xnii‑da xiʼin Xtoʼo‑ro Jesucristu dɨkɨ yuku ii.
19 Xá n‑kuu kueʼe kuia,
se xian tnuʼu tnuʼu Ianyuux nuu ñayiu,
n‑ka jaʼan‑s xa duʼa koo.
Te vitna xá n‑kuu.
Vaʼa xa chinuu koio mee‑n tnuʼu n‑ka jaʼan‑s.
Ná kuu ɨɨn luz vaʼa koko nuu ña kuaʼa xa jini vaʼa‑ro,
da kuu tnuʼu n‑ka jaʼan se ijan.
Kuu ná kuu xa ku koko luz jan,
nde na tuu te kane chudini kaʼnu dakutnuni anu‑n.
20 Ditna ka io xa kutnuni ini koio‑n nax n‑kuu,
hora n‑ka jaʼan se xian tnuʼu tnuʼu Ianyuux nuu ñayiu.
Ña n‑ka jaʼan‑s meni xa ka xani ini mee‑s.
21 Nuncas ña n‑ka jaʼan se ijan xa ka juini mee‑s.
Chi n‑kida dɨɨn Ianyuux se ijan,
xa kada koio‑s xa juini mee‑ia.
N‑kidatniu Espíritu Ii anu‑s,
te n‑kida mee‑ia xa jaʼan koio‑s tnuʼu Ianyuux.