Carta kiʼna nuu n‑kidavaʼa Sua
Ia nani Tnuʼu Ianyuux
1
Ka kakuneʼe‑da Ia xá daa tuu nde kiʼna nuu.
N‑ka teku‑da tnuʼu n‑jaʼan‑ia.
Xiʼin nuu‑da n‑ka xini‑da‑ia.
N‑ka xo ndeʼa‑da‑ia,
te xiʼin ndaʼa‑da n‑ka tnɨɨ‑da‑ia.
Ia nani Tnuʼu Ianyuux kuu‑ia.
Kida‑ia xa xtuu vaʼa ñayiu xiʼin Ianyuux.
2 N‑kixi‑ia nde ñuñayiu yaʼa.
N‑ka xini‑da‑ia,
te ka jaʼan ndaa‑da xaxeʼe‑ia.
Ka jaʼan‑da nuu mee‑n,
xa antecas xa kuaʼa ntdaa xa io te xá daa tuu mee‑ia,
te ka jaʼan‑da nuu‑n xa dani kutuu‑ia kuia ma jɨn ndɨʼɨ.
N‑xo tuu‑ia xiʼin Taa‑ia Ianyuux,
te n‑kixi‑ia nuu xtuu mee‑ro.
3 Xa n‑ka xini‑da,
ka jaʼan‑da nuu mee‑n.
Xa n‑ka teku‑da,
ka jaʼan‑da nuu mee‑n.
Ka jaʼan ñaʼa‑da xa kunduu koio mee‑n xiʼin mee‑da.
Chi kunduu koio mee‑da xiʼin Ianyuux te xiʼin Daʼya Yɨɨ‑ia,
Jesucristu.
4 Ka kidavaʼa‑da carta yaʼa nuu mee‑n,
xa kuvete‑ro xa kuvete ka‑ro ntdaa‑ro.
Luz vaʼa ka koko kuu Ianyuux
5 N‑ka teku‑da tnuʼu n‑jaʼan Jesucristu,
te tnuʼu ijan kachitnuʼu‑da.
N‑jaʼan‑ia xa kida Ianyuux xa jini‑ro‑ia.
N‑jaʼan‑ia xa luz vaʼa ka koko kuu Ianyuux,
te nuu tuu mee‑ia,
nuncas ñatu kuu nuu nee.
6 Nux jaʼan‑ro xa kunduu‑ro xiʼin Ianyuux,
ko dani kida‑ro kuechi,
kuu ná kuu xa xika‑ro nuu nee.
Nux duʼa kuu,
kuu xa jaʼan‑ro tnuʼu vete,
te ña kida‑ro xa kuu xandaa.
7 Nuu tuu Ianyuux,
kuu nuu kanda.
Nux kida‑ro xavaʼa,
tuu‑ro xiʼin Ianyuux,
te kunduu vaʼa‑ro,
ɨɨn‑ro xiʼin ɨnka‑ro.
Te xaxeʼe xa n‑xiʼí Daʼya Yɨɨ‑ia,
Jesucristu,
xaxeʼe‑ro,
ndada ndoo ñaʼa Ianyuux ntdaa kuechi‑ro.
8 Nux jaʼan‑ro xa ñatu kida‑ro kuechi,
dandaʼu‑ro mee‑ro,
te ñatu kutnuni ini‑ro xa kuu xandaa.
9 Nux naʼma‑ro kuechi‑ro,
naʼa‑ro xa ndadandaa Ianyuux kuechi‑ro.
Naʼa‑ro xa taxkanu ini‑ia kuechi‑ro.
Naʼa‑ro xa ndada ndoo ñaʼa‑ia kuechi‑ro.
10 Nux jaʼan‑ro xa ñatu kida‑ro kuechi,
duʼa jaʼan‑ro xa jaʼan Ianyuux tnuʼu vete,
chi jaʼan Ianyuux xa ntdaa‑ro kuu ñayiu ka kida kuechi.
Nux jaʼan‑ro xa ñatu kida‑ro kuechi,
ñatu jandixa‑ro tnuʼu n‑taxi‑ia.